Iseda Haroro Bona Mauri Dalana Hebou Pepana Edia Referens
© 2023 Watch Tower Bible and Tract Society of Pennsylvania
MARCH 4-10
BAIBEL ENA HEREVA BADADIA | SALAMO 16-17
“Iehova, Egu Gau Namodia Ibounai Ena Badina”
Matamata Taudia E, Mauri Namona Umui Moalelaia Diba
TURA KORIKORIDIA DAVARIA DALANA
11 Salamo 16:3 duahia. Davida be tura korikoridia davaria dalana ia diba. Ia ese Iehova idia lalokau henia taudia tura henia karana ia moalelaia. Iena turadia ia gwauraia “Lohiabada ena taudia,” idia be kara goevadia idia karaia taudia. Salamo torea tauna ma ta be ena turadia ia herevalaia neganai, ia gwau: “Oi dekenai idia gari taudia, bona oiemu taravatu idia badinaia taudia ibounai be egu turana taudia.” (Sal. 119:63) Stadi atikol ihatoina hegeregerena, tura namodia oi davaria diba. Idia be Iehova idia gari henia bona ia idia badinaia, bona danu edia mauri lagani be idauidau.
‘Iehova Ena Hairai Itaia’
Davida ia gwau: “Lau be Iehova lau abia hidi, ia be lau egu ahuna bona egu kapusi; Oi ese egu ahuna oi gimaia noho. Egu dala be gabu namodia dekenai idia lao. Oibe, egu ahuna be namo herea.” (Sal. 16:5, 6, BHḡ) Davida ia moale badina ena “ahuna” be Iehova ia tura henia bona ia hesiai henia diba. Davida bamona reana ita be hekwakwanai haida ita davaria, to Dirava amo hahenamo idauidau ita davaria danu! Unai dainai, namona be tomadiho momokani ita badinaia, bona hanaihanai Iehova ena lauma dubuna ‘ena hairai do ita itaia noho.’
Nega Ibounai Iehova Oi Laloa
2 Baibel lalonai Aberahamo, Sara, Mose, Ruta, Davida, Eseta, Paulo bona ma haida edia sivarai idia noho bona idia amo gau momo ita dibaia diba. Ma haida edia sivarai be Baibel ese ia gwauraia momo lasi, to idia danu ese ita idia durua diba. Bema Baibel ena sivarai ita laloa dobu, unai ese ita ia durua salamo torea tauna ena hereva ita badinaia totona, ia gwau: “Iehova be egu vairana ai lau atoa nega ibounai; badina be Ia be lauegu idiba kahana ai dainai lau be lau marere lasi.” (Sal. 16:8, BHḡ ) Unai hereva edia anina be dahaka?
3 Nega momo tuari tauna ese ena tuari kaia be ena imana idiba ai ia dogoatao bona ena kesi be imana lauri dekenai ia dogoatao—unai dainai, imana laurina amo ena idiba kahana ia gimaia be auka. To, bema ena turana ta be ena idiba kahana ai ia gini bona ia tuari, unai be gimaia gauna. Bema nega ibounai Iehova ita laloa bona ena ura ita karaia, Ia ese ita do ia gimaia. Unai dainai Baibel ena sivarai haida ita itaia, badina unai ese iseda abidadama do ia hagoadaia bona ita do ia durua nega ibounai Iehova ita laloa totona.
Hakaua Hereva Namodia
it-2-E 714
Matana Ena Nadinadi
Heberu gado herevana ʼi·shohnʹ (De 32:10; Ao 7:2) be inai hereva ʽaʹyin (matana) ida idia gaukaralaia neganai, ena anina be “matana ena tau maragina”; unai hegeregerena, Lalohisihisi Ane 2:18 (NW-E, futnout) ai inai hereva bath (natuna kekeni) idia gaukaralaia. Unai hereva rua be matana ena nadinadi idia herevalaia. Salamo 17:8 ai unai hereva rua (ʼi·shohnʹ bath-ʽaʹyin) idia gaukaralaia hebou, bona ena anina be, “tau maragina, matana ena natuna kekeni” (“matana ena nadinadi,” NW). Unai hereva ese ta be ma ta ena matana lalonai sibona ena laulau maragina ia itaia ia herevalaia.
Matana be hemami ia abia haraga, hegeregere bema huina maragina o kahu sisina be matana lalonai ia vareai neganai, ita mamia haraga. Matana ena nadinadi ia koua kahana be do ita naria namonamo, badina bema ia toto eiava gorere ta ese ia koua, tau ta be do ia itaia namonamo lasi eiava ia kepulu diba. Baibel ese “matana ena nadinadi” ia gaukaralaia ita naria namonamo gauna ia herevalaia totona. Dirava ena taravatu be unai bamona do ita naria namonamo. (Ao 7:2) Deuteronomi 32:10 ese Dirava be tama ta bamona Israela besena ia naria “ena matana nadinadi ia gimaia hegeregerena.” Davida ese Dirava ia guriguri henia do ia gimaia bona naria ena “matana ia gimaia bamona.” (Sal 17:8) Davida be ena inai taudia ese idia tuari henia neganai, ia ura Iehova be ia totona kara ta do ia karaia haraga. (Sek 2:8 (futnout) hahegeregerea; unuseniai Heberu herevana ba·vathʹ ʽaʹyin, “matana nadinadi,” ia gaukaralaia.)—MATANA itaia.
MARCH 11-17
BAIBEL ENA HEREVA BADADIA | SALAMO 18
“Iehova be . . . Lau Ia Hamauria Diravana”
w09-E 5/1 14 par. 4-5
Iehova ese ia Henia Moalena Ese Umui ia Hagoadaia
Baibel ese Iehova be mauri lasi gaudia ida ia hahegeregerea. Ia be “Israela ena Nadi Badana” bona “magu aukana” bamona ia herevalaia. (2 Samuela 23:3; Salamo 18:2; Deuteronomi 32:4) Edena dala ai Iehova be nadi ida ia hegeregere? Nadi badana ia gini goada, bona ta ese ia hamarerea diba lasi hegeregerena, Iehova Dirava be oi ia gimaia gabuna goadana.
5 Salamo bukana lalonai laulau herevadia momo idia noho, idia ese Iehova ena kara idauidau idia hahedinaraia. Hegeregere, Salamo 84:11 ia gwau Iehova be “dina bona kesi” bamona, badina ia be diari, mauri bona goada ena badina bona ita ia gimaia. Ma Salamo 121:5 ia gwau, “Iehova be emu ikerukeru, bona ia be emu imana idibana ai ia noho.” Au ena ikerukeru ese dina ena siahu amo oi ia koua hegeregerena, Iehova ese ena hesiai taudia be dika amo ia gimaia diba, iena “imana” eiava “apena” ena ikerukeru henunai idia ia gimaia diba.—Isaia 51:16; Salamo 17:8; 36:7.
it-2-E 1161 par. 7
Gadona
Dirava be iena hesiai taudia edia gadona ia kamonai. Mai edia lauma bona momokani ida Dirava idia guriguri henia taudia idia diba momokani, herevana edena gado idia gaukaralaia, to Dirava ese edia gadona ia kamonai. Ma danu, ena be ta be hereva ta ia gwauraia lasi bona ena lalona ai ia guriguri, to Dirava, taunimanima edia kudouna ai idia noho gaudia ia diba Diravana, ese ena guriguri ia “kamonai” bona ia haere henia. (Sal 66:19; 86:6; 116:1; 1Sa 1:13; Ne 2:4) Dirava ese lalohisihisi taudia edia taitai ia kamonai, bona danu ia idia inai henia bona iena hesiai taudia idia dagedage henia taudia edia gadona ia kamonai bona edia lalona ia ida noho taudia ia diba.—Ge 21:17; Sal 55:18, 19; 69:33; 94:9-11; Ier 23:25.
Lalohekwarahi Haheaukalaia Dalana
2. Laloa lou. Oi dekenai idia vara gaudia oi laloa lou neganai, Iehova ena heduru dainai oi haheaukalaia metau haida oi laloa, a? Iehova ese guna bona hari ena hesiai taudia ia durua dalana ita laloa neganai, maino ita abia bona ia dekenai iseda abidadama ia goada. (Sal 18:17-19) Elda ta, Joshua, ia gwau, “Lau dekenai Iehova ese egu guriguri ia haerelaia ena lista ia noho. Unai ese lau ia durua, Iehova ese egu noinoi ia haerelaia negadia lau laloatao totona.” Oibe, Iehova ese guna ita totona ia karaia gaudia ita laloa lou neganai, goada matamata ita abia ita haheauka noho totona.
Hakaua Hereva Namodia
it-1-E 432 par. 2
Kerubi
Edia toana be Dirava idia diba lasi besedia ese idia tomadiho henia kaivakukudia bamona lasi, haida idia hereva bamona. Idau negai Iuda taudia edia kastom hegeregerena (Baibel ese kerubi edia toana ia gwauraia lasi), inai kerubi edia toana be taunimanima bamona. Unai aneru edia laulau idia koroa neganai idia be mai edia hairai, bona Mose ese Iehova amo ia abia “palani hegeregerena” idia karadia. (Eso 25:9) Aposetolo Paulo ese idia be inai bamona ia herevalaidia “kerubi mai edia hairai idia noho, bona edia laulau ese maua ena koua gauna ia koua.” (Heb 9:5) Unai kerubi be Iehova kahirakahira idia noho: “Lau be unuseniai oi dekenai do lau hedinarai bona koua gauna ena ataiai amo oi do lau hereva henia. Taravatu Maua latanai idia noho kerubi rua edia huana amo.” (Eso 25:22; Nu 7:89) Unai dainai, ita gwau diba Iehova be “kerubi rua edia ataiai [eiava huanai] ia helai.” (1Sa 4:4; 2Sa 6:2; 2Ki 19:15; 1Si 13:6; Sal 80:1; 99:1; Isa 37:16) Kerubi be Iehova ese ia guia “kariota ia laulaulaia” (1Si 28:18), bona kerubi edia apena dainai idia roho haraga diba bona Dirava ena hesiai taudia idia gimaia diba. Unai dainai, Davida be ane amo Iehova ese ia durua totona ia mai haraga karana ia anelaia, ia gwau Iehova be “kerubi latanai ia guia bona ia roho diho,” eiava “aneru ena apena amo ia roho mai.”—2Sa 22:11; Sal 18:10.
MARCH 18-24
BAIBEL ENA HEREVA BADADIA | SALAMO 19-21
“Guba Gaudia ese Dirava ena Hairai Idia Gwauraia Noho”
Ibounai ese Iehova Ena Hairai Idia Hanamoa be Namo
DAVIDA, Iese ena natuna, be Betelehema ena gabu kahirakahira dekenai ia tubu daekau bona mamoe naria merona ai ia lao. Reana unai mamoe naria gabunai iena tamana ena mamoe serina ia naria lalonai, regerege lasi hanuaboi momo lalonai ia ese guba ai hisiu momo herea ia itadia! Ita daradara lasi, Dirava ena lauma amo Salamo karoa 19 ena hereva namodia ia torea bona anelaia neganai, unai gaudia ia laloa lou: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho. To idia gwauraia gaudia, be tanobada kahana ibounai dekenai idia lao vadaeni. Edia hereva be tanobada ena gabu ibounai, dekenai idia ginidae vadaeni.”—Salamo 19:1, 4.
2 Ena be Iehova ese guba ai ia havaraia hoa gaudia idia hereva diba lasi eiava edia gado regena be lasi, to dina bona hanuaboi ibounai idia ese Iehova ena hairai idia hahedinaraia. Dirava ia havaraia gaudia ese hanaihanai Dirava ena hairai idia hahedinaraia, bona regerege lasi dalanai Dirava idia hanamoa karana be “tanobada kahana ibounai dekenai” idia noho taudia ese idia itaia, bona unai ita laloa karana ese ita ia hagoadaia ita manau totona. To, Dirava ia havaraia gaudia ese regerege lasi dalanai Dirava idia hanamoa be hegeregere lasi. Kamonai taudia idia hagoadaia edia gado regena amo Dirava idia hanamoa totona. Salamo torea tauna ta ese Dirava idia tomadiho henia taudia mai edia abidadama dekenai, inai hereva helagana ia henia: “Lohiabada ena . . . hairaina bona iena goada badana do umui hanamoa. Lohiabada ena ladana badana do umui abia isi.” (Salamo 96:7, 8) Iehova idia tura henia taudia be mai edia moale ida unai hagoadaia herevana idia badinaia. To, Dirava ita hanamoa totona, dahaka ita karaia danu be namo?
Dirava Ia Havaraia Gaudia ese Iena Hairai Idia Hahedinaraia!
8 Davida ese Iehova ia havaraia gauna ma ta ia herevalaia, ia gwau: “Dirava ese guba dekenai, dina ena noho gabuna ia karaia. Daba neganai dina ia hedinarai mai, headava matamata tauna, be iena ruma dekena amo ia hedinarai bamona, ma heau helulu goada tauna, be mai moale bada danu ia heau noho bamona. Guba ena dokona ta, dekena amo ia daekau noho, vadaeni ia hanaia noho, ela bona guba ena dokona ta. Gau ta be iena siahu dekena amo ia hunia diba lasi.”—Salamo 19:4-6.
9 Dina be hisiu ma haida ida ita hahegeregerea neganai, ia be bada momokani lasi. To, ia be hisiu badana ta, ia idia gegea planeti ia hereaia momokani. Buka ta ia gwau ena metau be “2 bilioni bilioni bilioni ton”—iseda sola sistem ena metau ibounai amo 99.9 pesen be dina ena metau! Dina ena graviti dainai tanobada ena daudau dina amo be kilomita milioni 150 bona tanobada be dina amo ia lao daudau eiava ia mai kahirakahira lasi. Dina ena siahu kahana maragina sibona be tanobada ia abia, to unai be hegeregere ita mauri noho totona.
10 Salamo torea tauna ese laulau herevadia amo dina ia herevalaia, ia gwau dina be “goada tauna” bamona dina ai guba ena kahana ta amo ia heau lao kahana ma ta dekenai bona hanuaboi ai ena “noho gabuna” dekenai ia giroa. Unai hisiu badana ia diho neganai, tanobada amo ena toana be ena “noho gabuna” dekenai ia giroa. Daba ai, ia hedinarai, hegeregere “headava matamata tauna, be iena ruma dekena amo ia hedinarai bamona.” Davida be mamoe naria tauna dainai, hanuaboi ena keru bada ia diba. (Genese 31:40) Ia be dina ese iena tauanina bona tano ia hasiahua dalana ia laloa lou. Ia hedinarai goevagoeva, dina be ist kahana amo ia hanaia lao west kahana neganai ia hesiku lasi, to “goada tauna” bamona ia hegaegae unai dala tamona ia badinaia lou totona.
g95-E 11/8 7 par. 3
Havaraia Tauna Badana Idia Laloa Boio
Tubutubu gaudia edia toana, kala bona hairai ita moalelaia karana ese ita do ia durua iseda Havaraia Tauna ita diba namonamo totona, ia havaraia gaudia momo ita itaia diba. Dina ta Iesu ese ena hahediba taudia ia hamaoroa Galilea ai idia tubu flaoaflaoa idia stadilaia totona. “Tano ena lili edia tubu dalana mani umui itaia. Idia gaukara lasi, bona dabua idia turia lasi, to umui lau hamaoroa, Solomona ena hairai ibounai ese unai flaoaflaoa edia hairai ia hereaia lasi.” (Mataio 6:28, 29) Flaoaflaoa ta ena hairai ese ita ia hadibaia Dirava be taunimanima edia dabu gaudia ia laloa bada.
Hakaua Hereva Namodia
Iehova Ena Ura be Do Ia Guguru!
5 Iehova ese ia havaraia gaudia ibounai be ia ese ia atoa taravatuna idia badinaia. Unai ia karaia, unai amo ia havaraia gaudia ibounai be idia gaukara hebou namonamo diba. (Sal. 19:7-9) Oibe, iunives ai idia noho gaudia ibounai be edia gabu korikori ai idia noho, bona Dirava ena ura hegeregerena idia gaukara. Momokani, Iehova ese taravatu ia atoa, unai amo ia havaraia gaudia be idia gaukara hebou namonamo diba. Hegeregere, graviti ena taravatu ia noho dainai, hodahoda o atmosfia ese tanobada ia gegea diba, davara ena aru dalana ia biagua, bona tanobada dekenai mauri gaudia idia noho diba. Havaraia gaudia ibounai, taunimanima danu, be unai taravatu idia badinaia. Unai ibounai ese Dirava ena ura tanobada bona taunimanima totona idia hamomokania. Iseda haroro gaukara ai, unai gau ibounai ia Havaraia Tauna ita hanamoa diba, a?—Apok. 4:11.
MARCH 25-31
TREASURES FROM GOD’S WORD | SALAMO 22
Baibel ese Iesu Ena Mase ia Perovetalaia
Mesia Idia Davaria!
16 Toana be Dirava ese ia rakatania. (Salamo 22:1 duahia.) Mareko ia gwau adorahi 9 oklok bamona Iesu be ia boiboi ia gwau: “‘Eli, Eli, lama sabakatani?’ anina be, ‘Egu Dirava e, egu Dirava e, dahaka dainai lau oi rakatania?’” (Mar. 15:34) Namo lasi ita laloa Iesu be ena Tamana ia abidadama henia lasi dainai, unai bamona ia hereva. Lasi, to ia diba ena mase negana ai, ena tamana be ena inai taudia edia dagedage karana do ia koua lasi. Oibe, unai nega ai Iesu ia hahedinaraia, herevana hisihisi bada ia davaria, Dirava ia badinaia ela bona ia mase. Iesu be ataiai ia noho herevana ia gwauraia neganai, Salamo 22:1 ena hereva ia guguru.
Mesia Idia Davaria!
13 Davida ia peroveta, Mesia do idia hereva dika henia bona hevasehalaia. (Salamo 22:7, 8 duahia.) Iesu be hisihisi auna dekenai ia noho neganai, taunimanima ese idia hereva dika henia. Mataio ia gwau: “Idia raka hanai taudia be ia idia hereva dika henia bona edia kwarana idia davea, idia gwau: ‘Oi gwau dubu helaga do oi hadikaia bona dina toi lalonai do oi haginia lou, vadaeni oi sibona oi hamauria! Bema oi be Dirava ena natuna, hisihisi auna amo oi diho!’” Dubu biagudia, taravatu hadibaia taudia bona tau badadia be ia idia hevasehalaia, idia gwau: “Ma haida ia hamauria, to ia sibona ia hamauria diba lasi! Ia be Israela ena King, namona be hisihisi auna amo ia diho bona ia do ita abidadama henia. Ia be Dirava ia abidadama henia, namona be Dirava ese hari do Ia hamauria bema Ia ura henia, badina ia gwau, ‘Lau be Dirava ena Natuna.’” (Mat. 27:39-43) Ena be Iesu be hisihisi bada ia davaria, to ia badu henidia eiava ia gwau henidia lasi. Ita dekenai ia be haheitalai namona.
Mesia Idia Davaria!
14 Laki gadara ta amo ena dabua do idia haria. Davida ia peroveta ia gwau: “Lauegu dabua idia haria noho. Egu dabua be laki dekenai idia haria.” (Sal. 22:18) Unai ia vara momokani. Baibel ia gwau Roma tuari taudia ese Iesu be au dekenai idia kokoa kau murinai, gadara ta amo ena dabua idia haria.—Mat. 27:35; Ioane 19:23, 24 duahia.
Hakaua Hereva Namodia
Iseda Hebou Helagadia Matauraia
7 Iseda hebou ita matauraia karana be dala idauidau ai ita hahedinaraia diba. Dala ta be, Basileia anedia ita abia totona ita ibounai ita noho be namo. Unai ane momo be guriguri herevadia dainai, mai hemataurai ida ita abia be namo. Aposetolo Paulo ese Iesu ia herevalaia neganai, Salamo 22 ena hereva ia gwauraia: “Oiemu kara be lauegu tadina dekenai do lau hamaorolaia, bona hebou lalonai oiemu ladana do lau hanamoa.” (Heberu 2:12) Unai dainai, seamani ese ane ia do gwauraia lasi neganai, namona be iseda helai gabudia dekenai ita helai bona ane ita abia neganai, ane ena hereva edia anina ita laloa. Namona be iseda ane amo salamo torea tauna ena hemami ita hahedinaraia: “Iena kara maoromaoro taudia edia hebou badana lalonai, lau ese Lohiabada do lau hanamoa, mai egu kudouna ibounai danu.” (Salamo 111:1) Oibe, hebou dekenai Iehova hanamoa anedia ita abia dainai, ita ginidae haraga bona ita noho ela bona dokona be mai anina bada.
“Hebou Taudia Edia Vairanai” Iehova Hanamoa
Hari, guna bamona, dala ia noho abidadama taudia ta ta ese edia abidadama be “hebou taudia edia vairanai” idia gwauraia hedinarai totona. Ibounai ese unai idia karaia dalana ta be, kongrigeisen heboudia lalonai helai taudia dekenai idia henia henanadai haerelaia karana. Haere karana ese namo ia havaraia diba. Hegeregere, haere karana amo hekwakwanai hanaia eiava dadaraia daladia ita gwauraia hedinarai neganai, unai ese eda tadikaka edia lalona idia hagoadaia Baibel ena hakaua herevadia idia badinaia totona. Haere lalonai idia gwauraia to idia torea hanai lasi Baibel siridia eiava sibona eda stadi amo ita davaria gaudia ita gwauraia hedinarai neganai, unai ese ma haida ia durua diba edia stadi karana idia hanamoa totona.
APRIL 1-7
BAIBEL ENA HEREVA BADADIA | SALAMO 23-25
“Iehova be Lau ia Naria, Iena Mamoe Bamona”
‘Iehova be Lau Ia Naria Tauna’
Iehova ese ena mamoe ia hakaudia. Mamoe naria tauna be lasi neganai, mamoe idia boio. Unai hegeregerena, dala maoronai ita raka totona, heduru ita abia be namo. (Ieremia 10:23) Davida ia gwau, Iehova ese ena taunimanima be ‘rei bona ranu namona gabunai’ ia hakaudia lao. Ia ese “kara maoromaoro daladia dekenai” idia ia hakaua lao. (Siri 2, 3) Unai laulau herevadia ese ita ia hagoadaia Dirava ita abidadama henia totona. Baibel ai Dirava ena hakaua herevadia ita badinaia neganai, eda mauri lalonai do ita moale bona do ita noho namo.
‘Iehova be Lau Ia Naria Tauna’
Iehova ese ena mamoe ia gimadia. Mamoe naria tauna be lasi neganai, mamoe idia gari bona idia mamia ta ese ia durudia lasi. Iehova ese ena taunimanima ia hamaoroa, “dibura koura gabuna” anina be, edia mauri lalonai hekwakwanai badadia idia davaria neganai, idia gari lasi be namo. (Siri 4) Iehova ese idia ia naria, bona Ia noho hegaegae idia ia durua totona. Ia idia tomadiho henia taudia dekenai aonega bona goada ia henia, hahetoho idauidau idia haheaukalaia totona.—Filipi 4:13; Iamesi 1:2-5.
‘Iehova be Lau Ia Naria Tauna’
Iehova ese ena mamoe ia ubudia. Mamoe idia ura edia naria tauna be idia dekenai aniani ia henia. Dirava sibona ena heduru amo Ia do ita dibaia. (Mataio 5:3) Ita moale badina Iehova be hariharibada Diravana, iena hesiai taudia totona aniani momo ia hegaegaelaia. (Siri 5) Baibel bona Baibel bukadia hegeregere, hari oi duahia Gima Kohorona, be Iehova ese ia henia lauma aniani ta, unai amo ita ese mauri ena anina bona Dirava ena ura do ita diba.
Hakaua Hereva Namodia
Mai Kudouna Ibounai ida Kara Maoromaoro Ura Henia
IEHOVA ese ena Hereva bona lauma helaga amo iena taunimanima be “kara maoromaoro daladia dekenai” ia hakaudia noho. (Sal. 23:3) To, ita be goevadae lasi taudia dainai, nega momo iena kara maoromaoro daladia ita badinaia lasi. Kara maoromaoro ita karaia totona, ita hekwarahi be namo. Dahaka ese ita do ia durua? Iesu bamona, namona be mai eda kudouna ibounai ida kara maoromaoro ita ura henia.—Salamo 45:7 duahia.
2 “Kara maoromaoro daladia” ena anina be dahaka? Anina be eda mauri lalonai Dirava ena kara maoromaoro taravatudia ita badinaia. Heberu bona Greek gado ai inai hereva “kara maoromaoro” ena anina ma ta be “goeva,” bona Baibel ena hakaua herevadia badinaia momokani karana ia hahedinaraia. Iehova be kara maoromaoro ena badina dainai, iena taunimanima be “kara maoromaoro dalana” ai ia hakaudia bona idia be mai moale ida iena taravatu idia badinaia.—Sal 5:8.
3 Mai iseda kudouna ibounai ida ita hekwarahi Iehova ena kara maoromaoro taravatudia ita badinaia neganai, ia do ita hamoalea. (De 32:4) Unai ita karaia totona Baibel do ita stadilaia, unai amo Iehova Dirava do ita dibaia namonamo. Dina ta ta ai unai ita karaia neganai, Iehova kahirakahira do ita lao bona iena kara maoromaoro taravatudia do ita ura henia. (Ia 4:8) Danu, eda mauri lalonai abia hidi badadia ita ura karaia neganai, Baibel ena sisiba ita badinaia be namo.
APRIL 8-14
BAIBEL ENA HEREVA BADADIA | SALAMO 26-28
Davida ese Ena Badinaia Karana ia Hagoadaia Dalana
Kara Maoromaoro Badinaia Dalana Dekenai Ita Raka
8 Davida ia guriguri: “Lohiabada e, lau do oi tahua bona tohoa, bona egu kara do oi itaia. Egu ura [“nadinadi,” NW] bona egu laloa [“kudouna,” NW] danu do oi tahua.” (Salamo 26:2) Nadinadi be iseda tauanina lalonai ia noho. Laulau dalanai, nadinadi be ta ena lalohadai bona hemami goadadia ia laulaulaia. Bona kudouna be ta ena lalona korikorina—unai be iena ura ena badina, hemami bona lalona. Davida be Iehova ia noia ena kara do ia tahua neganai, ia noinoi Iehova ese ena lalona momokani bona hemami do ia tahua be namo.
9 Davida ese Dirava ia noia ena nadinadi bona kudouna ia tahua totona. Iehova ese iseda lalona korikorina be edena bamona ia tahua diba? Davida ia gwau: “Lohiabada lau hanamoa noho, badina ia ese lau ia hakaua noho dainai, hanuaboi lalonai laloa maoro [“egu nadinadi,” NW] ese, egu dala lau dekenai ia hadibaia.” (Salamo 16:7) Unai ena anina be dahaka? Anina be Dirava ena sisiba be Davida ena lalona momokani dekenai idia diho bona unuseniai idia noho, ena lalona momokani bona hemami ia hamaoromaoroa totona. Unai bamona do ia vara diba ita dekenai bema Dirava ena Hereva, ia abia hidi taudia bona ena orea amo idia mai sisiba herevadia be mai tanikiu ida ita laloa dobu bona dala ita kehoa eda lalona ai idia noho totona. Bema nega ibounai Iehova ita noia, ia ese unai gaudia amo ita do ia durua kara maoromaoro badinaia dalana dekenai ita raka totona.
Kara Maoromaoro Badinaia Dalana Dekenai Ita Raka
12 Davida be ena kara maoromaoro badinaia karana ia hagoadaia gauna ma ta ia herevalaia: “Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi. Kara dika taudia edia hereva hebou, be lau ura lasi momokani, bona kerere taudia dekena amo lau noho siri.” (Salamo 26:4, 5) Davida be kara dika taudia danu ia helai lasi. Ia be hebamo dikadia ia inai henia.
13 Ita be edena bamona? Ita ura televisen program, vidio, muvi, Internet sait bona ma gau haida ai idia hedinarai koikoi taudia ita bamodia, a? Edia kara momokani idia hunia taudia ita dadaraia, a? Sikuli gabunai eiava eda moni gaukara gabunai, haida be badina kereredia dainai ita idia tura henia koikoi. Ita ura Dirava ena hereva momokani ena dala idia dadaraia taudia ita bamoa, a? Aposteit taudia danu be edia kara korikori idia hunia, idia ura Iehova amo ita idia veria oho. To bema Keristani kongrigeisen lalonai mauri daladia rua idia badinaia taudia idia noho be edena bamona? Idia danu be edia kara korikorina idia hunia. Jayson, hari hesiai tauna ta, be unai bamona matamata taudia haida guna ia bamoa. Idia ia herevalaia, ia gwau: “Dina ta idia ta be lau dekenai ia gwau: ‘Hari ita karaia karadia be anina lasi, badina nega matamata ia ginidae neganai, ita be do ita mase. Do ita reaia gauna be do ita diba lasi.’ Unai bamona hereva ese egu lalona ia hanogaia. Lau ura lasi nega matamata ia ginidae neganai lau mase.” Jayson be aonega dalanai unai bamona taudia ia bamoa lou lasi. Aposetolo Paulo ia sisiba: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:33) Hebamo dikadia ita dadaraia be gau badana!
Kara Maoromaoro Badinaia Dalana Dekenai Ita Raka
17 Israela dekenai palai dubuna, ena boubou patana danu, be Iehova tomadiho henia gabuna badana. Davida be guriguri lalonai unai gabu ia moalelaia karana ia herevalaia: “Lohiabada e, oi noho Ruma, be lau ura henia noho. Oiemu hairaina ia noho gabuna, be lau lalokau henia noho.”—Salamo 26:8.
18 Iehova ita dibaia totona ita hebou gabudia ita ura henidia, a? Eda noho gabudia dekenai idia noho Kingdom Hall iboudiai, ia lalonai idia henia lauma aniani ena program danu, be tomadiho momokani gabudia. Ma danu, lagani ta ta ai ita be distrik, sekit bona dina tamona hebouhebou ita abia. Unai bamona heboudia dekenai Iehova ena “hadibaia hereva” idia herevalaia. Bema unai hereva “lalokau henia bada” karana ita dibaia, do ita ura hebou ibounai ita lao henia bona unuseniai do ita kamonai namonamo. (Salamo 119:167) Iseda namo idia laloa bada bona idia ura ita idia durua kara maoromaoro badinaia dalana dekenai ita raka tadikaka danu ita noho be hagoadaia gauna!—Heberu 10:24, 25.
Hakaua Hereva Namodia
w06 7/15 28 par. 15
Iehova ese Hisihisi Tauna Ia Durua
15 Salamo torea tauna Davida ia gwau: “Egu tamana bona sinana, ese lau idia rakatania, to Lohiabada ese lau do ia abia dae.” (Salamo 27:10) Hagoadaia gauna be, ita diba Iehova ena lalokau be tama sina ibounai edia lalokau ia hereaia! Ena be tama sina ese oi idia ura henia lasi, kara dika henia, bona rakatania dainai oi lalohisihisi, to oi laloaboio lasi, Iehova be oi ia lalokau henia. (Roma 8:38, 39) Danu, Dirava be ia lalokau henia taudia ia veria mai. (Ioane 3:16; 6:44) Herevana taunimanima be oi idia hadikaia, to emu guba Tamana be oi ia lalokau henia!
APRIL 15-21
BAIBEL ENA HEREVA BADADIA | SALAMO 29-31
Matahakani—Dirava Ena Lalokau Karana
it-1-E 802 par. 3
Vairana
Inai hereva “vairana ia hunia” ena anina be idauidau. Iehova Dirava ese ta amo ena vairana ia hunia karana ese ia hahedinaraia unai tauna amo ena hahenamo eiava ena heduru siahuna ia kokia. Unai ia vara bema tau ta eiava orea ta, hegeregere Israela besena, be Dirava idia badinaia lasi. (Iob 34:29; Sal 30:5-8; Isa 54:8; 59:2) Nega haida unai kara ese ia hahedinaraia Iehova ia ura lasi kara ta ia karaia o haere ia henia, to ia naria ela bona ia makaia negana. (Sal 13:1-3) Davida ia guriguri ia gwau, “Egu kara dikadia amo emu vairana oi hunia” neganai, ia ese Dirava ia noia ena kara dika do ia gwauatao o laloaboio totona.—Sal 51:9; 10:11 hahegeregerea.
w07 3/1-E 19 ¶1
Mai Moale Ida Iehova Ita Naria
Iehova amo ia mai matahakani ena namo be au huahua idia mage idia lao dalana ida ia hahegeregerea. Baibel ese Dirava amo ia mai matahakani ia herevalaia, ia gwau: “Gabeai, unai matahakani amo diba idia abia taudia dekenai maino bona kara maoromaoro ia havaraia.” (Heberu 12:11) Huahua be metairametaira ia mage ia lao hegeregerena, ita danu be Dirava amo matahakani ita abia neganai, metairametaira iseda kara ita hanamoa. Hegeregere, bema kerere ta ita karaia dainai kongrigeisen amo iseda maduna idia kokia, mai ura ida Dirava ita naria karana ese ita ia durua ita lalomanoka bona hesiku lasi totona. Unai ia vara neganai, Davida ena hereva ese oi do ia hagoadaia: “[Dirava ena] badu be ia ore haraga, To iena lalonamo be ia noho hanaihanai. Reana hanuaboi ai idia taitai noho, to daba ai idia moale bada.” (Salamo 30:5) Bema Dirava ena Hereva bona orea ese idia henia sisiba ita badinaia bona mai haheauka ida ita naria, gabeai do ita “moale bada.”
Helalo-Kerehai Momokani be Dahaka?
18 Bema kongrigeisen amo idia atoa siri tauna be hebou ia lao hanaihanai, elda taudia ese idia henia sisiba, hegeregere guriguri bona Baibel stadilaia hanaihanai karana ia badinaia, unai ese do ia hahedinaraia ia helalo-kerehai momokani. Danu, do ia gaukara goada ena kara dika gunadia ia karaia lou lasi totona. Bema ia hekwarahi Iehova ida ena hetura karana ia hanamoa lou, ia diba momokani Iehova ese ena kara dika ibounai do ia gwauatao bona elda taudia ese do idia durua kongrigeisen lalonai ia vareai lou totona. Oibe, elda taudia be kerere ia karaia tauna idia hereva henia neganai, namona be do idia itaia bema ia be helalo-kerehai toana ia hahedinaraia momokani eiava lasi, bona idia hahemaoro henia neganai idia kara auka lasi.
Hakaua Hereva Namodia
w06 5/15 19 par. 13
Salamo Bukana Ena Kahana Ginigunana Ena Hereva Badadia
31:23—Edena dala ai Iehova ese hekokoroku tauna ena kerere davana ia henia? Ena davana be panisi ia abia. Kara maoromaoro tauna be ia manoka dainai, kara dika ta ia karaia neganai, Iehova ese ia matahakani henia. To hekokoroku tauna be ena kara dika amo ia helalo-kerehai lasi dainai, dika bada do ia davaria.—Aonega Herevadia 11:31; 1 Petero 4:18.
APRIL 22-28
BAIBEL ENA HEREVA BADADIA | SALAMO 32-33
Dahaka Dainai Kara Dika Badadia Ita Gwauraia Hedinarai be Namo?
Iehova Ena Hebogahisi ese Lalo-Metau amo Ita Ia Hamauria
7 Bema Dirava ena taravatu ia utua kara dika badana ta ita karaia, reana taunimanima dekenai bona Iehova dekenai danu, iseda kara dikana ita gwauraia hedinarai be ia auka. Bema unai bamona dahaka do ia vara diba? Salamo 32 ai, David ia gwau: “Egu kara dika lau gwauraia hedinarai lasi neganai, lauegu tauanina ia manoka, dina ibounai lau ganagana dainai. Badina be [Iehova] imana metauna be lau dekenai ia noho, dina bona hanuaboi ai danu; egu tauanina be ia kakoro, lahara negana ena dina siahu ese lau ia raraia bamona.” (Siri 3, 4) Ia kerere tauna Davida ese ena kara dika ia hunia toho dainai bona ena lalona ena mamina dikana ia koua toho dainai, ena tauanina ia hametaua bada. Oibe, reana lalona dekenai bona tauanina dekenai gorere ia davaria. To ita diba gauna be, ena moale ia haboioa. Bema ita ta be unai bamona namona be dahaka ita karaia?
‘Kara Dika Ia Gwauatao’ Diravana
8 Ia helalo-kerehai tauna, Davida, ia gwau: “Lauegu kara dika, be oi dekenai lau gwauraia hedinarai. Lauegu kerere lau hunia lasi. . . . Vadaeni oi ese lauegu kara dika oi gwauatao.” (Salamo 32:5) Inai hereva “gwauatao,” be Heberu gado herevana ta amo idia hahanaia, ena anina be “abia isi,” eiava “huaia.” Unai siri lalonai ena anina be “lalona ena hisihisi, kara dika, bona kara kerere” abia oho karana. Unai dainai, inai be hegeregere Iehova ese Davida ena kara dika ia abia isi bona ia huaia oho. Momokani, unai ese Davida ena lalohisihisi ia hamaragia. (Salamo 32:3) Iesu ena mauri davalaia boubouna idia abidadama henia kara dika taudia be Dirava ese edia kara dika do ia gwauatao, ita danu be unai ita abidadama henia momokani diba.—Mataio 20:28.
Dika Gwauraia Hedinarai Karana ese Lauma Dalanai Namo Ia Havaraia
Davida ese ena kara dika ia gwauraia hedinarai murinai, ia be anina lasi ena mamina dikana ia abia lasi. Salamo lalonai ia torea dika gwauraia hedinarai karadia ese ena hemami namona bona mai kamonai ida Iehova ia hesiai henia urana idia hahedinaraia. Hegeregere, Salamo 32 mani oi itaia. Siri 1 ia gwau: “Dirava ese tau ta ena kara dika ia gwauatao neganai, unai tau be ia namo. Bema iena kerere be Dirava ese ia gwauatao, unai tau be ia moale.” Herevana kara dika ena bada be edena bamona, to bema tau ta ia helalo-kerehai momokani, moale ia davaria diba. Unai oi hahedinaraia dalana ta be, oi karaia karadia ena maduna oi abia dae, Davida ia karaia bamona. (2 Samuela 12:13) Davida be Iehova vairanai ena kara ena maoro ia hamomokania toho lasi o ma haida dekenai kerere ia atoa toho lasi. Siri 5 ia gwau: “Unai neganai lauegu kara dika, be oi dekenai lau gwauraia hedinarai. Lauegu kerere lau hunia lasi. Lau gwau, ‘Lauegu kerere, be Lohiabada ena vairanai do lau gwauraia hedinarai,’ vadaeni oi ese lauegu kara dika oi gwauatao.” Dika gwauraia hedinarai karana momokanina ese namo ia havaraia, unai amo ta ena kerere gunadia dainai ena lalona ese do ia hahisia lou lasi.
Hakaua Hereva Namodia
Salamo Bukana Ena Kahana Ginigunana Ena Hereva Badadia
32:7—Davida ese Iehova ena noho hanaihanai lalokauna ese ita ia gimaia karana be edena bamona ia herevalaia? Dirava ena noho hanaihanai lalokauna ese iseda hetura karana ia ida ia gimaia. Davida be Iehova ia guriguri henia neganai, ia gwau: “Oi be egu hunia gabuna ta bamona, oi ese lalometau negana ai lau do oi gimaia. Emu hahemauri karana dainai, moale bada ena boiboi regena ese lau idia hagegea. . . . Iehova ia abidadama henia tauna dekenai iena lalokau ia hahedinaraia noho.” (Sal. 32:7, 10) Idaunegai, magu ese siti ia hagegea bona taunimanima be edia inai taudia amo ia gimaia. Iehova ena noho hanaihanai lalokauna be unai magu bamona, Iehova ida iseda hetura karana ia hadikaia gaudia amo ita ia gimaia. Danu, Iehova ena lalokau be ia noho hanaihanai dainai, ia kahirakahira dekenai ita ia veria lao.—Ier. 31:3.
APRIL 29–MAY 5
BAIBEL ENA HEREVA BADADIA | SALAMO 34-35
‘Nega Ibounai Iehova Do Ita Hanamoa’
Iehova Ena Ladana Ita Hanamoa Hebou
11 “Nega ibounai Lohiabada do lau hanamoa. Ia do lau tanikiu henia ela bona hanaihanai.” (Salamo 34:1) Davida be Saulo amo ia heau dainai, reana tauanina gaudia ia lalohekwarahilaia momo, to ataiai sirina ese ia hahedinaraia bamona, unai ese ia koua lasi Iehova ia hanamoa totona. Hekwakwanai ita davaria neganai, Davida ena haheitalai ita tohotohoa be namo! Herevana ita be sikuli gabuna dekenai, gaukara gabuna ai, iseda Keristani tadikaka ida, eiava haroro gaukara lalonai, iseda ura badana be Iehova do ita hanamoa. Iehova do ita hanamoa ena badina be momo herea! Hegeregere, Iehova ese ia havaraia gau namodia momo herea ita moalelaia diba. Bona ena tanobada orea amo ia karaia gaudia idauidau mani oi laloa! Ena be Iehova ena kamonai hesiai taudia be idia goevadae lasi, to hari inai negai Ia ese ia durudia bada. Dirava ese ia havaraia gaudia bona ena tanobada oreana ese idia karaia gaudia be tanobada ena ladana bada taudia ese idia karaia gaudia idia hereaia. Unai dainai, Davida ena hereva oi abia dae, ani? Ia gwau: “Lohiabada e, dirava ta oi hegeregerena be lasi momokani. Idia ta ese oiemu kara hegeregerena idia karaia diba lasi.”—Salamo 86:8.
Iehova Ena Ladana Ita Hanamoa Hebou
13 “Dirava ena durua lau dekenai lau laloa neganai, ia lau hanamoa bada. Hisihisi idia abia noho [“manau,” BHḡ ] taudia ese, inai egu hereva do idia kamonai, vadaeni do idia moale be namo.” (Salamo 34:2) Davida be sibona ia karaia gaudia ia heagilaia lasi. Hegeregere, Gata ena king ia koia dalana ia heagilaia lasi. Ia diba Gata dekenai Iehova ese ia gimaia bona Iehova ena heduru dainai ia heau mauri. (Aonega Herevadia 21:1) Unai dainai Davida be sibona dekenai ia heagi lasi, to Iehova ia hanamoa. Unai kara dainai, manau taudia be Iehova kahirakahira idia lao diba. Danu, Iesu be Iehova ena ladana ia hanamoa hanaihanai dainai, manau taudia be Iehova kahirakahira idia lao. Hari inai negai, manau taudia be bese idauidau amo idia mai bona horoa Keristani oreana ida idia gaukara hebou, bona Iesu Keriso be unai orea ena kwarana. (Kolose 1:18) Unai bamona manau taudia be idia itaia horoa taudia ese Dirava ena ladana idia hanamoa neganai, edia kudouna ia hamarerea. Bona Baibel ena hereva idia kamonai neganai, Dirava ena lauma helaga ese idia dekenai laloparara ia henia.—Ioane 6:44; Kara 16:14.
Iehova Ena Ladana Ita Hanamoa Hebou
15 “Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria.” (Salamo 34:4) Unai be mai anina bada Davida dekenai, badina ia gwau: “Lau be durua tauna ta lasi neganai, Lohiabada dekenai lau taitai, vadaeni ia ese lau dekenai ia haere, bona egu hekwarahi ibounai dekena amo lau ia hamauria.” (Salamo 34:6) Iseda tadikaka ita bamoa neganai, unai be nega namona Iehova ese ita ia durua hekwakwanai ta ita hanaia sivaraina ita kikilaia totona. Unai ese iseda tadikaka edia abidadama ia hagoadaia, Davida ena hereva ese ia idia badinaia taudia ia hagoadaia bamona. Davida idia bamoa taudia “edia matana [Iehova] dekenai idia negea, vadaeni idia moale. Unai dainai edia abidadama do ia dika lasi.” (Salamo 34:5) Ena be Davida be King Saulo amo ia heau, to ena tatau be idia hemarai lasi. Idia diba momokani Dirava ese Davida ia durua noho, bona idia moale. Unai hegeregerena, kamonai matamata taudia bona lagani daudau lalonai Iehova idia hesiai henia taudia be Iehova ena heduru idia tahua. Bona idia ta ta be Iehova ena heduru idia itaia dainai, idia moale, bona unai ese edia lalona ia veria Dirava idia badinaia noho totona.
Hakaua Hereva Namodia
Mesia Idia Davaria!
35:11—Inai peroveta herevana hegeregerena Iesu ena nega ai dahaka ia vara? Koikoi taudia ese do idia samania. Davida ia gwau: “Samania koikoi taudia idia toreisi noho, lau karaia lasi kerere totona, lau idia samania noho.” (Sal. 35:11) Unai peroveta hereva hegeregerena, “dubu biagudia bona Sanhedrin taudia ibounai be Iesu do idia samania koikoi taudia idia tahua, ia idia hamasea totona.” (Mat. 26:59) Baibel ia gwau, momo ese Iesu do idia samania koikoi, to edia hereva be idauidau. (Mar. 14:56) Iesu ena inai taudia be unai koikoi herevadia idia laloa lasi, to edia ura badana be ia idia hamasea.