Gorere Tauna ta Oi Naria Lalonai Emu Abidadama Do Ia Goada Noho

DOKETA taudia ese Witnes taihu ta ena ladana Kim, ena doruna ai tiuma ta idia davaria bona idia gwau ia be kensa gorerena ia abia.a Iena adavana, Steve ia gwau: “Unai tiuma idia kokia murinai Kim be redioterapi bona kemoterapi ia abia. Bona, unai medikol heduru dainai ena tauanina ia manoka bona ia raka diba lasi.”

Steve ia lalohisihisi bada bona ia lalometau badina ena lalokau adavana ena gorere be ia metau bona ena tauanina ia manoka ia lao. Reana oiemu ruma bese lalonai ta be gorere badana ta ia abia o ia buruka dainai ia gorere. (Had. 12:​1-7) Bema oi dekenai unai ia vara, oi diba gorere tauna oi naria namonamo totona, oi sibona oi naria be namo. Bema emu abidadama ia manoka, do oi daradoko bona gorere dainai, do oi hegeregere lasi gorere tauna oi naria totona. Edena dala ai gorere tauna o buruka tauna oi naria noho lalonai emu abidadama ia goada noho diba? Kongrigeisen tadikaka taihu be dahaka idia karaia diba, gorere taudia idia durua totona?

Edena Dala ai Emu Abidadama Ia Goada Noho Diba?

Gorere tauna oi naria lalonai, emu abidadama ia goada bona oi gorere lasi totona, emu nega bona goada oi gaukaralaia namonamo be gau badana. Aonega Herevadia 11:2 ia gwau: “Manau taudia ese aonega idia davaria noho.” Unai siri lalonai, inai hereva “manau” anina be emu goada ena hetoana do oi diba. Emu goada ibounai oi haorea lasi totona, namona be sediual namona oi torea bona oi karaia gaukara idauidau do oi laloa namonamo.

Steve be mai aonega bona manau ida ena maduna ia laloa namonamo. Ia be moni gaukara sibona ia karaia lasi, to Ireland ai Iehova ena Witnes taudia edia kongrigeisen ta ai, ia be elda orea ena kodineita bona haroro naria tauna. Bona ena gabu dekenai ia be Hospital Liesen Komiti ena memba ta. Steve ia gwau: “Ena be lau ese gaukara dekenai nega bada lau haorea, to Kim be ia maumau lasi.” Steve be dahaka ia karaia unai ia hanaia totona? Ia gwau: “Lau guriguri bona unai lau laloa namonamo murinai, egu lalona lau hadaia elda orea ena kodineita ena maduna do lau rakatania. Elda gaukara lau do karaia noho, to ma haida dekenai kongrigeisen gaukara haida lau haria neganai, nega ia noho egu adavana lau durua bona naria totona.”

Daudau lasi murinai, Kim ena tauanina ia goada lou. Steve bona Kim be edia mauri dalana idia laloa namonamo guna, bona Kim ena heduru dainai, Steve be kongrigeisen ai ena maduna ma haida ia abia lou. Steve ia gwau: “Kim ena gorere dainai iena goada hegeregerena ai emai hesiai gaukara ai karaia. Lau be Iehova lau tanikiu henia ena heduru dainai bona egu adavana lau tanikiu henia danu badina ena be mai ena gorere to lau ia durua bona ia maumau lasi.”

Loaloa naria tauna, Jerry, bona ena adavana, Maria edia ekspiriens mani oi laloa. Idia be do idia karaia gaudia haida idia haidaua unai amo edia tama sina burukadia idia naria diba. Maria ia gwau: “Lau bona egu adavana be ai ura bada tano ma ta ai misinari gaukara ai karaia. To, Jerry ena tama sina idia ura ta ese idia do ia naria bona Jerry be edia natuna tamona sibona. Unai dainai, emai lalona ai hadaia Ireland dekenai do ai noho bona idia do ai naria. Unai bamona ai karaia dainai, Jerry ena tamana be hospital ai ia noho neganai, ai be ia ida ai noho ela bona ia mase. Hari, dina ta ta ai Jerry ena sinana ida telefon amo ai herevahereva, bona ia ai durua diba. Jerry ena sinana ena kongrigeisen tadikaka taihu be ai idia durua, unai amo ai be sekit gaukara ai karaia noho diba.”

Ma Haida Idia Heduru Dalana

Paulo ese kongrigeisen lalonai idia noho vabu ia herevalaia neganai, ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” Paulo be Keristani taudia ia hamaoroa, bema idia ura Dirava ese edia kara ia moalelaia, idia ese edia buruka tama sina bona tubudia be moni dalanai bona tauanina dalanai idia durudia be namo. (1 Tim. 5:​4, 8) To, kongrigeisen ai tadikaka taihu ma haida ese heduru idia henia diba.

Sweden ai ia noho tau buruka ta, Hakan bona ena adavana Inger mani oi laloa. Hakan ia gwau: “Doketa idia gwau egu adavana be kensa gorere ia abia neganai, ai ruaosi ai hoa bada, badina Inger be ia goada bona ia gorere momo lasi. To, unai nega amo ai be dina iboudiai heduru totona hospital dekenai ai lao, bona ia abia muramura dainai Inger ena tauanina ia manoka. Unai nega ai Inger be ruma sibona dekenai ia noho, bona lau be ia lau naria.” Edia kongrigeisen tadikaka taihu ese edena dala ai Hakan bona Inger idia durua?

Kongrigeisen elda taudia be dala idia karaia unai amo idia ruaosi ese telefon amo Keristani heboudia idia kamonai diba. Danu, tadikaka bona taihu ese idia vadivadi henidia bona telefon amo idia rini henidia. Bona idia dekenai revareva bona kadi idia siaia danu. Hakan ia gwau: “Tadikaka taihu edia heduru bona Iehova ena heduru ai mamia momokani. Unai ese emai abidadama ia hagoadaia bada. Ai moale, badina Inger be ena gorere amo ia namo, bona Keristani heboudia totona Kingdom Hall dekenai ai lao.” Bema kongrigeisen taudia be gorere bona buruka taudia idia durua totona gau haida idia karaia, unai amo idia hamomokania idia ese edia ‘turana idia lalokau henia noho nega ibounai, bona nega dika ia vara neganai, idia ese edia lalokau idia hahedinaraia noho.’​​—Aon. 17:17.

Iehova be Emu Hekwarahi Ia Laloa Bada

Gorere tauna ta oi naria neganai, emu tauanina ia hesiku bada diba. To, King Davida ia gwau: “Ogogami taudia [“dabu tauna,” NW ] ia laloa tauna be namo.” Gorere o hisihisi ia davaria tauna be “Lohiabada ese ia do ia durua.”​​—Sal. 41:1.

Dahaka dainai gorere taudia idia naria taudia idia moale diba? Aonega Herevadia 19:17 ia gwau: “Ogogami taudia [“dabu tauna,” NW ] dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” Dirava idia hesiai henia taudia idia gorere neganai, idia ia laloa bada, bona unai gorere tauna ia naria tauna ia hanamoa danu. Salamo torea tauna, Davida ia gwau: “Bona unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Sal. 41:3) Ita diba momokani bema gorere tauna ia naria tauna be hekwakwanai ta ia davaria, Iehova ese ia do ia durua.

Ita moale badina iseda ruma bese tauna ta ia gorere bona ita naria neganai, Iehova ese iseda hekwarahi ia itaia bona ita do ia hanamoa! Momokani, ena be gorere taudia naria totona ita hekwarahi bada, to Baibel ese ita ia hadibaia “inai bamona karadia be boubou gaudia bamona, Dirava ese ia moalelaia gaudia.”​​—Heb. 13:16.

[Footnote]

[Pictures on page 18]

Emu abidadama ai oi goada noho bona haida edia heduru oi abia dae