Dagedage Idia Davaria Hahine Ia Durua Pepapepa

Atai herevana be jw.org ena atikol ta ladana, “Hahine Edia Seifti—Baibel Ena Lalohadai” amo. Unai atikol ena dokonai ia noho link amo PDF kopi oi daunload diba. Bona unai kopi oi printaia bona kahana 4 ai oi kumia diba. United States ai ia noho taihu ta ladana Stacy ia gwau: “Kopi haida lau printaia, bona gabeai lau bona taihu ta ese dagedage karadia idia davaria hahine taudia idia noho gabuna dekenai ai abia lao.”

Unai gabu ai ia gaukara tauna ta be kopi haida totona ia noinoi, unai amo unuseni idia noho hahine dekenai ia hariharilaia diba. Unai dainai, unai taihu rua ese unai pepapepa ibounai 40 bona jw.org ena kontek kadi ibounai 30 idia hariharilaia. Nega ta idia vadivadi lou neganai, unai gabu ena administreita tauna ia ura, unuseni idia noho taudia totona Baibel stadi dalana do idia haheitalaia.

Stacy bona taihu ma rua be dagedage karadia idia davaria hahine taudia idia noho gabuna ma ta dekenai unai pepapepa ena kopi 5 idia hariharilaia, bona haida be unai pepapepa totona idia noinoi. Gaukara tauna ta ia gwau: “Inai pepapepa ese iniseni idia noho hahine taudia do ia durua.” Ma ia gwau: “Inai pepapepa ai ura henia.” Nega ma ta idia vadivadi lou neganai, haida idia ura Baibel stadilaia dalana idia itaia, bona hahine rua be idia ura unai wiken ai Kingdom Hall ena hebou dekenai idia lao.

Stacy ia gwau: “Ai moale bada badina momo ese mai moale ida inai pepapepa idia abia. Unai pepapepa oi printaia bona oi lokua neganai, ena toana be namo herea, bona ia be dala namona idia dekenai Basileia ena sivarai harorolaia totona. Momo ese unai pepapepa idia abia dae dainai, unai ese emai lalona ia hamoalea bada, bona dagedage idia davaria hahine taudia dekenai sivarai namona ai herevalaia neganai, ai ura Iehova ese emai hekwarahi do ia hanamoa dalana ai itaia.”