Nonb
34 Annapre, Jewova pale ak Moyiz, li di l: 2 “Men lòd pou w bay Izrayelit yo: ‘Lè nou antre nan peyi Kanaran+, peyi nou pral genyen kòm eritaj la, men fwontyè ki pral limit peyi a+.
3 “‘Nan direksyon sid, limit nou ap soti depi nan Dezè Zin, pase tou long bò peyi Edòm. Pati sid fwontyè nou an ap soti depi nan dènye pwent Lanmè Sale*, nan direksyon lès+. 4 Fwontyè a ap vire pase bò pant Akrabim nan+, nan sid, l ap kontinye pou l rive nan Dezè Zin, e dènye pwent li ap nan sid Kadèsbaneya+. Apre sa, l ap pwolonje rive Azarada+ e l ap kontinye pou l rive Azmon. 5 Fwontyè a ap vire bò Azmon pou l pase nan Ravin Ejip, e dènye pwent li ap rive bò Gwo Lanmè a*+.
6 “‘Fwontyè nou nan direksyon lwès ap rive arebò Gwo Lanmè a*. Se sa k ap fwontyè nou nan direksyon lwès+.
7 “‘Men fwontyè nou nan direksyon nò: N ap trase fwontyè nou an soti bò Gwo Lanmè a* rive nan Mòn Ò. 8 Detan Mòn Ò, n ap trase fwontyè a rive jis Lebowamat*+, e dènye limit fwontyè a ap rive Zedad+. 9 Epi, fwontyè a ap pwolonje rive Zifwon, e dènye limit li ap rive Azarenon+. Se sa k ap fwontyè nou nan direksyon nò.
10 “‘Apre sa, nou dwe trase fwontyè nou nan direksyon lès soti Azarenon pou rive Chefam. 11 Detan Chefam, fwontyè a ap kontinye rive Ribla, jis nan lès Ayin, e l ap desann pou l pase sou pant ki bay sou bò lès Lanmè Kinerèt*+. 12 Fwontyè a ap kontinye pou l rive nan zòn Jouden an, e dènye limit li se pral Lanmè Sale+. Se peyi sa a+ k ap pou nou ak fwontyè ki antoure l yo.’”
13 Epi, men lòd Moyiz te bay Izrayelit yo: “Se peyi sa a nou pral fè tiraj osò pou nou separe kòm eritaj nou an+, jan Jewova te bay lòd pou yo separe l bay nèf tribi yo ak mwatye nan tribi Manase a. 14 Paske tribi ki gen desandan Ribenn yo, selon fanmi kote yo soti, ak tribi ki gen desandan Gad yo, selon fanmi kote yo soti, ansanm ak lòt mwatye nan tribi Manase a deja gen eritaj pa yo+. 15 De tribi edmi sa yo deja gen eritaj pa yo nan lès zòn Jouden an, toupre Jeriko, nan direksyon solèy leve+.”
16 Apre sa, Jewova di Moyiz: 17 “Men non moun ki pral separe peyi a pou ban nou eritaj pa nou: Eleyaza+, prèt la, ak Jozye+, pitit gason Noun. 18 E n ap chwazi yon chèf nan chak tribi pou separe peyi nou pral gen kòm eritaj la+. 19 Men non mesye n ap chwazi yo: Nan tribi Jida+, n ap pran Kalèb+, pitit gason Jefoune. 20 Nan tribi ki gen desandan Simeyon yo+, n ap pran Chemouwèl, pitit gason Amiyoud. 21 Nan tribi Benjamen+, n ap pran Elidad, pitit gason Kislon. 22 Nan tribi ki gen desandan Dann yo+, n ap pran Bouki, pitit gason Jogli. 23 Nan desandan Jozèf yo+, nan tribi ki gen desandan Manase yo+, n ap pran Aniyèl, pitit gason Efòd. 24 Nan tribi ki gen desandan Efrayim yo+, n ap pran Kemouwèl, pitit gason Chiftan. 25 Nan tribi ki gen desandan Zabilon yo+, n ap pran Elizafan, pitit gason Panak. 26 Nan tribi ki gen desandan Isaka yo+, n ap pran Paltyèl, pitit gason Azan. 27 Nan tribi ki gen desandan Achè yo+, n ap pran Ayiyoud, pitit gason Chelomi. 28 Nan tribi ki gen desandan Neftali yo+, n ap pran Pedayèl, pitit gason Amiyoud.” 29 Se moun sa yo Jewova te bay lòd pou separe tè a bay Izrayelit yo nan peyi Kanaran+.