Nonb
36 Chèf fanmi pami desandan Galaad yo ki soti nan fanmi pitit gason Jozèf yo te vin pale ak Moyiz ak chèf yo ki chèf fanmi pami Izrayelit yo. Galaad se te pitit gason Maki+ ki te pitit gason Manase. 2 Men sa yo te di: “Jewova te bay ou menm, mèt nou an, lòd pou w fè tiraj osò pou w ka separe peyi a+ bay Izrayelit yo kòm eritaj. Epi, ou menm, mèt nou an, ou te resevwa lòd nan men Jewova pou w bay pitit fi Selofeyad yo, frè nou an, eritaj papa yo a+. 3 Si medam yo marye ak gason ki nan yon lòt tribi ann Izrayèl, eritaj yo a ap soti nan eritaj zansèt nou yo pou l al nan eritaj tribi y al ladan l lan. Konsa, se nan eritaj pa nou an pòsyon pa yo a ap soti. 4 Lè lè a rive pou pèp Izrayèl la fete ane Liberasyon an+, eritaj medam yo t ap vin fè pati eritaj tribi y al ladan l lan, konsa eritaj yo a t ap soti nan eritaj tribi zansèt nou yo.”
5 Annapre, Moyiz bay Izrayelit yo lòd Jewova te ba li a, li di yo: “Sa moun nan tribi ki gen desandan Jozèf yo di a se sa. 6 Men lòd Jewova bay konsènan pitit fi Selofeyad yo: ‘Yo ka marye ak moun yo vle. Men, yo dwe marye ak moun nan fanmi ki nan menm tribi ak papa yo. 7 Okenn nan eritaj Izrayelit yo pa dwe sot nan yon tribi al nan yon lòt, paske Izrayelit yo dwe kenbe eritaj ki pou tribi zansèt yo. 8 Epi, tout pitit fi ki gen yon eritaj nan tribi ki ann Izrayèl yo dwe marye ak yon gason ki soti nan tribi papa l+, yon fason pou Izrayelit yo ka konsève eritaj zansèt yo. 9 Okenn nan eritaj Izrayelit yo pa dwe sot nan yon tribi al nan yon lòt, paske chak tribi ann Izrayèl dwe konsève eritaj li genyen an.’”
10 Pitit fi Selofeyad yo te suiv egzakteman lòd Jewova te bay Moyiz la+. 11 Konsa, Mala, Titsa, Ogla, Milka ak Nowa, pitit fi Selofeyad yo+, te marye ak pitit gason frè papa yo. 12 Yo te vin marye ak gason ki soti nan fanmi Manase, pitit gason Jozèf. Konsa, eritaj yo a te rete nan tribi fanmi papa yo.
13 Se kòmandman sa yo ak lwa sa yo Jewova te bay Moyiz pou l bay Izrayelit yo nan plèn Mowab yo ki tankou dezè, nan zòn Jouden an, toupre Jeriko+.