FASON W KA JWENN SOULAJMAN ANBA STRÈS

Ki sa strès ye?

Strès se fason kò w reyaji devan yon sitiyasyon difisil. Sèvo w lakòz òmòn anvayi sistèm ou. Sa fè kè w bat pi fò, li monte tansyon w, li fè souf ou wo e li fè mis nan kò w yo vin konsantre. Anvan w rann ou kont de sa k ap pase a, kò w gentan pare pou l reyaji. Lè moman strès la pase, kò w retounen nan nòmal li.

BON STRÈS AK MOVE STRÈS

Strès se yon reyaksyon natirèl ki fè w kapab fè fas ak sitiyasyon difisil oswa danjere. Se nan sèvo w reyaksyon an kòmanse. Bon strès la fè w kapab aji oubyen reyaji byen vit. Yon ti kantite strès kapab ede w tou pou w atenn yon objektif oubyen pou w fè pi byen, petèt pandan yon egzamen, lè w ap pase entèvyou pou yon travay oubyen pandan yon evènman spòtif.

Sepandan, lè w toujou anba gwo strès, sa ka fè w ditò. Lè kò w toujou sou tansyon, sa ka fè w soufri nan domèn fizik, afektif ak nan domèn mantal. Fason w aji, sa gen ladan l fason w trete lòt moun, kapab chanje. Lè w toujou anba strès, sa ka fè w lage kò w nan yon seri vye abitid ki pa bon pou sante w, tankou pran dwòg. Sa ka menm fè w fè depresyon, ou ka santi w about nan travay ou, e sa ka fè w gen ide touye tèt ou.

Menmsi strès gendwa pa afekte tout moun menm jan, li ka lakòz yon pakèt kalite maladi. E li ka gen efè sou prèske tout pati ki nan kò w.

FASON STRÈS KA GEN EFÈ SOU KÒ W

Sistèm ki konekte ak sèvo nou an.

Sistèm ki konekte ak sèvo a lakòz yon seri òmòn tankou adrenalin ak kòtizòl vin libere. Yo fè kè w bat pi fò, yo monte tansyon w ak nivo sik ki nan san w. Tout sa fè w kapab reyaji byen vit lè w devan danje. Twòp strès ka

fè w fè kòlè, ba w enkyetid, fè w fè depresyon, ba w maltèt, mank somèy.

Sistèm ki kontwole mis nan kò nou yo.

Lè mis nan kò w yo konsantre, sa anpeche w pran yon chòk. Twòp strès ka

fè kò w fè w mal e ba w doulè, ba w maltèt, ba w kranp.

Sistèm ki pèmèt nou respire.

Ou respire pi fò pou w ka pran plis oksijèn. Twòp strès ka

fè w respire twò vit e fè w gen souf kout, fè moun ki gen tandans panike yo enkyete yo twòp.

Sistèm ki pèmèt san sikile nan kò nou.

Pou kè w voye san nan tout kò w, li bat pi fò e l fè plis efò. Gen veso nan kò w ki pote san ki vin lache oswa ki vin ratresi, sa fè san an ale kote kò a plis bezwen l, tankou nan mis nan kò nou yo. Twòp strès ka

fè tansyon w monte, fè w fè kriz kadyak, fè w fè stwok.

Sistèm glann andokrin nou yo.

Glann ki nan kò w yo pwodwi òmòn ki rele adrenalin ak òmòn ki rele kòtisòl, sa ki ede kò a reyaji devan strès. Fwa w monte nivo sik ki nan san w pou ba w plis enèji. Twòp strès ka

ba w maladi sik, fè sistèm defans ou vin pi fèb e fè w malad pi souvan, chanje fason w reyaji tanzantan, fè w pran pwa.

Sistèm ki pèmèt nou dijere manje.

Vin gen dezòd nan fason kò w dijere manje. Twòp strès ka

ba w kè plen, fè w vomi, ba w dyare, fè w konstipe.

Sistèm ki pèmèt nou fè pitit.

Strès ka gen efè sou dezi seksyèl yon moun. Twòp strès ka

fè yon gason vin mòlòlò, fè yon fi pa gen règ li nòmalman.