Jeremi pa t sispann pale de Jewova

Pafwa, gen moun ki konn pran plezi sou nou oswa ki konn fache kont nou paske n ap pale de Jewova. Sa ka fè nou anvi sispann pale de Bondye. Èske w konn santi w konsa? — Bib la fè konnen gen yon jèn gason ki te renmen Jewova, men ki te prèske sispann pale de li. Non jèn gason sa a se te Jeremi. Ann aprann plis bagay sou li.

Lè Jeremi te jèn gason, Jewova te di l pou l avèti pèp la pou yo sispann fè sa ki mal. Sa te difisil anpil pou Jeremi, e li te pè. Li te di Jewova: ‘Mwen pa konn sa pou m di. Se yon timoun mwen ye.’ Sepandan, Jewova te reponn li: ‘Ou pa bezwen pè. M ap ede w.’

Kidonk, Jeremi te kòmanse fè pèp la konnen Jewova t ap pini yo si yo pa chanje. Èske w panse pèp la te fè sa Jeremi te di yo a? — Non. Yo te fawouche l e yo te fache kont li. Gen kèk moun ki te menm vle touye l! Ki jan w panse Jeremi te santi l? — Li te vin pè anpil, e l te di: ‘Mwen pap janm pale de Jewova ankò.’ Men, èske l te sispann pale de Jewova vre? — Non, li pa t fè sa. Li te tèlman renmen Jewova li pa t ka sispann pale de li. Piske Jeremi pa t abandone, Jewova te sove lavi l.

Pa egzanp, yon lè, gen kèk move moun ki te lage Jeremi nan yon pi ki chaje ak labou. Jeremi pa t jwenn ni manje ni dlo nan pi a. Mesye sa yo te vle kite Jeremi nan pi a pou l ka mouri. Men, grasa èd Jewova, Jeremi te chape!

Ki sa w ka aprann nan egzanp Jeremi? — Byenke li te pè pafwa, li pa t sispann pale de Jewova. Lè w ap pale de Jewova, gen moun ki kapab pran plezi sou ou oswa ki kapab fache kont ou. Ou ka santi w jennen oswa ou ka menm pè. Sepandan, pa janm sispann pale de Jewova. L ap toujou ede w menm jan l te ede Jeremi.