SEKSYON 1
Bondye ka fè w gen kè kontan nan maryaj ou
“Sila a ki te kreye yo depi nan kòmansman an te fè yo gason ak fi.” — Matye 19:4.
Se Jewovaa Dye ki te fè premye maryaj la. Bib la di nou apre l fin kreye premye fi a, li “mennen l bay gason an”. Adan te tèlman kontan lè sa a, li te di: “Sa se zo ki soti nan zo mwen e se chè ki soti nan chè mwen.” (Jenèz 2:22, 23). Jewova toujou vle pou moun ki marye yo gen kè kontan.
Lè w marye, ou gendwa panse tout bagay pral mache byen pou ou. Sepandan, li bon pou w konnen menm mari ak madanm ki renmen youn lòt toutbon yo ap jwenn kèk pwoblèm kanmenm nan maryaj yo (1 Korentyen 7:28). Nan bwochi sa a, ou pral jwenn kèk prensip Bib la bay, si w aplike yo, ki kapab fè w gen kè kontan ni nan maryaj ou ni nan fanmi w. — Sòm 19:8-11.
1 AKSEPTE WÒL JEWOVA BA W LA
MEN SA BIB LA DI: Mari a se chèf fanmi an. — Efezyen 5:23.
Si w se yon mari, Jewova atann pou w pran swen madanm ou avèk tandrès (1 Pyè 3:7). Li kreye madanm ou kòm yon konpay pou ou, e l vle pou w trete madanm ou avèk respè ak lanmou (Jenèz 2:18). Ou dwe renmen madanm ou opwen pou w dispoze met enterè pa l anvan enterè pa w. — Efezyen 5:25-29.
Si w se yon madanm, Jewova atann pou w demontre gwo respè pou mari w epi pou w ede l ranpli wòl Jewova ba li a (1 Korentyen 11:3; Efezyen 5:33). Ou dwe soutni desizyon l pran yo, epi w dwe kolabore avè l ak tout kè w (Kolosyen 3:18). Lè w fè sa, w ap bèl nan je mari w, e w ap bèl nan je Jewova tou. — 1 Pyè 3:1-6.
SA W KA FÈ:
Mande moun ou marye avè l la ki sa w ka fè pou w vin yon pi bon mari oswa yon pi bon madanm. Koute l avèk atansyon, epi fè sa w kapab pou w pote amelyorasyon.
Montre w pasyan. Sa ap pran tan pou nou toule de aprann kòman pou n fè kè youn lòt kontan.
2 KONPRANN SANTIMAN MOUN OU MARYE AVÈ L LA
MEN SA BIB LA DI: Chèche enterè moun ou marye avè l la (Filipyen 2:3, 4). Bay moun ou marye avè l la anpil valè. Pa bliye, Jewova mande sèvitè l yo pou yo “dou ak tout moun”. (2 Timote 2:24.) Bib la di: “Pawòl moun di san reflechi tankou kout epe. Men, lang moun ki gen sajès la geri moun.” Kidonk, ou bezwen byen chwazi mo w ap itilize yo (Pwovèb 12:18). Lespri sen Jewova ap ede w pale ak tandrès ak lanmou. — Galat 5:22, 23; Kolosyen 4:6.
SA W KA FÈ:
Priye Jewova pou w rete kalm epi pou w kenbe yon bon etadespri anvan w pale sou kesyon enpòtan yo ak moun ou marye avè l la.
Byen reflechi ak sa w pral di a ansanm ak fason w pral di l la.
3 PRAN DESIZYON A DE
MEN SA BIB LA DI: Lè w marye, ou vin fè “yon sèl chè” ak moun ou marye avè l la (Matye 19:5). Sepandan, nou chak gen pèsonalite pa nou, epi n gendwa pa gen menm opinyon. Kidonk, nou bezwen chèche gen menm panse ak menm santiman (Filipyen 2:2). Li enpòtan anpil tou pou n met tèt nou ansanm lè n ap pran desizyon. Bib la di: “Kote ki gen dyalòg, plan yo ap mache.” (Pwovèb 20:18). Se pou prensip ki nan Bib la gide nou toutpandan n ap pran desizyon ki enpòtan yo ansanm! — Pwovèb 8:32, 33.
SA W KA FÈ:
Pa annik fè moun ou marye avè l la konnen sa w panse, men, fè l konnen sa w santi tou.
Pale ak moun ou marye avè l la anvan w deside fè yon bagay.
a Jewova se non Bondye jan Bib la fè konn sa.