Ki kalite enstriksyon k ap pèmèt ou reyisi nan lavi w ?

ÈSKE sa deja rive w, pwoblèm tèlman anvayi w, ou santi w tankou yon moun yon antonwa ap rale ? Jis imajine ki valè soufrans sa ta ka lakòz si w ta fè yon erè lè w ap fè fas ak youn oubyen ak plizyè nan pwoblèm sa yo ! Pa gen pèsonn ki fèt ak kapasite pou l reyisi rezoud tout kalite pwoblèm, pou l toujou pran bon desizyon. Se la a enstriksyon vin nesesè. Men, ki kote w ka jwenn enstriksyon k ap prepare w pou w fè fas ak pwoblèm ki gen nan lavi a ?

Anpil moun, kit yo jèn, kit yo granmoun, ap fè elòj pou enpòtans enstriksyon moun resevwa lekòl genyen. Gen kèk espè ki menm di “ yo konvenki yon moun pap janm kapab jwenn yon bon djòb si li pa gen yon diplòm inivèsitè ”. Sepandan, gen anpil bezwen lèzòm genyen, sa yon moun reyalize nan domèn materyèl pa ka konble yo. Pa egzanp, èske gwo etid ka ede w vin yon bon paran, yon bon konjwen, oubyen yon bon zanmi ? Vrèmanvre, moun yo admire pou sa yo reyalize nan domèn entèlektyèl kapab vin devlope yon move pèsonalite, yo kapab echwe nan lavi fanmi yo, oubyen yo kapab menm touye tèt yo finalman.

Gen kèk lòt moun ki konsidere relijyon tankou yon gid, yon sous enstriksyon, men yo vin desi paske yo pa jwenn èd pratik pou yo fè fas ak difikilte ki gen nan lavi a. Pou nou montre sa, n ap pran egzanp Emiliaa k ap viv nan peyi Meksik. Men sa li di : “ Sa gen 15 an, mwen te santi mwen menm ak mari m, nou te tou senpleman pa t ka viv ansanm ankò. Nou te toujou nan diskisyon. Mwen pa t ka fè l sispann bwè. Souvan, mwen te konn oblije kite timoun nou yo poukont yo, aktout yo piti, pou m al chèche kot mari m ye. Nan domèn afektif, mwen te santi m about. Plizyè fwa, mwen te konn al legliz pou m al chèche yon bagay ki t ap ka ede m jwenn yon solisyon. Byenke yo te konn itilize Labib pafwa, mwen pa t janm tande okenn konsèy ki te gen rapò dirèkteman ak sitiyasyon pa m nan, e pa t gen pèsonn nonplis ki te pwoche bò kote m pou yo di m ki sa pou mwen fè. Sèlman chita nan legliz la pandan yon moman epi repete kèk priyè pa t satisfè m. ” Gen lòt moun ki santi yo desi lè yo wè nan ki pwen chèf relijye ki la pou gide yo ap mennen yon vi ki pa egzanplè ditou. Sa vin fè anpil moun pèdi konfyans nan relijyon antanke sous fòmasyon oswa sous enstriksyon ki ka pèmèt moun reyisi nan lavi yo.

Pakonsekan, ou ka ap mande tèt ou : ‘ Ki kalite enstriksyon mwen ta dwe resevwa pou m ka reyisi nan lavi m ? ’ Èske vrè krisyanis la gen repons kesyon enpòtan sa a ? Se sa nou pral egzamine nan atik ki vin apre a.

[Nòt anba paj]