‘Lè a’ prèske rive
DISIP Jezi yo te swaf pou yo wè soufrans fini, menm jan ak pwofèt Abakouk. Lè yo te aprann sa Wayòm Bondye a t apral fè pou l ranje bagay yo sou tè a, men ki kesyon yo te poze Jezi: “Ki lè bagay sa yo ap fèt, e ki siy k ap siy prezans ou [antanke Wa nan Wayòm nan] e k ap siy fen sistèm nan?” (Matye 24:3, NW). Lè Jezi t ap reponn yo, li te fè yo konnen se sèl Jewova Dye ki konnen ki lè egzakteman Wayòm nan ap pran kontwòl latè nèt (Matye 24:36; Mak 13:32). Sepandan, Jezi ak kèk lòt moun nan Bib la te anonse kèk bagay ki t ap rive sou tè a ki t ap montre tan fikse a pa lwen. —Gade kare ki adwat la.
Èske w pa remake se bagay sa yo menm k ap rive jodi a? Mete sou sa, Jezi te anonse t ap gen yon travay ansèyman ki t ap gen pou fèt sou tout tè a. Men sa l te di: “Bon nouvèl wayòm sa a ap preche nan lemonn antye pou li sèvi kòm temwayaj bay tout nasyon. Epi, apre sa, lafen an ap rive.” —Matye 24:14, Bib Kreyòl La.
Se egzakteman travay sa a Temwen Jewova yo ap fè jodi a. Gen plis pase sèt milyon Temwen, ki gaye nan anviwon 236 peyi, k ap anonse sa Wayòm nan pral fè e k ap ede moun suiv prensip jis Bondye yo. Volonte Bondye se efase tout soufrans ak tout doulè. Si w kontinye aprann plis toujou sou Wayòm Bondye a, w ap gen esperans pou w viv pou toutan nan yon monn ki pa gen soufrans.
[Kare nan paj 8]
Vèsè ki montre n ap viv nan dènye jou yo
• Lagè fèt nan yon nivo sa pa t janm fèt anvan.
• Gwo tranblemanntè.
• Rate manje.
• Epidemi mòtèl.
• Mechanste gaye toupatou.
• Lanmou moun yo genyen youn pou lòt rafredi.
• Moun yo ap detwi tè a.
• Yo renmen lajan anpil.
• Yo dezobeyi paran yo.
• Yo renmen tèt yo depase limit.
• Yo pa gen lanmou pou pwochen yo.
• Yo pa dispoze antann yo.
• Yo san kontwòl, e sa rive nan kèlkeswa kouch sosyete a.
• Yo pa vle wè sa ki byen.
• Yo pito plezi olye yo renmen Bondye.
• Anpil nan yo pretann yo se kretyen yon fason ipokrit.
• Gen anpil fo pwofèt.
• Yo pèsekite vrè kretyen yo.
• Moun yo pa koute avètisman Bib la bay yo.
[Foto nan paj 8]
Temwen Jewova yo ap anseye moun konsènan Wayòm Bondye a sou tout tè a.