Poukisa Bondye kite moun ki fò toupizi moun ki fèb?

Nan Bib la, nou jwenn kèk egzanp ki bay kè kase kote moun ki fò ap toupizi moun ki fèb. Youn nan egzanp ki vin nan lespri n se Nabòta. Ahab, yon wa ann Izrayèl nan dizyèm syèk anvan epòk nou an, te kite Jezabèl, madanm li, touye Nabòt ansanm ak pitit gason l yo pou l te ka pran jaden rezen mesye a (1 Wa 21:1-16; 2 Wa 9:26). Poukisa Bondye te kite yon abi konsa fèt?

Ann egzamine youn nan rezon enpòtan yo: Bondye pa ka bay manti (Tit 1:2). Ki rapò sa genyen ak zak mechanste yo? Byen bonè nan istwa lèzòm, Bondye te fè yo konnen si yo rebele kont li sa t ap pote move konsekans pou yo, sa vle di, yo t ap mouri. Jan Bondye te fè konn sa, depi lè lèzòm te rebele nan jaden Edenn nan, li vin posib pou moun mouri. Anfèt, premye moun ki te mouri a se yon zak maspinay yo te fè sou li. Sa te rive lè Kayen te touye Abèl, frè l la. — Jenèz 2:16, 17; 4:8.

Men kòman Pawòl Bondye a rezime istwa lèzòm depi lè sa a: “Moun ap [domine] sou moun pou fè yo soufri.” ​(Eklezyas 8:9). Èske pawòl sa yo se laverite? Jewova te avèti nasyon Izrayèl, pèp li a, wa yo t ap genyen yo t ap toupizi yo e sa t ap lakòz pèp la vin kriye devan l (1 Samyèl 8:11-18). Menm wa Salomon te fè pèp la peye taks yon fason egzajere (1 Wa 11:43; 12:3, 4). Gen kèk wa mechan tankou Ahab ki te aji pi di ak pèp la toujou. Fè yon ti reflechi: Si Bondye te anpeche tout zak maspinay sa yo fèt, an reyalite, èske l pa t ap kontredi tèt li?

Sonje tou, Satan te fè konnen se pou rezon egoyis sèlman lèzòm ap sèvi Bondye (Jòb 1:9, 10; 2:4). Si Bondye te pwoteje sèvitè l yo kont tout fòm dominasyon, èske sa pa t ap montre Satan gen rezon? Mete sou sa, si Bondye te anpeche kèlkeswa moun nan sibi zak maspinay, èske li pa t ap bay yon pi gwo manti? Si Bondye ta bay moun yon pwoteksyon konsa, anpil moun te ka panse lèzòm kapab dirije tèt yo byen san Bondye. Sepandan, se pa sa Pawòl Bondye a di. Bib la fè konnen lèzòm pa gen kapasite pou yo dirije tèt yo poukont yo (Jeremi 10:23). Nou bezwen Wayòm Bondye a vini, se sèlman lè sa a tout enjistis ap fini.

Men, èske sa vle di Bondye pa fè anyen kont enjistis? Non. Ann konsidere de bagay li fè: Premyèman, Pawòl li a montre aklè li kont enjistis. Pa egzanp, nan Bib la, nou jwenn tout ti detay konsènan konplo Jezabèl te fè kont Nabòt la. Pi devan, Bib la montre gen yon dirijan ki pisan anpil k ap chèche kache idantite l ki dèyè move aksyon sa yo (Jan 14:30; 2 Korentyen 11:14). Bib la fè konnen dirijan sa a se Satan Ledyab. Lefètke Bib la montre aklè kote mechanste ak enjistis soti, sa vle di Bondye ede n pou n pa tonbe nan fè mechanste. Konsa, li pwoteje avni etènèl nou.

Dezyèmman, Bondye ban nou bonjan espwa li pral mete fen nan enjistis. Fason li te devwale Ahab ak Jezabèl, fason l te jije yo e li te pini yo, menm jan l te fè nan ka anpil lòt moun ki te mal aji, fè n gen konfyans nan pwomès li fè pou l pini tout mechan yon jou (Sòm 52:1-5). Anplis de sa, Bondye ban nou bonjan espwa, talè konsa, li pral chanje move konsekans mechanste lakòz pou moun ki renmen l yob. Lè sa a, Nabòt, yon moun ki te fidèl, ansanm ak pitit gason l yo, pral viv pou toutan nan yon paradi sou tè a kote pap janm gen enjistis. — Sòm 37:34.