SIJÈ KI SOU PAJ KOUVÈTI A | KIYÈS TEMWEN JEWOVA YO YE?
Ki kote nou jwenn kòb pou nou fè travay n ap fè a?
Chak ane, nou enprime e nou distribye plizyè santèn milyon bib ak lòt piblikasyon. Nou bati biwo filyal ak enprimri anpil kote sou tè a. Nou gen plizyè dizèn milye kongregasyon ki reyini nan lokal nou rele Sal Wayòm, ki byen senp men ki bèl, kote nou adore Bondye. Men, ki kote nou jwenn kòb pou n fè tout bagay sa yo?
Se grasa ofrann volontè sèlman nou jwenn kòb pou n fè travay n ap fè a (2 Korentyen 9:7). An 1879, dezyèm Toudegad ki te parèt la te di: “Nou kwè se JEWOVA k ap soutni Toudegad Siyon an (anglè) [se konsa yo te rele peryodik sa a nan epòk sa a], e toutotan se konsa sa ye, peryodik sa a pap janm mande lèzòm èd pou soutni l.” Se sa nou panse jodi a tou.
Moun k ap fè ofrann yo voye ofrann yo dirèkteman nan biwo filyal la oubyen yo mete yo nan bwat ofrann ki nan Sal Wayòm nan. Men, nou pa janm mande ladim, nou pa janm fè lakòlèt, e nou pa janm mande kòb ni pou travay n ap fè a ni pou piblikasyon nou yo. Yo pa peye nou pou nou preche, ni pou nou anseye anndan kongregasyon yo, ni pou nou bati kote nou itilize pou nou adore yo. Jezi te di: “Se gratis nou te resevwa, se gratis pou nou bay.” (Matye 10:8). Pa gen pèsonn pami Temwen Jewova yo ki touche pou travay l ap fè a, kit se moun k ap travay nan biwo filyal nou yo, kit se moun k ap travay nan syèj mondyal nou an, kit se moun ki fè pati Kolèj santral Temwen Jewova yo, anpalan de gwoup moun k ap dirije travay y ap fè a.
“Pou Temwen Jewova yo finanse aktivite y ap fè, se chak moun ki bay kòb volontèman, ki deside konbyen y ap bay e chak ki lè y ap bay li. Se konsa yo fè pou tout aktivite yo genyen.” — Tribinal ewopeyen pou dwa moun, 2011.
Nou sèvi ak ofrann yo tou pou nou pote sekou. Premye kretyen yo te kontan ede frè ak sè ki te gen pwoblèm (Women 15:26). Nou menm tou, nou fè sa lè nou rebati kay yo ak kote nou genyen pou n adore yo, lè nou bay manje, rad ak tretman medikal.