Èske zanj yo ka ede w?

Yon dimanch aprèmidi, Kenneth ak Filomena, k ap viv Kiraso, t al vizite yon koup marye yo t ap etidye Labib avè l.

Kenneth di: “Lè nou rive, pòt la te fèmen e machin nan pa t la. Men, gen yon bagay ki te pouse m rele sou telefòn madanm nan.”

Lè madanm nan reponn apèl la, li esplike yo mari l al travay. Men, lè l vin rann li kont Kenneth ak Filomena deyò a, li al ouvè pou yo e li fè yo antre.

Yo te ka wè sou figi l li t ap kriye. Pandan Kenneth ap priye pou l kòmanse etid la, madanm nan kòmanse kriye. Donk, avèk jantiyès, Kenneth ak Filomena mande l sa l genyen.

Madanm nan esplike yo li te sou wout touye tèt li nan menm aprèmidi sa a, e se ekri li t ap ekri yon lèt kite pou mari l lè telefòn nan te sone a. Li di yo li soufri depresyon. Yo te montre l kèk vèsè nan Bib la pou ankouraje l, e sa te sove lavi l.

Kenneth di: “Nou di Jewova mèsi paske li te pèmèt nou ede madanm sa a ki te dekouraje. E nou sitou di l mèsi paske li te pouse nou, petèt pa mwayen yon zanj oswa lespri sen l, pou nou fè apèl sa a.”a

Èske Kenneth ak Filomena gen bonjan rezon pou yo kwè se Bondye ki te pouse yo fè apèl sa a, pa mwayen yon zanj oswa lespri sen, sa vle di fòs Bondye sèvi pou l aji? Oswa, èske apèl sa a se te yon bagay ki jis rive konsa konsa?

Nou pa ka di egzakteman sa k te rive. Men, nou konnen Bondye itilize zanj li yo pou l ede moun vin zanmi l. Pa egzanp, Bib la di Bondye te sèvi ak yon zanj pou l gide Filip, yon kretyen ki t ap preche, pou l ede yon fonksyonè etyopyen ki t ap chèche direksyon nan men Bondye. — Travay 8:26-31.

Anpil relijyon ankouraje moun kwè nan kreyati espirityèl yo ki gen gwo pouvwa, e yo pale de kèk nan yo kòm kreyati ki la pou fè sèvis Bondye oswa k ap sèvi kòm anj gadyen. Anpil moun pa sèlman kwè zanj yo egziste, men yo kwè tou yo ka ede yo nan kèk domèn enpòtan. Yon lòt bò, gen yon pakèt moun ki pa kwè nan zanj ditou.

Èske zanj yo egziste vre? Si se wi, ki kote yo soti? Ki sa ki verite konsènan zanj yo? Èske zanj yo ka ede nou? Ann gade sa Bib la di.