Fason pou w fè etid w ap fè nan Bib la vin pi pwofitab e pi enteresan

Jozye k ap li Lalwa; miray Jeriko tonbe epi kay Rahab pa kraze; Jozye leve men l nan direksyon syèl la pandan l ap priye.

JOZYE te resevwa yon misyon ki te difisil anpil. Li te gen pou l fè fas ak anpil obstak lè l t ap mennen nasyon Izrayèl la nan Peyi Bondye te pwomèt la. Sepandan, Jewova te ba l asirans l ap reyisi, epi, men ki ankourajman l te ba li: ‘Mete kouraj ak kran sou ou. Suiv Lwa m bay la. Li l lajounen kou lannuit pou w ka byen suiv tout sa ki ekri ladan l. Konsa, tout sa w ap fè ap reyisi e w ap aji avèk sajès.’ — Joz. 1:7, 8.

Nan ‘tan sa yo ki di e ki difisil pou moun sipòte’, nou menm tou n ap fè fas ak anpil eprèv (2 Tim. 3:1). Menm jan ak Jozye, nou kapab reyisi lè n suiv konsèy Jewova te ba l la. Nou ka li Labib regilyèman epi n byen suiv prensip ki ladan l yo lè n jwenn eprèv.

Sepandan, anpil nan nou ap dakò nou pa pi bon etidyan ki genyen epi etidye se pa yon bagay ki fasil pou nou. Men, piske l vrèman enpòtan pou n etidye Bib la, lè n egzamine kare ki gen tit “Eseye sijesyon sa yo”, n ap jwenn kèk bon konsèy ki ka pèmèt etid n ap fè a vin pi pwofitab e pi enteresan.

Men ki sa youn nan moun ki te patisipe nan ekri sòm yo te di nan yon chante: “Dirije m pou m ka suiv kòmandman w yo, paske m pran plezi ladan yo.” (Sòm 119:35). Nou ka pran anpil plezi nan etid n ap fè nan Pawòl Bondye a. N ap jwenn anpil bèl rekonpans tank n ap fouye pou n jwenn trezò espirityèl.

Byenke w pa gen yon nasyon pou w dirije menm jan ak Jozye, ou menm tou ou gen pwoblèm pa w. Kidonk, menm jan ak Jozye, etidye sa ki te ekri yo epi obeyi yo pou w jwenn byenfè. Lè w fè sa, ou menm tou w ap reyisi e w ap aji avèk sajès.

ESEYE SIJESYON SA YO

Priye anvan w etidye. Se panse Bondye Toupisan an ki nan Bib la, e l te fè ekri yo pou byen nou. Donk, lè w ap li Bib la, mande l ede w konprann sa w li yo, pou w sonje yo e pou w aplike yo nan lavi w. — Esd. 7:10.
Poze tèt ou kesyon ki vin annapre yo pandan w ap li Bib la oswa piblikasyon ki baze sou Bib la: ‘Ki sa pasaj sa a aprann mwen sou Jewova? Ki rapò sa m li a genyen ak mesaj ki nan Pawòl li a? Ki jan m ka itilize panse sa yo pou m ede lòt moun?’
Medite sou sa w etidye a. Fè yon ti poz nan lekti w ap fè a pou w reflechi e pou w mande tèt ou: ‘Ki efè sa m li a gen sou mwen? Poukisa l fè m santi m konsa? Ki rapò l genyen ak eksperyans mwen fè yo, sitiyasyon m ye kounye a oswa sa k ka rive m alavni? Ki jan m ka aplike prensip biblik sa yo ak konsèy sa a nan lavi m?’ (Jòb 23:5; Sòm 49:3). Gade pou w wè si w ka esplike rezon ki fè Jewova te mande pèp li a pou yo evite yon seri pratik oswa ki konsekans sa t ap genyen si yo pa t fè sa l mande a. — Det. 32:28, 29.
Sèvi ak imajinasyon w lè w ap li kèk pasaj k ap dekri yon sitiyasyon. Pa egzanp, èske w ka imajine ki jan sa te ye lè frè Jozèf yo te vann li bay yon bann desandan Izmayèl (Jen. 37:18-28)? Ki sa w wè, ki sa w tande e ki sant ou pran? Mete w nan plas moun ki nan istwa a. Ak ki sa y ap panse e ki jan yo santi yo? Panse sa yo ap fè etid ou a vin pi vivan e l ap gen plis sans.
Sèvi ak zouti n genyen pou n fè etid yo yon fason pou w amelyore rechèch w ap fè. Chèche byen konnen zouti ki disponib nan lang ou pale a, kit se sa ki sou Entènèt yo kit se sa yo enprime yo. Pa pè mande lòt moun ede w konprann fason pou w byen sèvi avèk yo. Pa egzanp, Gid pou Temwen Jewova yo fè rechèch la ap ede w jwenn sa yo te ekri sou anpil sijè e l ap ede w jwenn esplikasyon sou anpil vèsè nan Bib la. Sèvi ak apendis ki nan Labib — Tradiksyon monn nouvo a si l disponib nan yon lang ou konnen. Nan apendis sa yo, n ap jwenn enfòmasyon k ap itil nou sou jeyografi, kwonoloji, pèz ak mezi, elatriye.
Fè yon rezime sou pwen kle ki nan sijè a pou w ka sonje sa w fèk sot etidye a. Li toujou pi bon pou w pataje sa w aprann ak lòt moun. Èske gen yon enfòmasyon ou ka itilize nan travay predikasyon an? Nan fason sa yo, nonsèlman w ap antre pwen kle yo nan lespri w, men tou, w ap sèvi ak sa w sot etidye a pou w ede lòt moun.