Yo byen kontan !
1 Toupatou sou tè a, plizyè fanmi kretyen te byen kontan fè konnen nan ki pwen yo apresye kasèt videyo Les jeunes s’interrogent... Comment se faire de vrais amis ? Ozetazini, gen yon papa ki di, pitit gason l yo te rete bouch ouvri apre yo fin gade kasèt la. Rezon an se paske yo te santi se kòmsi se te pou yo menm menm yo te fè videyo a. Selon yon rapò ki soti Malawi, gen plizyè jèn frè, plizyè jèn sè nan peyi sa a ki santi yo menm tou, se pou yo videyo sa a fèt, paske se menm presyon an yo sibi nan lekòl yo, nan men moun ki pòy yo. Anpalan de videyo a, gen yon papa nan peyi Almay ki deklare : “ Pou mwen menm, se repons priyè m. ” Gen yon jèn demwazèl ki di konsa : “ Mèsi dèske nou fè m sonje, Jewova enterese toutbon nan mwen. ” Men ki sa yon ansyen nan peyi Nouvèl Zelann fè konnen : “ Grasa [kasèt sa a], gen youn nan jèn sè nou yo ki rekòmanse mache sou chemen lavi a ankò. ” Men remak yon dam marye fè apre l fin gade kasèt la : “ M pa konn sa m ta bay, non sèlman pou tout jèn ta gade videyo sa a, men tou pou l ta pouse yo pran pozisyon pou laverite. ” Nou menm k ap viv an fanmi, poukisa nou pa gade l ankò ? Lè nou fini, fè yon brase lide sou kesyon nou jwenn annapre yo.
2 Pou kòmanse : Ki sa yon vrè zanmi ye ? — Pwo. 18:24.
3 Baryè ki anpeche amitye devlope : Gen moun ki konn santi pyès moun pa sou bò yo. Ki jan w ka rive venk santiman sa a (Fil. 2:4) ? Poukisa ou ta dwe dispoze amelyore tanperaman w, e kiyès ki kapab ede w fè sa ? Ki okazyon ou kapab jwenn pou w fè plis zanmi ? Ki kote w ka jwenn zanmi sa yo ? — 2 Kor. 6:13.
4 Pou yon moun vin zanmi Bondye : Ki efò w ka fè pou w vin byen avèk Jewova, e poukisa sa vo lapèn (Sòm 34:8) ? Kiyès ki ta ka pi byen ede w pou amitye w avèk Bondye vin pi solid ?
5 Move zanmi : Kiyès nou ka konsidere kòm move zanmi (1 Kor. 15:33) ? Ki jan move zanmi kapab antrene yon moun nan gwo pwoblèm ? Ki leson nou pran nan sa k te rive Dina a ? — Jen. 34:1, 2, 7, 19.
6 Yon fim yo monte pou epòk nou an : Ki efè sa te genyen sou Tara dèske li te santi l pou kont li ? Ki sa li te di pou l montre pa gen pwoblèm pou l frekante jèn ki nan monn nan ? Anba ki danje yo te ekspoze manmzèl ? Poukisa paran l pa t rive wè pwoblèm li t ap travèse yo ? Men, avèk ki eta d espri yo te ede l reprann li espirityèlman ? Ki jan yon sè pyonye te pwouve li se yon zanmi, Tara ka konte sou li ? Poukisa yon kretyen fèt pou l suiv prensip nou jwenn nan Pwovèb 13:20 ak sa nou jwenn nan Jeremi 17:9 la ? Ki leson enpòtan Tara te pran ?
7 Pou nou fini : Ki leson nou menm nou pran lè nou fin gade videyo sa a ? Ki jan nou panse nou ka sèvi avè l pou n ede lòt moun ? — Sòm 71:17.