Yon kasèt videyo ki merite pou nou reflechi sou li
“ Kasèt videyo sa a vrèman fè moun reflechi ! ”
“ Li te touche kè m ! ”
“ Emosyon te anvayi kè m ”
1 Èske se konsa w te santi w lè ou te fèk fin gade kasèt videyo Les jeunes s’interrogent — Comment se faire de vrais amis ? an ? Sa gen kèk ane, yon jèn frè t ap travèse yon moman difisil nan lavi l akoz kalite zanmi li te chwazi. Yo te lakòz li vin pa enterese nan laverite ankò e li te vin pèdi relasyon li te genyen ak Jewova. Se nan moman sa a kasèt videyo Vrais amis an te parèt. Men sa frè a te di : “ Mwen gade kasèt la plizyè fwa, e chak fwa dlo te koule nan je m. Mwen te remèsye Jewova pou èd sa a li ban mwen nan moman apwopriye a. ” Kasèt la te ankouraje l fè gwo chanjman nan lavi l e li te ede l fè bonjan zanmi. Men sa li ajoute : “ Li evidan nou konnen pwoblèm jèn yo ap rankontre. ” Nou menm paran, e nou menm jèn, èske sa pa t ap bon si nou ta gade kasèt sa a ankò nan pwochen etid familyal n ap fè ? Nou kapab stope l apre chak pati epi nou kapab egzamine ansanm, ouvètman e onètman, kesyon ki nan paragraf ki vin apre yo.
2 Entwodiksyon : Ki sa yon vrè zanmi ye ? — Pwo. 18:24.
3 Obstak ki anpeche amitye devlope : Ki jan w ka rive venk santiman kòmkwa pèsonn pa sou bò w (Fil. 2:4) ? Poukisa ou ta dwe dispoze amelyore pèsonalite w, e kiyès ki ka ede w fè sa ? Ki sa k ap ba w okazyon pou w fè plis zanmi e ki kote ou ka jwenn zanmi sa yo ? — 2 Kor. 6:13.
4 Amitye avèk Bondye : Ki jan w ka devlope yon relasyon ki pi sere avèk Jewova, e poukisa sa vo lapèn pou w fè efò pou sa (Sòm 34:8) ? Kiyès ki ka pi byen ede w fòtifye amitye w ak Bondye ?
5 Move kalite zanmi : Kiyès ki move frekantasyon (1 Kor. 15:33) ? Ki jan move zanmi kapab mennen nou nan dezas espirityèl ? Ki sa sa Bib la rapòte konsènan Dina a aprann nou ? — Jen. 34:1, 2, 7, 19.
6 Yon dram nan epòk modèn nan : Ki efè solitid te genyen sou Tara ? Ki jan li te jistifye amitye li te genyen avèk jèn nan monn nan ? Anba ki danje yo te ekspoze l ? Poukisa paran l pa t rive wè danje ki t ap menase l la, men ki atitid yo te genyen ki te pèmèt yo ede l reprann li espirityèlman ? Ki jan yon sè pyonye te montre li se yon vrè zanmi pou Tara ? Poukisa kretyen yo dwe koute pawòl ki nan Pwovèb 13:20 ak nan Jeremi 17:9 la ? Ki leson enpòtan Tara te aprann ?
7 Konklizyon : Ki leson ou te aprann nan kasèt videyo sa a ? Ki jan ou ka sèvi avè l pou w ede lòt moun ? — Sòm 71:17.