Montre yon enterè sensè pou moun : lè nou atantif
1 Jewova Dye ak Kris Jezi maton nan rekonèt egzakteman sa moun bezwen, e yo maton nan ba yo èd (2 Kwo. 16:9 ; Mak 6:34). Lè nou idantifye sa ki enterese moun nou rankontre nan ministè nou ansanm ak sousi yo genyen, n ap kapab adapte fason nou prezante bon nouvèl la.
2 Note tout ti detay : Jezi te yon bon obsèvatè (Mak 12:41-43 ; Lik 19:1-6). Menm jan an tou, si pandan n ap pwoche bò pòt kay yon moun nou remake genyen dekorasyon ki gen rapò avèk relijyon, slogan ki ekri sou machin, oswa gen jwèt nan lakou a, nou kapab pwofite okazyon an pou nou bay yon temwayaj ki efikas lè n ap prezante bon nouvèl la.
3 Ekspresyon vizaj yon moun ak konpòtman l kapab pèmèt nou disène santiman l (Pwo. 15:13). Moun nan gendwa te pèdi yon moun li renmen anpil, oubyen li gendwa ap viv kèk lòt sitiyasyon ki difisil, e li vin bezwen konsolasyon. Yon moun konsa kapab byen kontan nou li kèk vèsè avèk li, kèk vèsè nou byen chwazi (Pwo. 16:24). Èske moun ki abite nan kay la ap fè prese pou l soti, oubyen èske l gen yon tibebe nan men l k ap kriye ? Nan ka sa yo, li t ap pi bon si nou fè aranjman pou nou retounen vizite l. Lè nou montre nou gen konsiderasyon e nou “ montre nou gen kè sansib ”, nou kapab ankouraje moun nan koute nou lè nou retounen. — 1 Pyè 3:8.
4 Adapte sa n ap di yo : Apot Pòl te remake nan vil Atèn te gen yon lotèl yo te dedye “ pou yon dye yo pa konnen ”. Sa te enfliyanse fason li te prezante bon nouvèl la. Men sa l te di : “ Sa n ap bay yon devosyon san nou pa konnen l lan, se de li m ap pale nou. ” Lefètke Pòl te pale ak moun yo avèk tak, sa te pouse kèk nan yo koute mesaj Wayòm nan, e yo te vin kwayan. — Tra. 17:23, 34.
5 Menm jan an tou, lè nou atantif, sa ede nou disène sa ki enterese moun yo, e sa pèmèt nou adapte sa n ap di yo. Sèvi ak kesyon ki kapab pouse moun n ap pale avèk li a eksprime panse l. Reflechi pou n wè ki vèsè nou ta kapab itilize ki t ap plis enterese l (Pwo. 20:5). Lè nou atantif e lè nou montre yon enterè sensè pou moun, sa ap ede nou preche bon nouvèl la yon fason ki efikas.