Montre yon enterè sensè pou moun : lè nou fè preparasyon
1 Bonjan preparasyon pou ministè a ede nou montre yon enterè sensè pou moun yo. Ki jan ? Lè nou byen prepare, nou pa rete ap reflechi sou sa nou pral di, e konsa nou ka bay moun n ap pale avè l la plis atansyon. Anplis de sa, yon bonjan preparasyon ap ede nou gen sanfwa, e sa ap pèmèt nou pale avèk senserite. Pakonsekan, ki jan nou ka prepare yon prezantasyon ki efikas ?
2 Itilize yon prezantasyon ki apwopriye : Chwazi youn nan prezantasyon yo sijere nan Ministè Wayòm janvye 2006 la ki apwopriye pou tèritwa a, epi gade pou w wè ki jan w ka mete l nan pwòp mo pa w. Adapte l ak tèritwa w la. Pa egzanp, si w panse w ap rankontre moun ki fè pati yon relijyon oswa yon gwoup etnik kèlkonk, reflechi pou w wè sa ki ka enterese yo. Lè w adapte metòd ou itilize a selon moun w ap pale avè l la, sa montre enterè sensè ou gen pou moun nan. — 1 Kor. 9:22.
3 Toutpandan w ap sèvi ak prezantasyon an, kontinye amelyore l. Etandone premye pawòl ou di lè w ap pale ak yon moun gen anpil enpòtans, note ki jan moun yo reyaji devan entwodiksyon ou fè a. Èske sijè a enterese yo ? Èske yo reponn kesyon w poze a ? Sinon, fè kèk ajisteman jiskaske ou jwenn yon metòd ki mache.
4 Kèk èd memwa : Anpil moun twouve li difisil pou yo sonje yon prezantasyon lè yo rive nan yon kay. Si sa deja rive w, li ta bon pou w fè kèk egzèsis kote w ap fè prezantasyon an devan yon lòt moun. Sa ka ede w kenbe ide yo klè nan lespri w pou w prezante yo yon fason ki senp e ki lojik. Sa ka prepare w tou pou w fè fas ak tout kalite reyaksyon ou ka jwenn.
5 Yon lòt èd memwa ou ka itilize, se lè w fè yon rezime prezantasyon an sou yon kanè nòt epi, anvan menm ou rive nan pòt kay la, ou fè yon koudèy ladan l. Gen moun ki twouve ti rapèl sa a ede yo vin pi alèz e yo kapab konvèse ak moun y ap pale avè l la pi byen. Nan sans sa a, bonjan preparasyon kapab ede nou montre yon enterè sensè pou moun yo, e pakonsekan, sa ap amelyore fason n ap prezante bon nouvèl la.