Montre yon enterè sensè pou moun : lè nou felisite yo
1 Felisitasyon ki sensè ankouraje moun yo, sa pouse yo alaksyon, e sa ba yo lajwa. Gen anpil pwoklamatè ki remake, lè yo nan ministè a yo di moun yo yon ti mo pou yo felisite yo sensèman, souvan sa konn ankouraje moun yo koute. Ki jan nou ka felisite moun yo etan n ap chèche pataje bon nouvèl la avèk yo ?
2 Se pou nou konn obsève : Apre Jezi Kris te fin retounen nan syèl la, li te note bon aksyon sèt kongregasyon ki te ann Azi Minè te konn fè (Rev. 2:2, 3, 13, 19 ; 3:8). Menm jan an tou, lè nou gen yon enterè sensè pou moun nou rankontre nan ministè nou, sa pral ankouraje nou chèche okazyon pou nou felisite yo. Pa egzanp, yon jaden ki byen antretni, yon paran k ap demontre yon afeksyon ki plen lanmou pou pitit li, oswa yon bèl souri ak yon akèy amikal nou jwenn nan men moun ki nan yon kay, tout sa se okazyon nou jwenn pou nou felisite moun yo. Èske w remake jan de okazyon sa yo rapidman, e èske w pwofite de yo ?
3 Se pou nou konn koute : Lè n ap preche moun yo, envite yo eksprime santiman yo pa mwayen kesyon apwopriye n ap poze yo. Montre respè pou yo lè nou pran tan pou nou koute sa y ap di (Wom. 12:10). Petèt n ap rive jwenn yon baz pou nou felisite moun yo avèk senserite, e konsa sa ap pèmèt nou etabli yon teren antant e n ap kapab konstwi sou baz sa a.
4 Se pou nou montre nou gen disènman : Ki sa nou ta dwe fè si moun n ap pale avè l la ta di nou yon bagay ki pa ann amoni ak verite ki nan Bib la ? Olye pou nou demanti sa l di ki pa kòrèk la, remèsye moun nan poutèt li eksprime li, epi nou ka di l, pa egzanp : “ Mwen wè sijè sa a vrèman enterese w. ” (Kol. 4:6). Menmsi yon moun ta renmen fè diskisyon, an jeneral nou ka felisite l pou enterè sensè li genyen pou sijè a. Lè nou aji avèk dousè konsa, sa ka kalme yon moun ki ka parèt vrèman opoze ak bon nouvèl la. — Pwo. 25:15.
5 Pou yon felisitasyon bay bon rezilta, fòk li sensè. Lè nou di pawòl ki edifyan konsa, sa onore Jewova e sa ka fè mesaj Wayòm nan atire moun yo.