Montre yon enterè sensè pou moun : lè nou preche san patipri
1 Nan yon vizyon, apot Jan te wè yon zanj ki t ap vole nan mitan syèl la, ki t ap anonse yon bon nouvèl etènèl bay moun “ tout nasyon, ak tribi, ak lang, ak pèp ”. (Rev. 14:6.) Èske nou suiv egzanp zanj lan lè nou preche san patipri ? San nou pa rann nou kont, nou ka gen pwennvi ki montre nou gen prejije. Fason nou konsidere moun nou rankontre yo kapab enfliyanse fason nou prezante yo bon nouvèl la. Kidonk, lè n ap preche tout kalite moun, nou bezwen montre avèk amou nou gen sousi pou yo toutbonvre.
2 Annou egzamine tèritwa nou an : Èske gen imigran oswa refijye k ap viv nan tèritwa nou an ? Sa ka rive fasilman nou neglije yo. Pran inisyativ pou nou chèche moun sa yo, epi fè efò pou nou vin konnen yo pi byen. Ki sa yo bezwen ? Ki sousi yo genyen ? Ki sa yo renmen ? Ki sa yo pa renmen ? Ki enkyetid yo genyen ? Ki prejije yo genyen ? Chèche adapte fason n ap prezante mesaj Wayòm nan ann amoni ak tout konsiderasyon sa yo (1 Kor. 9:19-23). Menm jan ak apot Pòl, nou ta dwe santi nou gen obligasyon pou nou pataje bon nouvèl la ak tout moun ki nan tèritwa nou an, san wete moun ki soti nan yon peyi etranje, moun ki gen yon kilti diferan, moun ki pale yon lòt lang oswa moun ki rich anpil. — Wom. 1:14, nòt anba paj.
3 Men, ki jan nou kapab preche yon moun ki pale yon lòt lang ? Se lè nou byen sèvi ak bwochi Une bonne nouvelle pour des gens de toutes nations an. Nou kapab mache ak kèk feyè oswa kèk bwochi ki nan lang yo pale nan tèritwa nou an. (Gade nan Ministè Wayòm jiyè 2003, paj 4, § 2-3.) Anplis de sa, gen kèk pwoklamatè ki fè efò pou yo aprann yon salitasyon ak yon prezantasyon ki senp nan lòt lang. Souvan, moun yo enpresyone lè yo tande yon moun ap eseye pale ak yo nan lang pa yo, menmsi se kèk mo sèlman moun nan ka di. Sa kapab fè bon nouvèl la atire yo.
4 Annou imite Jewova : Lè nou fè efò pou nou atenn tout kalite moun, nou imite Jewova, Bondye nou an, ki pa gen patipri, “ ki vle pou tout kalite moun sove, e pou yo rive gen yon konesans egzak sou laverite ”. — 1 Tim. 2:3, 4.