Repons kesyon w yo

◼ Pandan konbyen tan nou dwe etidye Labib ak yon moun k ap pwogrese?

Li pi bon pou n kontinye etidye Labib ak yon moun k ap pwogrese jiskaske l fin etidye de piblikasyon sa yo: Liv Ki sa Labib anseye toutbonvre? a ak liv “Rete nan lanmou Bondye” a. Nou dwe fè sa, menmsi etidyan an gentan batize anvan l fini de liv yo. Apre moun nan fin batize, nou ka kontinye konte lè a, vizit yo ak etid la. Si yon pwoklamatè akonpaye nou e li patisipe nan etid la, li ka konte lè a tou. — Gade Ministè Wayòm mwa mas 2009 la, paj 2.

Li enpòtan pou nouvo yo gen yon bon baz nan laverite anvan nou lage yo pou yo debouye yo poukont yo. Yo bezwen “anrasinen” nan Kris e yo bezwen ‘lafwa yo vin ogmante anpil’ yon fason pou yo rete fèm devan eprèv yo pral rankontre (Kol. 2:6, 7; 2 Tim. 3:12; 1 Pyè 5:8, 9). Anplis de sa, pou yo anseye lòt moun yon fason ki efikas, yo dwe gen “yon konesans egzak sou laverite”. (1 Tim. 2:4.) Lè nou etidye de liv ak etidyan nou yo, se ede nou ede yo aprann mache, avèk asirans, sou “wout ki mennen nan lavi a”. — Mat. 7:14.

Anvan ansyen yo dakò pou yon moun batize, yo dwe asire yo moun nan byen konprann ansèyman de baz ki nan Bib la e li viv ann amoni avèk yo. Ansyen yo dwe pridan sitou lè y ap egzamine kesyon ak yon moun ki poko fin etidye premye liv la nèt. Si yon moun pa kalifye pou l batize, ansyen yo bezwen asire yo moun nan resevwa yon èd pèsonèl k ap pèmèt li kalifye pou l batize alavni. — Gade liv Organisés pour faire la volonté de Jéhovah, paj 217-218.

[Antrefilè nan paj 2]

Li enpòtan pou nouvo yo gen yon bon baz nan laverite.