Chèche vin pi maton nan travay predikasyon an: Chèche bay temwayaj enfòmèl

Rezon ki fè sa enpòtan: Lè n ap patisipe nan travay predikasyon kay an kay la, souvan, gen anpil moun ki konn pa lakay yo. Sepandan, nou ka rive jwenn moun sa yo lè nou nan transpò piblik, lè n ap tann yon doktè, lè nou nan poz nan lekòl nou oswa nan travay nou, oubyen nan lòt okazyon ankò. Jewova vle pou tout moun jwenn posiblite pou yo tande mesaj Wayòm nan (1 Tim. 2:3, 4). Souvan, pou nou rive bay moun yo temwayaj, nou konn bezwen fè efò pou nou kòmanse yon konvèsasyon avè yo.

Fason pou nou fè l:

Se pou nou byen chwazi ki moun n ap bay temwayaj. Èske moun nan sanble li amikal e li dispoze pale? Èske sitiyasyon an pèmèt nou gen yon konvèsasyon san pwoblèm ak moun nan? Gen kèk pwoklamatè, anvan yo kòmanse yon konvèsasyon, yo gade moun nan nan je e yo souri ba li. Si moun nan souri ba yo, ebyen yo fè efò pou yo kòmanse yon konvèsasyon avè l.
Si w santi w yon ti jan renka renka pou w pale, fè yon priyè tou kout nan kè w. — Ney. 2:4; Tra. 4:29.
Kòmanse ak yon senp ti pawòl, petèt yon salitasyon. Lè Jezi te kòmanse konvèsasyon li te gen ak Samaritèn nan, se pa t sou Wayòm nan li te pale (Jan 4:7). Pafwa, nou ka kòmanse yon konvèsasyon ak yon felisitasyon. Nou ka di: “Pitit ou yo vrèman byennelve!” Oubyen nou ka poze yon kesyon pou n kòmanse yon konvèsasyon. Nou ka di: “Èske w te tande sa yo te di nan nouvèl yè swa?”
Yonfwa konvèsasyon an kòmanse, chèche yon okazyon pou w pale de bon nouvèl la, ou pa bezwen prese pou w fè sa. Kite konvèsasyon an koule tou natirèlman. Petèt, ou ka di moun nan yon pawòl k ap enterese l e ki ka fè l poze yon kesyon. Pa egzanp, si se sou fanmi n ap pale, ou ta kapab di: “Mwen jwenn bonjan konsèy pou ede paran yo leve pitit yo.” Si w ap pale de yon bagay ou te tande nan nouvèl, ou ta ka di: “Sa pa gen twò lontan mwen te li yon bon nouvèl.” Ou pa bezwen dekouraje si konvèsasyon an fini san w pa gentan bay yon temwayaj.
Mache ak feyè oswa lòt piblikasyon pou w ka bay moun ki enterese yo.

Eseye sa a pandan mwa a:

Chak semèn, nan aktivite w ap mennen chak jou, eseye kòmanse omwen yon konvèsasyon nan objektif pou w bay temwayaj enfòmèl.