Èske w wè kalite Bondye genyen yo ki envizib?

Lè w ap gade yon bèl flè ki gen plizyè koulè, syèl la ki plen zetwal oubyen yon gwo kaskad dlo k ap tonbe byen fò, èske w wè travay Kreyatè a fè ak men l? Kreyasyon an montre aklè kalite Jewova yo ki envizib (Wm 1:20). Lè n pran yon ti tan pou n reflechi sou sa n wè, nou rive wè pouvwa oswa pisans Bondye genyen, lanmou l, sajès li ak jistis li, e nou rive wè tou jan l renmen bay. — Sm 104:24.

Ki bagay konsa Jewova kreye ou wè chak jou? Menmsi w ap viv nan yon vil, petèt ou wè zwazo ak pyebwa nan vil kote w ye a. Lè w pran san w pou w byen gade sa Jewova kreye yo, sa kapab ede w gen mwens strès, sa kapab ede w konsantre tou sou bagay ki pi enpòtan yo epi vin gen plis konfyans nan kapasite Jewova genyen pou l pran swen nou pou toutan (Mt 6:25-32). Si w gen timoun, ede yo wè kalite Jewova yo ki estrawòdinè. Plis nou aprann apresye sa Jewova kreye yo, se plis n ap vin pi pwòch Jewova. — Sm 8:3, 4.

GADE VIDEYO BÈL BAGAY KI GEN NAN KREYASYON AN FÈ N WÈ GLWA BONDYE — LIMYÈ AK KOULÈ, EPI REPONN KESYON KI ANNAPRE YO:

• Ki sa k fè nou rive wè koulè yo?

• Ki sa k fè gen iridesans (sa vle di plizyè koulè ki parèt ap chanje selon ang y ap gade yo a)?

• Ki sa k fè gen divès koulè ki konn parèt nan syèl la?

• Ki koulè ki vrèman bèl ou wè nan kreyasyon an nan zòn ou abite a?

• Poukisa nou dwe pran tan pou n byen gade lanati?