Mèvèy ki gen nan kreyasyon an fè moun wè glwa Bondye
Gen anpil moun ki renmen gade kreyasyon an. Men pa gen anpil nan yo ki rive konprann lè yo fè sa se tankou yo gen yon apèsi sou sa Gran Kreyatè nou an gen nan panse l ak sa l gen nan kè l (Wom. 1:20). Lontan, David te aprann konnen Jewova grasa Pawòl Li enspire a. Men nan yon sans, li “te wè” Bondye tou e li te vin pwòch Li grasa kreyasyon an (Sòm 8:3, 4). DVD ki gen tit: Les merveilles de la création révèlent la gloire de Dieu a, ap ede ni nou menm, ni pitit nou ni etidyan nou yo pi byen konprann kèk bagay ki nan kreyasyon Jewova a. L ap ede nou wè bèl kalite Jewova gen lakay li, l ap fè nou dekouvri bèl pèsonalite li genyen, e sa ap fè nou vin pi pwòch li. Apre nou fin gade DVD a, eseye wè kòman nou ka reponn kesyon ki vin apre yo.
1) Lè nou konnen gwosè inivè a ye ak jan li byen òganize, kòman sa fè nou gen plis apresyasyon pou Jewova (Iza. 40:26)? 2) Lè nou byen egzamine dlo, ki sa nou aprann sou Moun ki te kreye l la (Rev. 14:7)? 3) Kòman gwosè tè a ak distans Jewova mete ant solèy la ak tè a montre sajès Jewova genyen? 4) Ki itilite lalin nan genyen (Sòm 89:37)? 5) Nan ki sans Jewova te kreye lèzòm pou yo jwi lavi a? 6) Ki sa ADN nan ye (Sòm 139:16)? 7) Nan tout kreyati Jewova fè sou tè a, ki sa ki fè lèzòm diferan (Jen. 1:26)? 8) Ki sa w ap tann avèk enpasyans nan monn nouvo a?
Enfòmasyon siplemantè (Bonis): 9) Ki sa k fè gen divès kalite koulè? 10) Lefètke dlo ka rive jis nan tèt pyebwa yo, nan ki sans sa defye prensip gravitasyon an? 11) Ki wòl dlo jwe nan kò nou? 12) Site kèk egzanp ki montre amoni ki egziste pami kreyati vivan yo. 13) Kòman kreyati yo fè konnen pou yo asosye youn ak lòt? 14) Ki sa “ang dò” a ye, e kòman li parèt evidan nan kreyasyon an?
“Gade” kreyasyon Jewova a “byen”: Jezi ankouraje nou pou nou “gade zwazo nan syèl la byen” e pou nou tire leson nan egzanp “flè ki nan savann yo”. (Mat. 6:26, 28.) Lè nou fè sa, sa pèmèt lafwa nou vin pi solid, sa fè nou gen plis konfyans nan Kreyatè a. Epi, sa fè nou pi apresye sajès Jewova, kapasite l genyen pou l sove sèvitè l yo ak lanmou li genyen. Olye pou nou kite bagay ki nan monn sa a distrè nou, nou dwe pran tan pou nou gade mèvèy ki nan kreyasyon Jewova a e nou dwe fè efò pou sa. Nou dwe reflechi sou sa kreyasyon an aprann nou sou Bondye nou an. — Sòm 19:1.