Ki jan lapriyè ka ede w?

Pamela te gen kansè, li te chèche èd nan men pwofesyonèl lasante yo. Men tou, li te priye Bondye pou l te ka jwenn fòs pou l andire sitiyasyon difisil sa a. Èske lapriyè te ede l?

Men sa Pamela di: “Pandan m t ap suiv tretman pou kansè a, souvan m te konn pè anpil. Men, lè m te priye Jewova, m te vin santi m kalm e m te ka kontinye andire sitiyasyon m nan, san m pa t pè. M kontinye soufri akoz m gen doulè toutan, men lapriyè ede m rete pozitif. Lè moun mande m ki jan m santi m, mwen di: ‘M pa santi m byen, men m kontan!’”

Natirèlman, nou pa bezwen ret tann se lè nou gen gwo tètchaje nan lavi a pou nou priye. Nou tout ap fè fas ak pwoblèm, kit yo gwo, kit yo piti, e souvan nou bezwen èd pou nou ka jere yo. Èske lapriyè ka ede n?

Men sa Bib la di: “Lage chay ou sou Jewova, l ap soutni w. Li pap janm kite moun ki jis la tonbe.” (Sòm 55:22). Panse sa yo vrèman ankourajan! Donk, ki jan lapriyè ka ede w? Lè w priye Bondye fason ki kòrèk la, l ap ba w sa w bezwen pou w fè fas ak pwoblèm ou yo. — Gade kare ki gen tit “Sa lapriyè ka fè pou ou.”

Sa lapriyè ka fè pou ou

Lespri w anpè

“Fè Bondye konnen demann nou yo [...]. E lapè Bondye, ki depase tout sa moun ka konprann, ap pwoteje kè nou ak lespri nou pa mwayen Kris Jezi.” (Filipyen 4:6, 7). Lè w fè Bondye konnen pwoblèm ou yo, l ap ede w rete kalm epi l ap ede w aji avèk sajès lè w anba strès.

Sajès ki soti nan Bondye

“Si youn nan nou manke sajès, se pou l kontinye mande Bondye l, e l ap ba li l paske l donan ak tout moun, e li pa fè repwòch.” (Jak 1:5). Lè n anba presyon, nou pa toujou pran bon desizyon. Si w priye Bondye pou w mande l sajès, l ap fè w sonje anpil nan prensip ki nan Pawòl li a, Labib, ki kapab ede w.

Fòs ak rekonfò

“Mwen gen fòs pou tout bagay grasa Sila a ki ban m pisans lan.” (Filipyen 4:13). Antanke Bondye Toupisan an, Jewova ka ba w fòs ou bezwen pou w fè fas ak pwoblèm ou yo e li ka rekonfòte w lè w nan tribilasyon (Ezayi 40:29). Bib la rele Jewova tou “Bondye tout konsolasyon an”. Li kapab konsole nou “nan tout eprèv nou yo”. — 2 Korentyen 1:3, 4.