Èske gen yon gid nou ka fè konfyans pou ede nou gen yon avni ki sèten?

Jan nou te wè sa nan atik anvan yo, moun yo eseye gen yon avni ki sèten lè yo mete konfyans yo nan yon seri bagay tankou desten, gwo etid, richès e lè yo fè efò pou yo se bon moun. Yon moun ki suiv rezònman sa yo, se tankou yon moun ki pral yon kote, men k ap sèvi ak yon kat jeyografi ki pa kòrèk oswa k ap eseye ouvri yon pòt ak yon move kle. Èske sa vle di pa gen okenn sous nou ka fè konfyans konsènan lavni? Non!

PI BON SOUS KI BAY DIREKSYON KI TA KA GENYEN AN

Lè n ap pran desizyon, jeneralman, nou chèche konsèy nan men yon moun ki pi gran e ki pi saj pase nou. Menm jan an tou, nou ka jwenn bonjan direksyon konsènan lavni nan men yon moun ki pi gran e ki pi saj lontan pase nou. Konsèy li bay yo te vin jwenn nou nan yon liv sakre ki rele Labib, yo te ekri l sa gen anviwon 3 500 ane.

Poukisa nou ka fè Bib la konfyans? Paske moun ki te fè ekri l la se li ki la pi lontan e ki pi saj nan tout linivè. Bib la dekri l tankou “Sila a ki la depi pi lontan an”, Sila a ki la “depi toutan e pou toutan.” (Dànyèl 7:9; Sòm 90:2). Li se “vrè Dye a, Sila a ki te kreye syèl la, Sila a ki te bay tè a fòm nan.” (Ezayi 45:18). Li fè nou konnen non pèsonèl li se Jewova. — Sòm 83:18.

Lefètke se Sila a ki kreye tout moun nan ki bay Bib la, li pa bay yon kilti oswa yon ras plis valè pase yon lòt. Konsèy ki ladan l yo pa pase mòd, e yo pote byenfè pou moun toupatou sou latè. Li disponib nan plis lang e se li yo plis distribye nan monn nan pase nenpòt lòt liv.a Sa vle di moun toupatou ka konprann li byen fasil e yo ka jwenn direksyon l bay. Gade ki jan Bib la kore enfòmasyon sa yo:

“Bondye pa gen patipri. Nan tout nasyon, yon moun ki gen lakrentif pou li e k ap pratike sa ki jis, moun sa a fè l plezi.” — TRAVAY 10:34, 35.

Menm jan yon paran ki gen sousi pou pitit li ba yo direksyon, se konsa tou Jewova Dye ki se yon Papa ki gen lanmou, ofri nou èd li pa mwayen Pawòl li a, Labib (2 Timote 3:16). Ou ka fè Pawòl li a konfyans. Dayè, se li ki te fè nou e li konnen ki sa k ka ban nou kè kontan nan lavi a.

YON GID NOU KA FÈ KONFYANS

Nou ka sèten Bib la se yon gid nou ka fè konfyans konsènan lavni paske sa gen anviwon 2 000 an, li te di egzakteman ki evènman nou pral wè nan monn nan ak konpòtman moun yo t apral genyen nan epòk nou an.

EVÈNMAN:

“Nasyon pral leve kont nasyon e wayòm pral leve kont wayòm. Pral gen gwo tranblemanntè e pral gen rate manje ak epidemi nan yon zòn apre yon lòt.” — LIK 21:10, 11.

KONPÒTMAN:

“Nan dènye jou yo, tan yo pral di, yo pral difisil pou moun sipòte. Paske, moun yo ap renmen pwòp tèt yo, y ap renmen lajan, y ap grandizè, y ap ògeye, y ap blasfeme, y ap dezobeyi paran yo, y ap engra, yo pap fidèl, yo pap gen afeksyon pou moun parèy yo, yo pap dispoze antann yo, y ap pale moun mal, y ap san metriz, y ap sovaj, yo pap renmen sa ki byen, y ap trèt, y ap gen tèt di, y ap gonfle ak ògèy, y ap renmen plezi olye yo renmen Bondye.” — 2 TIMOTE 3:1-4.

Ki sa w rive konprann lè w wè jan sa fè tèlman lontan depi Bib la te dekri egzakteman sa k ap rive jodi a? Sandout, w ap dakò ak deklarasyon sa a Leung, k ap viv nan peyi Ong Kong te fè, li di: “Sa gen lontan depi yo te ekri pwofesi ki nan Bib la. Li enposib pou kèlkeswa moun nan ta predi bagay sa yo yon fason ki egzak konsa. Se ta dwe yon moun ki siperyè lontan pase nou ki pou ta enspire Bib la.”

Bib la gen plizyè santèn pwofesi ki deja reyalize.b Sa pwouve Bib la se vrèman Pawòl Bondye. Men sa Jewova di: “Mwen se Bondye, e pa gen pèsonn tankou m, depi nan kòmansman yon bagay, mwen di ki jan l ap fini.” (Ezayi 46:9, 10). Kidonk, se avèk rezon, ou ka konte sou sa Bib la di konsènan lavni.

YON GID K AP POTE BYENFÈ POU OU DEPI KOUNYE A E POU TOUTAN

Lè w suiv direksyon Bib la bay, sa ap pote byenfè pou ou. Ann gade kèk egzanp.

YON PWENNVI EKILIBRE SOU LAJAN AK TRAVAY

“Li pi bon pou yon moun pran yon ti repo olye l plede ap travay di e li kontinye ap kouri dèyè van.” — EKLEZYAS 4:6.

LAVI FANMI

“Nou chak dwe renmen madanm nou menm jan nou renmen tèt nou. Madanm nan, bò kote pa l, dwe gen yon gwo respè pou mari l.” — EFEZYEN 5:33.

RELASYON NOU AK LÒT MOUN

“Pinga w fè kòlè, pinga w move, pinga w fache epi w al lage kò w nan fè sa ki mal.” — SÒM 37:8.

Lè w aplike sa Bib la di w yo, sa ap bon pou ou depi kounye a epi w ap gen posiblite pou w jwenn yon bèl avni. Nan Bib la, nou jwenn pwomès Bondye fè pou n gen yon avni estrawòdinè ki gen ladan l:

LAPÈ AK SEKIRITE

“Y ap kontan anpil akoz yo pral viv nan yon lapè total.” — SÒM 37:11.

KAY AK MANJE POU TOUT MOUN

“Y ap bati kay e y ap abite ladan yo. Y ap plante jaden rezen e y ap manje fwi yo bay.” — EZAYI 65:21.

PAP GEN MALADI AK LANMÒ ANKÒ

“Pap gen lanmò ankò, e moun pap nan lapenn ankò akoz moun pa yo ki mouri.” — REVELASYON 21:4.

Ki sa w bezwen fè pou w sèten w ap jwenn kalite avni sa a? Gade pwochen atik la.

a Pou w jwenn plis enfòmasyon konsènan tradiksyon Bib la ak fason li distribye, ale sou sit www.jw.org, epi gade nan seksyon SA BIB LA ANSEYE > LISTWA AK LABIB.

b Pou w jwenn plis enfòmasyon, gade chapit 9 nan liv La Bible — Parole de Dieu ou des hommes? Se Temwen Jewova yo ki pibliye l. Li disponib sou Entènèt sou www.jw.org. Gade nan seksyon BIBLIYOTÈK > LIV & BWOCHI.