Gwo sechrès ki genyen yo — Ki sa Bib la di?

“Peyi Lachin fè konnen ane sa a se premye fwa li fè cho konsa e se premye fwa gen sechrès konsa nan sezon ete nan peyi a.” — The Guardian, 7 septanm 2022.
“Ane sa a se senkyèm ane depi gen gwo sechrès nan plizyè peyi ann Afrik.” — UN News, 26 out 2022.
“Gen yon sechrès k ap menase pifò zòn ann Ewòp, e se ap pi gwo sechrès pase tout sa ki te frape zòn nan depi 500 an.” — BBC News, 23 out 2022.

Anpil moun ki fè rechèch nan domèn nan fè konnen ap kontinye gen sechrès konsa e yo ka menm vin pi mal. Èske gen espwa pou gen yon pi bon avni? Ki sa Bib la di?

Sa pwofesi ki nan Bib la di konsènan sechrès yo

Men sa Bib la te anonse ki t ap rive nan epòk nou an:

“Pral gen rate manje […] nan yon zòn apre yon lòt.” — Lik 21:11.

Byen souvan, sechrès yo lakòz gen rate manje. Lè sechrès sa yo lakòz gen rate manje, moun k ap soufri ak moun k ap mouri sa reyalize pwofesi ki nan Bib la. — Revelasyon 6:6, 8.

Rezon ki fè sechrès yo ap vin pi mal

Bib la fè konnen prensipal rezon ki fè sechrès ki genyen yo ap vin pi mal. Men sa l di:

“Se pa lòm ki pou deside ki kote l ap met pye l.” — Jeremi 10:23.

Sa vle di lèzòm pa ka byen deside “ki kote [y] ap met pye [yo]” oswa dirije tèt yo. Byen souvan, move desizyon yo pran konn lakòz gen sechrès e sa konn lakòz manke dlo.

Pifò syantifik yo rekonèt fason lèzòm ap viv lakòz tè a ap vin pi cho, sa ki fè vin gen plis sechrès sou tout tè a.
Lefètke gen anpil moun ki ava e yo pran yon seri desizyon san yo pa panse ak konsekans desizyon sa yo ka genyen pi devan, sa lakòz yo detwi forè yo, sa lakòz polisyon e yo mal sèvi ak bagay nou jwenn nan lanati yo. Konsa, vin gen mwens kote moun ka jwenn dlo.

Men, Bib la ban nou espwa.

Èske gen espwa pou lavni?

Bib la fè konnen Bondye pral rezoud pwoblèm dlo ki gen jounen jodi a. Ki jan l pral fè sa?

1. Bondye pral “detwi moun k ap detwi tè a”. (Revelasyon 11:18.) Li pral retire youn nan rezon ki lakòz gen pwoblèm dlo anpalan de moun ki mechan, ki ava, k ap aji yon fason k ap detwi lanati. — 2 Timote 3:1, 2.
2. “Tè ki sèch e ki cho anpil la ap tounen yon kote ki plen dlo ak wozo.” (Ezayi 35:1, 6, 7). Bondye pral repare dega sechrès yo te lakòz e li pral fè tè a vin yon paradi ki pa manke dlo.
3. “Ou pran swen tè a, ou fè l pwodui anpil, ou fè l gra anpil.” (Sòm 65:9). Grasa benediksyon Bondye, tè a pral gen anpil bon manje ak anpil dlo pwòp pou tout moun.