KESYON JÈN YO KONN POZE
Ki jan m ka jwenn yon ti moman prive?
Poukisa paran w vle antre nan vi prive w?
Paran w yo fè konnen yo jis enkyè. Men ou menm, ou wè se antre y ap antre nan vi prive w. Pa egzanp:
Gen yon jèn fi ki rele Erin ki di: “Papa m konn pran telefòn mwen, li mande m modpas la epi l gade tout mesaj mwen yo. Si m anpeche l fè sa, l ap panse m ap kache l yon bagay.”
Denise, ki nan kòmansman ventèn li kounye a, sonje jan manman l te konn fouye telefòn li. Men sa l di: “Li te konn gade chak nimewo epi l mande m nimewo kiyès e de kisa m konn ap pale ak moun sa a.”
Gen yon jèn ki rele Kayla ki di manman l te li youn nan jounal entim li yo. Men sa l di: “M te ekri tout sa m santi nan jounal la, menm kèk bagay sou li! M te sispann ekri nan yon jounal apre sa.”
Sa w dwe sonje: Paran w gen responsablite pou yo veye sou ou e w pa ka konn jis nan ki pwen y ap strik nan fason yo ranpli responsablite sa a. Èske y ap rive twò lwen pafwa? Petèt. Bon nouvèl la sèke gen kèk bagay ou ka fè pou w redui santiman kòmkwa y ap antre nan vi prive w la.
Sa w ka fè
Pa kache anyen. Bib la ankouraje n pou n “konpòte nou yon fason ki dwat nan tout bagay”. (Ebre 13:18.) Fè efò pou w aji konsa ak paran w. Plis ou montre w onèt ak yo se plis y ap anvi respekte vi prive w.
Fè yon ti reflechi: Ki abitid ou genyen lè yo fè w konfyans? Èske w pa bay lè yo di w rantre regle anyen pou ou? Èske w kache kiyès ki zanmi w? Èske yo pa ka konn sa w ap regle?
“M aprann fè konsesyon pou paran m. M pa kache yo anyen konsènan sa k ap pase nan lavi m. M di yo tout sa yo vle konnen. Kòm rezilta, yo fè m konfyans e yo respekte vi prive m.” — Delia.
Demontre pasyans. Bib la di: “Kontinye teste sa nou menm nou ye.” (2 Korentyen 13:5). Sa mande tan pou w vin gen yon konpòtman yo ka fè konfyans, men, sa vo lapenn.
Fè yon ti reflechi: Paran w yo te jèn yon lè tou. Ki efè w panse sa genyen sou fason yo enterese nan lavi w?
“M panse paran yo sonje erè yo te fè e yo pa vle jèn yo fè menm erè sa yo.” — Daniel.
Mete w nan plas yo. Eseye wè bagay yo selon pwennvi paran w. Bib la fè konnen yon bon madanm “veye sou sa k ap fèt lakay li” epi yon bon papa ‘leve pitit li nan disiplin ak nan konsèy Jewova bay’. (Pwovèb 31:27; Efezyen 6:4, nòt.) Pa gen okenn mwayen fasil pou sa: Yo dwe enplike nan lavi w.
Fè yon ti reflechi: Si w te yon paran, toutpandan w konn sa w konnen sou jèn yo, èske w t ap kite pitit gason w oswa pitit fi w mennen vi prive yo san w pa poze okenn kesyon?
“Lè w adolesan, ou gen enpresyon paran w pa respekte vi prive w ditou. Men, kounye a, piske m vin grandi, m ka wè rezon ki fè paran yo fè sa. Se yon fason pou yo demontre lanmou yo.” — James.