Yon liv pou etidye Bib la ki vrèman diferan

An janvye 2021, Kolèj santral la te anonse yo t ap pibliye yon nouvo liv pou etidye Bib la ki rele Viv ak kè kontan pou toutan!a Ki efè anons sa a te gen sou ou? Matthew, k ap viv Kanada fè konnen: “Mwen te kontan! E mwen te pi kontan toujou toutpandan m t ap gade diskou ak videyo ki te esplike poukisa yo fè piblikasyon sa a ak fason yo te teste l. M pa t ka tann pou m wè l e pou m kòmanse sèvi avè l.”

Liv Viv ak kè kontan pou toutan! an te vini ak yon nouvo metòd pou moun etidye Bib la. Sepandan, se pa sèl diferans ki genyen ant nouvo liv la ak liv nou te gen anvan yo. Si w ap sèvi ak liv Viv ak kè kontan pou toutan! an nan fòma enprime, petèt w ap santi li pa menm jan an tou. Pou n ka wè poukisa, ann egzamine fason liv la fèt.

Yon nouvo liv ou ka santi ki diferan nan men w

Papye a pi epè. Poukisa sa te nesesè? Liv Viv ak kè kontan pou toutan! an gen plis pase 600 foto an koulè ladan l, sa ki dis fwa pi plis pase liv Anseye nou an! Nouvo liv la gen plis espas vid kote pa gen ni tèks ni foto sou paj yo. De bagay sa yo ka bay pwoblèm. Lè papye a fen, imaj ki nan yon paj ka parèt sou lòt paj la, menmsi se toupiti. Pou evite sa, frè yo nan Depatman enprimri entènasyonal la (IPD) ki nan Wallkill, Nouyòk, Etazini, te eseye sèvi ak kat kalite papye nou deja ap itilize nan enprimri nou yo. Komite redaksyon ki nan Kolèj santral la te egzamine chak kalite papye sa yo e frè ki nan komite sa a te chwazi papye ki te mwens transparan an. Menm lè papye sa a pi chè pase papye nou te konn sèvi pou lòt piblikasyon nou yo, li pral pèmèt moun k ap etidye Labib yo li chak paj nan liv Viv ak kè kontan pou toutan! an san yo pa santi yo distrè paske imaj ki sou lòt paj la fè yon ti parèt nan paj y ap li a.

Yo sèvi ak yon lòt materyèl pou pwoteje po liv la. Lè w manyen po liv sa a ou wè li pa menm jan ak lòt po liv nou te gen anvan yo. Se paske materyèl yo sèvi pou fè finisyon an oubyen ti plastik yo sèvi pou kouvri liv la diferan ak sa nou te konn itilize anvan yo. Yo pa sèvi ak yon materyèl ki klere jan yo te fè sa pou lòt liv yo, sa ki vin pèmèt desen ki sou po liv la ka parèt pi klè. Kòm y ap sèvi ak liv sa a anpil, kouch pwoteksyon yo mete sou po liv la pwoteje liv la pou l pa fini twò vit. Men, kalite finisyon sa a yo mete sou po liv la ki pa klere a koute senk fwa pi chè pase finisyon ki klere yo. Se sa k fè gen plizyè filyal ki mete ansanm pou yo kapab jwenn yon finisyon ki pa klere, men ki koute mwens chè.

Poukisa frè yo te deside itilize materyèl ki pi chè yo? Men sa yon frè ki travay nan IPD di: “Nou konnen moun yo pral itilize liv sa a anpil, donk nou te vle fè l yon fason pou l ka rete bèl menm lè moun yo sèvi avè l anpil.” Epitou, men sa Eduardo, ki travay nan enprimri nan filyal Brezil la, fè konnen: “Nou kontan wè jan òganizasyon Jewova a sèvi ak bon materyèl pou yo ka fè liv sa a yon fason pou nonsèlman l ka bèl, men pou l dire, pou moun kontan sèvi avè l, toutpandan y ap byen sèvi avèk ofrann yo.”

Fason nou te rive enprime pandan pandemi kowonaviris la

Nou te kòmanse enprime liv Viv ak kè kontan pou toutan! an nan mwa mas 2021. Se te pandan pandemi kowonaviris la, donk, nou te jwenn kèk difikilte. Piske betèl yo te oblije fèmen, volontè yo pa t ka vin travay nan enprimri betèl yo e frè yo pa t ka envite nouvo betelit vin travay. Donk, gen kèk nan enprimri nou yo ki pa t gen ase moun pou travay ladan yo e gen lòt yo te oblije fèmen pou yon ti tan akoz restriksyon gouvènman yo te mete anplas.

Ki jan nou te rive fè fas ak difikilte sa yo? Lè l te vin posib pou enprimri yo fonksyone ankò, gen kèk frè ak sè ki travay nan lòt depatman nan betèl la yo te mande al travay nan enprimri yo tanporèman. Men sa Joel, yon frè ki travay nan IPD di: “Bèl etadespri sakrifis yo te demontre e lefètke yo te dispoze aprann fè yon nouvo travay, sa te vrèman enpòtan pou travay la rive fèt.”

Malgre tout difikilte sa yo, nou deja enprime plizyè milyon liv Viv ak kè kontan pou toutan! Pou n fè liv sa yo, sa mande pou n sèvi ak divès kalite materyèl, tankou, plak pou enprime, materyèl pou kouvri liv yo, papye, lank ak lakòl. Nan senk premye mwa yo, nou deja depanse plis pase 2,3 milyon dola ameriken nan materyèl sèlman pou n enprime liv yo. Pou n rive diminye depans yo, nou veye pou n enprime sèlman liv kongregasyon yo bezwen.

“Se vrèman yon bèl zouti”

Ki jan anseyan Labib yo ak etidyan yo wè nouvo zouti sa a pou etidye Labib la? Men sa yon frè ki rele Paul, k ap viv ann Ostrali di: “Se vrèman yon plezi pou m sèvi ak liv Viv ak kè kontan pou toutan! an e m kontan kondui etid biblik ladan l. Fason yo prezante enfòmasyon yo nan liv sa a vrèman atiran e li bay etidyan yo posiblite pou yo patisipe. Yo prezante enfòmasyon yo yon fason ki klè. Mete sou sa, gen kesyon ki touche kè etidyan yo, videyo, foto, tablo ak bonjan objektif pou etidyan yo. Se vrèman yon bèl zouti pou ede m vin yon pi bon anseyan.”

Men sa yon etidyan Labib k ap viv Ozetazini fè konnen: “M vrèman renmen nouvo liv la. Foto yo ede m pi byen konprann pwen ki pi enpòtan yo. Videyo yo touche kè m e yo pouse m aji.” Etidyan sa a fè etid la de fwa pa semèn e li asiste reyinyon kongregasyon an regilyèman.

Kounye a, nou gen plizyè milyon liv Viv ak kè kontan pou toutan! an pou n enprime toujou nan plizyè lang. Anfèt, Kolèj santral la deja bay apwobasyon pou nou pibliye liv sa a nan 710 lang, ki se 340 lang anplis sa yo te apwouve pou liv Anseye nou an.

Ki jan nou rive kouvri depans pou n enprime liv yo? Se grasa ofrann nou fè pou travay mondyal la e anpil moun fè ofrann sa yo sou sit donate.jw.org. Nou vrèman apresye lefètke nou se moun ki renmen bay, sa ede nou fè zouti pou ede moun yo etidye Labib. Konsa, yo kapab aprann konnen Jewova e yo kapab viv ak kè kontan “pou toutan”. — Sòm 22:26.