Èske nou te tande sa deja ?
1 Natirèlman nou tande l deja ! Jewova repete anpil bagay nan Pawòl li pou byen pèp li a. Souvan Jezi te konn repete sa li te deja anseye konsènan divès aspè Wayòm nan. Apòt li yo te toujou rewè bagay espirityèl yo avèk moun yo ki te deja plante fèm nan laverite a. — Wom. 15:15 ; 2 Pyè 1:12, 13 ; 3:1, 2.
2 Nan epòk nou an, òganizasyon Jewova a pran dispozisyon pou nou rewè atik enpòtan yo plizyè fwa nan reyinyon kongregasyon an. Gen kèk piblikasyon nou te etidye plizyè fwa. Wi, li enpòtan pou nou tande bagay nou te tande deja !
3 Rapèl ranpli yon bezwen vital : Rapèl Jewova fè yo apwofondi konpreyansyon nou, yo elaji pwennvi nou epi yo rafèmi detèminasyon nou pou n mentni espirityalite nou (Sòm 119:129). Lè nou rewè regleman ak prensip Bondye yo se tankou lè nou gade nan yon glas. Sa ede nou egzamine tèt nou byen, e sa netralize tandans pou n vin ‘ yon oditè ki toujou ap bliye ’. — Jak 1:22-25.
4 Si nou pa toujou kenbe laverite a nan tèt nou, gen lòt bagay k ap enfliyanse kè nou. Rapèl Bondye yo ap ban nou fòs pou nou reziste kont enfliyans kowonpi monn Satan an (Sòm 119:2, 3, 99, 133 ; Fil. 3:1). Rapèl n ap resevwa toutan sou akonplisman objektif Bondye yo, pouse nou pou n “ rete veye ”. (Mak 13:32-37.) Repetisyon verite biblik yo ede nou rete sou wout lavi etènèl la. — Sòm 119:144.
5 Kouman pou n tire pwofi pèsonèlman : Nou dwe ‘ fè kè nou panche sou rapèl Bondye yo ’. (Sòm 119:36.) Lè y ap egzamine yon sijè nou konnen deja nan yon reyinyon kongregasyon an, nou fèt pou nou prepare davans, pou nou chèche tèks yo site yo, e pou nou reflechi sou jan nou kapab fè aplikasyon enfòmasyon an. Atansyon pou nou pa neglije prepare revizyon alekri Lekòl ministè teyokratik la, nan panse sa pa nesesè (Lik 8:18). Nou pa ta janm vle pa fètatansyon paske yo repete verite de baz yo souvan nan reyinyon nou yo. — Ebre 5:11.
6 Se pou nou gen menm atitid ak salmis la ki te di : “ Menm jan pou tout lòt bagay ki gen valè, nan chemen rapèl ou yo mwen jwenn anpil lajwa. ” (Sòm 119:14.) Wi, nou te tande bagay ki gen valè sa yo deja, e li pwobab nou pral tande yo ankò. Poukisa ? Paske Jewova konnen nou bezwen tande yo !