Ki jan nou ka ede yon mari oswa yon madanm ki pa Temwen ?

¹ Anpil sèvitè Jewova marye ak moun ki senpatik ak Temwen yo. Moun sa yo renmen òganizasyon an, men yo yon ti jan ap rale kò yo dèyè pou yo pa sèvi Bondye. Tande sa yon mari di : “ Ide al preche kay an kay la te yon gwo obstak pou mwen. ” Gen lòt petèt ki bezwen venk abitid yo genyen ki pa ann akò ak Labib. Oubyen yo gendwa panse yo pap janm ka rive suiv pwogram teyokratik chaje mari yo oswa madanm yo ap suiv la. Ki jan nou ka rive ede yo ?

² Montre enterè pou moun nan : Lè nou bay moun atansyon epi nou chèche konnen sa ki enkyete yo, sa kapab ouvri chemen pou yo byen reyaji devan verite ki nan Bib la (Fil. 2:4). Moun ki pa t nan menm relijyon oparavan ak madanm yo oswa ak mari yo, pale souvan de lòt Temwen ki te montre enterè pou yo, avèk amou. Men sa mari nou te pale de li pi wo a di : “ Yon ansyen nan kongregasyon an ki rele José te ban mwen yon atansyon espesyal. Mwen panse se ankourajman l te ban mwen an finalman ki te fè m kòmanse etidye Labib seryezman. ” Gen yon lòt mari ki sonje se frè ki te konn vizite l yo ki te fè efò pou yo pale sou bagay ki enterese l. Men sa l di : “ Mwen te kòmanse gen yon lòt pwennvi nèt sou relijyon [madanm mwen an]. Zanmi l yo se moun ki trè entèlijan ki te kapab pale sou nenpòt sijè. ” — 1 Kor. 9:20-23.

³ Ofri yon èd ki pratik : Lè nou emab nan fason n ap ede mari oswa madanm ki pa Temwen yo, sa kapab touche yo tou (Pwo. 3:27 ; Gal. 6:10). Te gen yon jèn Temwen ki te vin ede yon mari enkwayan ki te gen machin li ki tonbe an pàn. Mari a sonje sa, li di : “ Sa te vrèman touche m. ” Yon lòt frè te pase tout yon jounen ap ede mari enkwayan yon sè klotire yon pwopriyete l genyen. Pandan y ap travay ansanm y ap pale, epi yo vin zanmi. De semèn apre, mesye a pwoche kote frè a, li di l : “ Li lè pou m fè yon chanjman nan vi m. Èske w ta vle etidye Labib avè m ? ” Li te fè pwogrè rapid, e kounye a se yon Temwen batize.

⁴ Toutpandan n ap chèche moun ki diy nan tèritwa a, annou kontinye chèche ede moun ki marye ak kwayan parèy nou yo. — 1 Tim. 2:1-4.