LESON 2

Pale tankou lè w ap fè konvèsasyon

2 Korentyen 2:17.

SA POU W FÈ: Pale yon fason ki natirèl e ki sensè pou w montre sa w santi konsènan sijè a e konsènan moun k ap koute w yo.

Priye epi byen prepare. Priye pou w jwenn èd pou w ret konsantre sou mesaj la olye w konsantre sou tèt ou. Chèche gen pwen prensipal w ap trete yo byen klè nan lespri w. Di sa w ap di a nan pwòp mo pa w. Pa annik li ekspresyon yo mo pou mo jan yo parèt nan plan an.

Si w planifye pou w li kèk vèsè nan Bib la oswa kèk bagay nan yon lòt piblikasyon, chèche byen konnen sa w pral li a yon fason pou w ka byen li l. Si w ap site pawòl lòt moun, li sa yo te di a avèk santiman san w pa egzajere.
Pale ak tout kè w. Reflechi sou rezon ki fè moun k ap koute w yo bezwen tande mesaj la. Ret konsantre sou rezon sa yo. Konsa, fason w kanpe, jès w ap fè, vizaj ou ap fè yo wè jan w sensè ak jan w renmen yo.

Pa konfonn lè yon moun natirèl ak lè yon moun twò vag. Montre jan mesaj la enpòtan lè w pale yon fason ki klè e w byen sèvi ak gramè lang lan.
Gade moun k ap koute w yo. Kontinye gade moun yo si sa pa yon pwoblèm nan zòn ou ye a. Lè w ap bay yon diskou, detanzantan gade yon moun nan asistans lan olye w gade tout moun nèt oswa w fikse je w sou yo.