Ki efè chanjman ki gen nan klima a ka gen sou avni nou? Ki sa Bib la di sou sa?

“Chanjman k ap fèt nan klima a se yon dezas! Li deja prèske enposib pou moun viv sou tè a.” — The Guardian.

Lèzòm ap fè fas ak yon seri gwo pwoblèm, e se yo ki lakòz sa. Pifò syantifik dakò se yon seri bagay lèzòm ap fè ki lakòz tanperati tè a ap monte. Akoz tanperati a ap monte konsa, sa deja lakòz klima a chanje e sa pote anpil gwo konsekans. Pami konsekans sa yo gen:

• Yon seri gwo fenomèn ki rive pi souvan e ki fèt pi fò, tankou gwo chalè, sechrès ak tanpèt, sa ki vin lakòz gen plis inondasyon ak plis dife ki pran nan forè.

• Mas glas ki gen divès kote sou tè a ak glas ki nan pòl yo ap fonn.

• Nivo lanmè a ap monte.

Se toupatou sou tè a moun ap soufri akoz gwo chanjman k ap fèt nan klima a. Apre New York Times te fin fè yon rapò kote yo te pale de pwoblèm ki gen nan 193 peyi, yo te fè konnen: “Tè a ap rele pou l mande sekou.” Piske chanjman ki gen nan klima a lakòz lanmò ak soufrans, Òganizasyon mondyal lasante te di chanjman sa yo “se pi gwo menas ki gen pou sante lèzòm”.

Men, nou gen rezon pou nou gen espwa pou lavni. Bib la te predi tout sa nou wè k ap fèt jodi a. Anmenmtan tou, li fè konnen rezon ki fè nou ka sèten Bondye pral aji e li fè konnen ki sa l pral fè pou lavni ka pi bon.

Èske chanjman ki gen klima a fè nou wè pwofesi ki nan Bib la ap akonpli?

Pwoblèm ki genyen akoz tanperati tè a ap ogmante yo koresponn ak sa Bib la predi pou epòk nou an.

Pwofesi: “Nan dènye jou yo, tan yo pral di, yo pral difisil pou moun sipòte. Paske moun yo ap renmen pwòp tèt yo, y ap renmen lajan, [...] yo pap fidèl, [...] yo pap dispoze antann yo, [...] y ap trèt, y ap gen tèt di.” — 2 Timote 3:1-4.

Bib la te predi rezon ki fè lèzòm t apral aji yon fason ki t ap lakòz pwoblèm nan klima a. Gouvènman yo ak konpayi yo plis enterese nan fè lajan e yo pa enterese nan sa k ka rive lèzòm alavni. Menm lè yo eseye met tèt yo ansanm, yo pa rive antann yo sou fason pou yo anpeche tanperati tè a kontinye ogmante.

Pwofesi sa a fè nou konprann, nou pa ta dwe atann pifò moun ap chanje fason yo aji pou yo pwoteje tè a. Okontrè, Bib la fè konnen moun ki egoyis yo t “ap vin pi mal toujou”. — 2 Timote 3:13.

Rezon ki fè nou ka sèten Bondye pral aji

Bib la fè nou konnen Jewovaa Dye, Kreyatè nou an, gen sousi pou planèt nou an e pou moun ki abite sou li yo. Annou gade sèlman twa vèsè nan Bib la ki ban nou garanti Bondye pral aji.

1. 1. Bondye ‘pa t annik kreye tè a pou granmesi, men li te fè l pou moun rete sou li’. — Ezayi 45:18.

   Bondye pral fè sa l te vle pou tè a (Ezayi 55:11). Li pap kite yo detwi l, ni li pap kite l rive nan yon pwen kote moun pa ka abite sou li.

2. 2. “Moun ki gen imilite yo ap posede tè a, e y ap kontan anpil akoz yo pral viv nan yon lapè total. Moun ki jis yo gen pou yo posede tè a e yo gen pou yo viv sou li pou toutan.” — Sòm 37:11, 29.

   Bondye pwomèt lèzòm pral viv sou tè a pou toutan e yo pral viv anpè.

3. 3. “Kanta pou mechan yo, y ap detwi yo sou tè a.” — Pwovèb 2:22.

   Bondye pwomèt l ap elimine moun ki pa sispann fè mechanste, sa gen ladan l moun k ap detwi tè a.

Ki sa Bondye pral fè pou nou gen yon pi bon avni

Ki jan Bondye pral akonpli pwomès li fè konsènan tè a? Li pral fè sa pa mwayen yon gouvènman ki pral dirije tout tè a, yon gouvènman yo rele Wayòm Bondye a (Matye 6:10). Wayòm sa a pral dirije tè a detan l nan syèl la. Li pa pral gen pou l negosye ak gouvènman lèzòm yo sou yon seri kesyon ki gen rapò ak tè a ak anviwònman an. Okontrè, Wayòm Bondye a pral ranplase gouvènman lèzòm yo. — Dànyèl 2:44.

Wayòm Bondye a pral reyalize anpil bèl bagay pou lèzòm e pou anviwònman an (Sòm 96:10-13). Annou gade sa Jewova Dye pral fè pa mwayen Wayòm li an.

• Li pral repare anviwònman an

  Sa Bib la di: “Dezè a ak tè ki sèch la ap kontan anpil, e plèn ki nan dezè a ap kontan, l ap gen anpil flè tankou pye safran.” — Ezayi 35:1.

  Men sa l pral vle di pou nou alavni: Jewova pral repare tè a, menm yon seri kote lèzòm te fè gwo dega.

• Li pral mete fen nan gwo pwoblèm ki gen nan klima a

  Sa Bib la di: “[Jewova] kalme van tanpèt la, lanm lanmè yo sispann fè bri.” — Sòm 107:29.

  Men sa l pral vle di pou nou alavni: Jewova gen pouvwa pou l kontwole fòs ki gen nan lanati yo. Moun pap soufri ankò akoz gwo pwoblèm ki gen nan klima a.

• Li aprann lèzòm fason pou yo byen pran swen tè a

  Sa Bib la di: “M ap fè w gen bon konprann e m ap fè konnen ki chemen pou w pran.” — Sòm 32:8.

  Men sa l pral vle di pou nou alavni: Jewova te bay lèzòm responsablite pou yo pran swen tè a (Jenèz 1:28; 2:15). Li pral aprann nou ki pi bon fason pou nou fè sa l te ban nou fè a e pou nou pran swen kreyasyon l lan. Li pral montre nou fason pou nou viv ann amoni avèk lanati.