AJUMTALÁB 30
¡Na kidhtaltsik xi chemnekich neˈech ka witsiy ti kʼwajíl!
Tam u chemel jun xitaˈ i achʼál yan tʼajat i yajtsiktaláb ani tʼeˈpintaláb. Jaxtám an Biblia in ulal abal jaˈich jelti jun i atʼowál (1 Korintios 15:26). Ban ajumtaláb 27, tatáˈ a exóbnaˈ abal an Okʼoxláb neˈech kin wixkʼaˈ an chemlách. ¿Por janéy neˈech ka watʼey kʼal an atiklábtsik xi chemnekichtsik? Ba jechéˈ i ajumtaláb neˈech ka exóbnaˈ jun xataˈ xi lej kʼijidh xi an Okʼoxláb in ulúmal neˈech kin tʼajaˈ, neˈech kin witsbantsi nin xeˈchintal yan i atiklábtsik xi chemnekichtsik abal ka kʼwajaytsik abal echʼekʼij. ¡Neˈechtsik ka witsiy ti kʼwajíl! ¿Por tsubax an Okʼoxláb neˈech kin tʼajaˈ jechéˈ? ¿Ani jonti neˈech ka witsbantsat tin xeˈchintal, techéˈ ti Chabál o tuwaˈ walkʼiˈ?
1. ¿Janéy in léˈ kin tʼajaˈ na Jehová kʼal ni kidhtaltsik xi chemnekich?
Na Jehová in léˈich tʼajat kin witsbantsi tin ejattal an atiklábtsik xi chemnekichtsik. Na Job, jun i inik xin koˈolak tʼajat i belomtaláb, in belálak tʼajat abal max ka chemech, yab neˈech ka ukʼtsiyat kʼal an Okʼoxláb «ban Jolimtaláb». Jajáˈ in utsaˈ an Okʼoxláb: «Tatáˈ neˈech tin tawnaˈ, ani nanáˈ neˈech tu tokʼoy» (ka ajay Job 14:13-15).
2. ¿Janti i choˈób abal an chemélomtsik neˈech ka ejdhá ti ít?
Tam ti na Jesus kʼwajay techéˈ ti Chabál, pidhan ti chápláb kʼal an Okʼoxláb abal kin ejto kin ejdhaˈ an chemélomtsik. Jaxtám na Jesús in witsbantsi tin xeˈchintal nin kwitólil jun i chemtsidh mímláb ani jun i tsidhan xin koˈolak 12 i tamub (Markos 5:41, 42; Lukas 7:12-15). Más tayíl chemech na Lázaro nin jaˈúb na Jesús, ani aunque in junálichak chéˈ a kʼitsáj ti chemnek ani ti jolidh, na Jesús in witsbantsi tin xeˈchintal. Tayíl tam ti okʼon ti ól na Jesús in teloloy jonti kʼwajat jolidh na Lázaro, ani in uluw kawidh enchéˈ: «¡Lázaro, ki kale!». Ani tayíl «ejech tám xi chemnek ani kale» (Juan 11:43, 44). ¿A chalpayal an kulbétaláb xin achʼaˈ nin kidhtaltsik ani nin jaˈúbtsik na Lázaro?
3. ¿Neˈech ka witsiy ti kʼwajíl na kidhtaltsik xi chemnek?
An Tʼokat Dhutslab in ulal: abal neˈech ka ejdhá ti ít an chemélomtsik (Hechos 24:15). An atiklábtsik xi na Jesús in witsbantsi tin xeˈchintal yab kʼadhiytsik tu walkʼiˈ (Juan 3:13). Kʼwajataktsik lej kulbél kom ejdhá abal ka kʼwajaytsik juní techéˈ ti Chabál. Ani anchanˈ xanti in tʼajaˈ ti wejeˈ, na Jesús wéˈich i kʼij u kʼibel abal kin ejdhaˈ yan i atiklábtsik abal ka kʼwajay abal echʼekʼij techéˈ ti Chabál, tam ka wenkʼoyatich alabél tʼajat. Na Jesús in uluw abal neˈech ka ejdhá «ejtal an chemélomtsik xi kʼwajat ba nin chalápil an Okʼoxláb» ani hasta neˈech ka ejdhá xitaˈ owenekich tʼajat ti chemnekichtsik (Juan 5:28, 29, TNM nota).
ABAL KI EXÓBNAˈ MÁS
Ka exóbnaˈ jantʼóˈ ti tsubax i belál abal na Jesús in koˈol an chápláb abal kin ejdhaˈ ti ít an chemélomtsik. Ani ka chuˈuw janti in ejtowal ti kʼijidhmédháˈ an aytsixtaláb abal neˈech ka ejdhá ti ít an chemélomtsik.
4. Na Jesus in tejwaˈmédhaˈ abal in ejtowal kin ejdhaˈ an chemélomtsik
Ka exóbnaˈ más xowaˈ na Jesús in tʼajaˈ kʼal na Lázaro. Ka ajaytsik Juan 11:14, ani 38-44, ani ki tʼilmáchtsik kʼal tin kwentaj jechéˈ:
¿Janti i choˈób abal na Lázaro tsubax kʼwajatak chemnek? (Ka chuˈutsik an versículo 39).
Max na Lázaro kʼalnekak tuwaˈ walkʼiˈ, ¿a chalpayal abal na Jesús in witsbámalak juní abal ka kʼwajay techéˈ ti Chabál?
5. ¡Yan i atiklábtsik neˈech ka witsiy ti kʼwajíl!
Ka ajaytsik Salmo 37:29 ani ki tʼilmáchtsik kʼal tin kwentaj jechéˈ:
¿Jonti neˈech ka kʼwajay an atiklábtsik xi neˈech ka witsbantsat tin xeˈchintal?
Na Jesús yab tokot neˈech kin ejdhaˈ ti ít xitaˈtsik in kʼakʼnálak na Jehová, ani jeye neˈech kin witsbantsi tin xeˈchintal kʼeˈet i atiklábtsik. Ka ajaytsik Hechos 24:15 ani ki tʼilmáchtsik kʼal tin kwentaj jechéˈ:
Tam ka ejdhá an chemélomtsik, ¿jitaˈ a léˈ ka chuˈuw?
Ka chalpay kʼal jechéˈ: jun i tátaˈláb in ejtowal kin ejdhaˈ nin chakámil xi kʼwajat ti wayal, anchanáˈ jeye abal na Jesus yab tʼojláb kin ejdhaˈ an atiklábtsik xi chemnekich.
6. Tu kʼijidhmédhál tʼajat abal neˈech ka ejdhá an chemélomtsik
An tʼilab xin ólnál an Biblia kʼal tin kwentaj nin tsidhánil na Jairo in kʼijidhmédhámal yan i atiklábtsik xi chemnek jun in kidhtal. Ka ajaytsik jechéˈ i tʼilab xi lejich watʼey ti Lukas 8:40-42, ani 49-56.
Okʼox ti kin ejdhaˈ nin tsidhánil na Jairo, na Jesus in utsaˈ: «Yab ki jikʼey, tokot ki belmách» (ka chuˈutsik an versículo 50). ¿Janti in ejtowal ti tolmiy jechéˈ i aytsixtaláb . . .
tam ka kʼibey jun a kidhtal xi a kʼanidhál tʼajat?
tam ka watʼnaˈ jun i kʼakʼadhtaláb o max ki léˈná ki chemdhá?
Ka chuˈutsik an VIDEO, ani ki tʼilmáchtsik kʼal tin kwentaj jechéˈ:
¿Janti kʼijidhmédhá nin tatáˈtsik na Phelicity kʼal jechéˈ i aytsixtaláb?
XOWAˈ JUNTSIK IN ULAL: «U achʼál tʼojláb ku belaˈ abal an chemélomtsik neˈech ka ejdhá abal ka kʼwajay techéˈ ti Chabál».
¿Janéy a chalpayal tatáˈ?
¿Jantʼom texto kʼal an Biblia neˈech ka éynaˈ abal ka ólnaˈ abal an chemélomtsik neˈech ka ejdhá abal ka kʼwajay techéˈ ti Chabál?
XOWAˈ I EXOBNÁMICH
An Tʼokat Dhutslab in ulal abal yan tʼajat i atiklábtsik xi chemnekichtsik neˈech ka witsbantsat tin xeˈchintal. Ani na Jehová in léˈich tʼajat ka witsiytsik ti kʼwajíl, jaxtám in pidhámal ti chápláb na Jesús abal kin witsbantsi tin xeˈchintal.
Ki chalpay xowaˈ i exobnámal
¿Janti i choˈób abal na Jehová ani na Jesús in léˈich tʼajat kin witsbantsi tin ejattal an atiklábtsik xi chemnekich?
¿Jonti neˈech ka kʼwajay an atiklábsik xi neˈech ka ejdhá: techéˈ ti Chabál, o tuwaˈ walkʼiˈ? ¿Jantʼó ti a chalpayal anchanˈ?
¿Jantʼó ta belál abal na kidhtaltsik xi chemnekich tsubax neˈech ka witsiy ti kʼwajíl techéˈ ti Chabál?
KA EXLAˈ JUN XATAˈ MÁS
Ka ajay juntsik i tolmixtaláb xi a ejtowal ka tʼajaˈ abal ka kuxuy an tʼeˈpintaláb.
«Tolmixtaláb abal xitaˈ chemnek jun in yaníl» (¡Despertad!, núm. 3 2018)
¿In ejtowal kin tolmiy an Biblia jun xitaˈ xi chemnek in kidhtal?
Xowaˈ i ejtowal ki tʼajaˈ tam u chemel jun xitaˈ xi kʼanidhál (5:06)
Ka chuˈuw janti a ejtowal ka tolmiy jun i chakam xi chemnek jun in kidhtal.
¿Neˈech ka ejdhá jun xitaˈ abal ka kʼwajay tuwaˈ walkʼiˈ? ¿Neˈech ka waˈchin jun xitaˈ xi yab neˈech ka ejdhá?
«¿Janéy in léˈ kin uluw abal neˈech ka ejdhá an chemélomtsik?» (Artículo de jw.org)