AJUMTALÁB 29
¿In ojontsal ka kʼwajay ejat an atiklábtsik xi chemnekich?
¿Chemnek jun a yanél xi a kʼanidhál tʼajat? Tsubax lejtal abal jaˈich lej tʼeˈpintál, ani jachanˈ a kʼitsáj a konoy xónaˈ ta báˈ «¿In ojontsal ka kʼwajay bél ejat? ¿Neˈech juní kin witsiy ku chuˈuw nu yanél xi chemnekichtsik?». Ba jechéˈ i ajumtaláb ani xi jún neˈech ki chuˈuw abal an Biblia in pidhnál an tokʼoxtalábtsik xi tu kʼijidhmédhál tʼajat.
1. ¿In ojontsal ka kʼwajay ejat an atiklábtsik xi chemnekich?
Na Jesús in jumbay an chemlá jelti tam jun u waykanal tʼajat. ¿Por jantʼókʼi tin jumbay kʼal an wayichnich? Tam jun u waykanal tʼajat, yab in choˈób xanéy u watʼel. Tam jun i atikláb u chemel, yabich in achʼál xataˈ nibal in achʼál i yajtsiktaláb. An Tʼokat Dhutslab in ulal abal «an chemélomtsik yab in choˈób ni jun xataˈ» (ka ajay Eclesiastés 9:5).
2. ¿Jantʼó ti tolmiyal ka choˈóbnaˈ xowaˈ in ólnál an Biblia kʼal tin kwentaj an chemlá?
Yan i atiklábtsik in chʼejnál ka chemech, ani in chʼejnál an chemélomtsik. Max tatáˈ a achʼál anchanáˈ, xowaˈ in ólnál an Biblia kʼal tin kwentaj an chemlá, neˈech ti kʼijidhmédhaˈ tʼajat. Na Jesús in uluw: «An tsubaxtaláb neˈech ti ki walkaˈichtsik» (Juan 8:32). Juntsik i belomtalábtsik in okʼtsixnál, abal tam an atiklábtsik ka chemech u jilkʼonal jun xataˈ ejat xi yab jaykʼi u chemel, por an Biblia yab in ólnál anchanáˈ. An atiklábtsik xi chemnekich yab in watʼnál i yajtsiktaláb. Ani kom yabich in choˈób ni jun xataˈ, yab in ejtowal tu tʼajtsi xataˈ. Jaxtám yabich in yejentsal ki tʼajtsi ti olábtsik abal ka koyóch, nibal ki kʼakʼnaˈtsik.
Waˈach xitaˈ in ulal abal i ejtowal ku tʼilmách kʼal an chemélomtsik, por jechéˈ yab tsubax. Anchanˈ xanti talél i exóbnaˈ, an chemélomtsik «yab in choˈób ni jun xataˈ». An atiklábtsik xin chalpayal abal kʼwajat ti tʼilom kʼal in kidhtal xi chemnekich, kʼwajat ti tʼilom kʼal nin tolmiwáltsik an Lej Atʼax, xi in wáynál abal jaˈich an atiklábtsik xi chemnekich. Jaxtám ki exlaˈ an tsubaxtaláb kʼal tin kwentaj janéy u watʼel kʼal an chemélomtsik, tu tolmiyal abal nin tolmiwáltsik an Lej Atʼax yab ti ku kʼambiy. Na Jehová tu óltsal abal yab koˈol ku tʼilmách kʼal an chemélomtsik, kom jajáˈ in choˈób abal nin tolmiwáltsik an Lej Atʼax in ejtowal tu tʼajtsi i atʼaxtaláb (ka ajay Deuteronomio 18:10-12).
ABAL KI EXÓBNAˈ MÁS
Ki exóbnaˈ más xowaˈ in ulal an Biblia kʼal tin kwentaj an chemlá. Ani ki chuˈuw jeye janti i ejtowal ki chapikmédhaˈ ni belomtal kʼal an Okʼoxláb xi tu kʼanidhál ani xi yab in yajlombédhál an atiklábtsik tam ka chemech.
3. Xowaˈ tsubax u watʼel tam jun i atikláb u chemel
Tin pubíl an Chabál an atiklábtsik in belál yan xanéy kʼal tin kwentaj xowaˈ u watʼel tam jun i atikláb u chemel. Por yab ejtal xowaˈ in beláltsik jaˈich tsubax.
¿Janéy in belál an atiklábtsik ta kwentsálil kʼal tin kwentaj an chemélomtsik?
Abal ka choˈóbnaˈ xowaˈ in okʼtsixnál an Biblia, ka chuˈutsik an VIDEO.
Ka ajaytsik Eclesiastés 3:20 ani ki tʼilmáchtsik kʼal tin kwentaj jechéˈ:
Kʼal xowaˈ in ulal jechéˈ i chakam pejats, ¿janéy in watʼnál an atiklábtsik tam u chemel?
Tam jun i atikláb u chemel ¿u jilkʼonal bél jun xataˈ ejat?
An Biblia tu tʼiltsal tam ti chemech na Lázaro, nin jaˈúb na Jesús xin kʼanidhálak tʼajat. ¿Janti in uluw na Jesús abal kʼwajatak na Lázaro? Ka ajaytsik Juan 11:11-14 ani ki tʼilmáchtsik kʼal tin kwentaj jechéˈ:
¿Kʼal janéy tin jumbay na Jesús an chemlá?
¿Janéy tu okʼtsal kʼal tin kwentaj an chemlá jechéˈ i jumbaxtaláb?
¿Janéy a chalpayal kʼal xowaˈ in ulal an Biblia tin kwentaj an chemlá?
4. Ki exlaˈ an tsubaxtaláb tin kwentaj an chemélomtsik tu tolmiyal
Tam i exóbnál an tsubaxtaláb kʼal xowaˈ u watʼel kʼal an chemélomtsik, yabich i chʼejnál. Ka ajaytsik Eclesiastés 9:10 ani ki tʼilmáchtsik kʼal tin kwentaj jechéˈ:
¿In ejtowal an chemélomtsik tu tʼajtsi jun xataˈ xi yab alwaˈ?
Kʼal xowaˈ in okʼtsixnál an Biblia kʼal tin kwentaj an chemélomtsik, tu tolmiyal ki tʼajaˈ ti kwentaj abal an chemélomtsik yabich in yejentsal ki tʼajtsi ti olábtsik abal ka koyóch nibal ki kʼakʼnaˈtsik. Ka ajaytsik Isaías 8:19 ani Apokalipsis 4:11, ani ki tʼilmáchtsik kʼal tin kwentaj jechéˈ:
¿Janéy a chalpayal in achʼál na Jehová tam jun xitaˈ in kʼakʼnál o in kontsal i tolmixtaláb an chemélomtsik?
Ki exlaˈ xowaˈ tsubax u watʼel kʼal an chemélomtsik tu tolmiyal abal yab ki tʼajaˈ i ajibtsik xi na Jehová yab in kulbetnál.
5. Ki exlaˈ an tsubaxtaláb kʼal tin kwentaj an chemélomtsik tu kʼijidhmédhál
Yan i atikláb u okʼtsinal abal tam ka chemech neˈech kin watʼnaˈ i yajtsiktaláb kʼal an atʼaxtalábtsik xi in tʼajámal tam ti kʼwajat wiˈik ejat. Por tu kʼijidhmédhál tʼaj xowaˈ in ólnál an Biblia, kom in ulal abal yab xitaˈ neˈech kin watʼnaˈ i yajtsiktaláb tam ka chemech, nibal an atiklábtsik xi in tʼajámal tʼaj xowaˈ yab alwaˈ. Ka ajaytsik Romanos 6:7 ani ki tʼilmáchtsik kʼal tin kwentaj jechéˈ:
Anchanˈ xanti in ulal an Biblia, tam jun i atikláb u chemel u pakwlantsábich tin walab, tám, ¿a chalpayal abal an chemélomtsik kʼwajat in watʼnál i yajtsiktaláb abal kin jalbiy an walastalábtsik xi in tʼajámal tam ti ejattsik?
Tam más i exlál na Jehová, más i tʼajál ti kwentaj abal jajáˈ yab jaykʼi neˈech kin tʼajaˈ abal an atiklábtsik xi chemnekich kin watʼnaˈ i yajtsiktaláb. Ka ajaytsik Deuteronomio 32:4 ani 1 Juan 4:8, ani ki tʼilmáchtsik kʼal tin kwentaj jechéˈ:
Max an Okʼoxláb jaˈich anchanáˈ xanti in ulal an Biblia, ¿a chalpayal abal neˈech kin tʼajtsi kin watʼnaˈ i yajtsiktaláb an atiklábtsik xi chemenekich?
¿A belál abal an tsubaxtaláb xin ólnál an Biblia kʼal xanti kʼwajat an chemélomtsik tu kʼijidhmédhál? ¿Jantʼókʼi?
XOWAˈ JUNTSIK IN ULAL: «U chʼejnál ku watʼnaˈ i yajtsiktaláb tam kin chemech».
¿Jowaˈ pejats kʼal an Biblia a ejtowal ka éynaˈ abal ka kʼijidhmédhaˈ jun i atikláb xin chalpayal anchanáˈ?
XOWAˈ I EXOBNÁMICH
Tam jun i atikláb u chemel yabich in choˈób ni jun xataˈ. An chemélomtsik yabich in watʼnál i yajtsiktaláb, nibal in ejtowal kin tʼajtsi jun xataˈ xi yab alwaˈ kʼeˈet i atikláb.
Ki chalpay xowaˈ i exobnámal
¿In óntsal ka kʼwajay ejat an atiklábtsik xi chemnekich?
¿Jantʼó tu tolmiyal ki exlaˈ an tsubaxtaláb kʼal tin kwentaj janti kʼwajat an chemélomtsik?
¿Jantʼó tu kʼijidhmédhál ki choˈóbnaˈ an tsubaxtaláb kʼal tin kwentaj an chemélomtsik?
KA EXLAˈ JUN XATAˈ MÁS
Ka exóbnaˈ xowaˈ in léˈ kin uluw an káw alma ban Biblia.
Ka chuˈuw max an Okʼoxláb tsubax in tsikál an atiklábtsik xi atʼax.
¿Tsubax in watʼnál i yajtsiktaláb an atiklábtsik ban kʼamal? (3:07)
¿Koˈol ki chʼejnaˈ an chemélomtsik?
Ka exlaˈ janti ti tolmiyat jun i inik tam tin exóbnaˈ janéy u watʼel tam jun i atikláb u chemel.