AJUMTALÁB 02
An Biblia tu pidhál ti aytsixtaláb
Tin pubél an Chabál an atiklábtsik in watʼnál i yajtsiktaláb, i dhukʼeltaláb, i tʼeˈpintaláb ani jechéˈ in tʼajál abal ka tʼeˈpintsik tʼajat. ¿A watʼnámal tatáˈ jun a kʼitsáj anchanˈ? Awich xónaˈ a koˈol jun i yawˈlách o chemech jun a yanél, ani awich xónaˈ ka konoy tabáˈ max jun a kʼitsáj neˈech ka wixkʼan an yajtsiktaláb. Por an tokʼoxtaláb xi tu pidhál an Biblia tu kʼijidhmédhál.
1. ¿Jantʼom aytsixtaláb tu pidhál an Biblia?
An Biblia tu óltsal jantʼó ti waˈach yan i dhukʼeltalábtsik xowéˈ, por jeye tu okʼtsal abal an yajtsiktalábtsik xi kʼwajat i watʼnál yab neˈech ka kʼwajay abal echʼekʼij. Xowaˈ in ulal an Okʼoxláb neˈech kin tʼajaˈ, tu pidhál «jun i aytsixtaláb ban kʼij xi taˈtál» (ka ajay Jeremías 29:11, 12). Xowaˈ in ulúmal an Okʼoxláb neˈech kin tʼajaˈ, tu tolmiyal abal ki kuxuy an dhukʼeltalábtsik xowéˈ ani ku kʼwajay más kʼijidh. Jeye tu tsubkʼantsal abal i ejtowal ku kʼwajay kulbél abal echʼekʼij.
2. ¿Janti in ulal an Biblia abal neˈech ku kʼwajay ban kʼij xi taˈtál?
An Biblia tu óltsal abal ban kʼij xi taˈtál «yabich neˈech ka waˈchin i chemlá, nibal i ukʼil, nibal i tʼeˈpintaláb, nibal i yajal» (ka ajay Apokalipsis 21:4). Tajaˈ yabich neˈech ka waˈchin xowaˈ xoˈ tu tʼeˈpindhál tʼajat: jelti an chʼojontaltaláb, an atʼaxtaláb, an yawˈlách ani an chemlá. An Biblia tu óltsal abal an atiklábtsik neˈech kin ejto ka kʼwajay abal echʼekʼij ba jun i alabél chabál.
3. ¿Janéy neˈech ti tolmiy ka belaˈ xowaˈ in ulal an Biblia?
Yan i atiklábtsik in aytsal ka lejkin jechéˈ i kʼij, por yabtsik in belál max tsubax lejtal neˈech ka lejkin. Por xowaˈ in ulal an Biblia i ejtowaljaˈ ki belaˈ kom echʼekʼij u tʼajnal xowaˈ in ulal. I ejtowal ki belaˈ an aytsixtaláb xin ólnál an Biblia max ki exóbnaˈ «tsudhey ka tsudhey» an Biblia (Hechos 17:11). Jechéˈ neˈech ti tolmiy tabáˈ ka belaˈ max tsubax o yab tsubax xowaˈ in ulal an Biblia.
ABAL KI EXÓBNAˈ MÁS
Ki exóbnaˈ juntsik i alwaˈtalábtsik xi in ulal an Biblia abal neˈech ka tʼajan ban kʼij xi taˈtál ani ki chuˈuw janti kʼwajat in tolmiyal an atiklábtsik jechéˈ i kʼij.
4. An Biblia tu okʼtsal abal i ejtowal ku kʼwajay kʼijidh abal echʼekʼij
Ka chuˈuw chaˈat an alwaˈtalábtsik xi in ólnál an Biblia. ¿Jowaˈ a kulbetnál más ani jantʼó?
Ka ajaytsik an pejats xi káldhats ban Biblia ani ki tʼilmáchtsik kʼal tin kwentaj jechéˈ:
¿A belál abal xowaˈ in ólnál an Biblia in ejtowal ti pidhaˈ ti aytsixtaláb? O ¿A koˈol jun a yanél o jun a jaˈúb xin ejtowal ka tolmiyat kʼal jechéˈ?
Ka chalpay abal i kʼwajílich anchéˈ:
YAB XITAˈ... |
EJTAL AN ATIKLÁBTSIK... |
|---|---|
|
|
|
|
|
|
|
|
|
|
5. An aytsixtaláb xin pidhnál an Biblia in ejtowal tu tolmiy ba ni xeˈchintal
Yan i atiklábtsik kʼwajat tʼeˈpidh kʼal an dhukʼeltalábtsik xi waˈach ban kʼaylál. Ani juntsik in tʼajál yan i chápláb abal kin lejkiy an xeˈchintaláb, por ka chuˈuw janti an aytsixtaláb xi tu pidhál an Biblia kʼwajat in tolmiyal yan i atiklábtsik. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
Kʼal xowaˈ i chuˈuw ban video, ¿janéy in léˈak kin tʼajaˈ na Rafika?
Aunque an atʼaxtaláb in ojontsi, ¿por jajáˈ janti tolmiyat kʼal an Biblia?
An aytsixtaláb xi tu pidhál an Biblia in ejtowal tu tolmiy ku kʼwajay más kulbél ani ki kuxuy an dhukʼeltalábtsik. Ka ajaytsik Proverbios 17:22 ani Romanos 12:12, ani ki tʼilmáchtsik kʼal tin kwentaj jechéˈ:
¿A belál abal an aytsixtaláb xin pidhnál an Biblia in ejtowal ti tolmiy jechéˈ i kʼij? ¿Jantʼó?
XOWAˈ JUNTSIK IN ULAL: «Jachanˈ achʼat tʼajat alwaˈ, por yab u belál max tsubax».
Kom i chuˈúmich abal tsubax u tamnal xowaˈ in ulal an Biblia, ¿a belál abal alwaˈ ki ojontsi ki exóbnaˈ xowaˈ in ulal an Biblia? ¿Jantʼó?
XOWAˈ I EXOBNÁMICH
An Biblia tu okʼtsal abal neˈech ki ejto ku kʼwajay kʼijidh ani kulbél abal echʼekʼij, ani jachanˈ tu pidhál i aytsixtaláb ani tu tolmiyal ki kuxuy an dhukʼeltalábtsik.
Ki chalpay xowaˈ i exobnámal
¿Jantʼó tin yejentsal jun i aytsixtaláb an atiklábtsik?
¿Janéy in ulal an Biblia kʼal tin kwentaj an kʼij xi taˈtál?
¿Janti in ejtowal ti tolmiy xoˈ an aytsixtaláb xin ólnál an Biblia?
KA EXLAˈ JUN XATAˈ MÁS
Ka exóbnaˈ janti in ejtowal ti tolmiy an aytsixtaláb.
«¿Jonti i ejtowal ki elaˈ an aytsixtaláb?» (¡Despertad!, 22 de abril de 2004)
Ka chuˈuw janti an aytsixtaláb xi tu pidhál an Biblia in tolmiyámal an atiklábtsik xin koˈol jun i yawˈlách xi yabich u wixkʼanal.
«¿In ejtowal an Biblia tu tolmiy ki kuxuy an yawlách?» (Artículo de jw.org)
Tam ka chuˈuw an video, ka chalpay abal i kʼwajatich kʼal na yanél ban alabél chabál xin ulal an Biblia.
Ka chuˈuw janti tolmiyat kin jalkʼuy nin xeˈchintal jun i inik, tam tin exóbnaˈ an aytsixtaláb xin pidhnál an Biblia.
«Yabich xoˈ u léˈ ku jalkʼuy an xeˈchintaláb» (La Atalaya, 1 de julio de 2013)