Tam ti waˈchin an Pulek Pubénib ti wejéˈ: ¿jitaˈtsik in tʼajaˈ ti kwentaj an Okʼoxláb?

An atiklábtsik xi tin kʼitsájil na Noé in tʼajálaktsik yan i atʼaxtaláb (Génesis 6:5)

Na Adán ani na Eva in koˈoy nin chakamiltsik ani yaney an atiklábtsik ban Chabál. Ani tam, juntsik i ángeles in tʼajaˈ jayéchkʼi janti na Satanás ani in chʼikat tʼajaˈ an Okʼoxláb.

Jajáˈtsik paˈay techéˈ ti Chabál, ani wenkʼon ti atiklábtsik abal kin ejto ka tomkin kʼal an uxumtsik. Tayíl in koˈoy nin chakamiltsik xi wenkʼontsik jeye lej atʼax ani más chapniˈ kej xi kʼeˈet an atiklábtsik.

An atiklábtsik xi atʼax yaney techéˈ ban Chabál. An Tʼokat Dhutslab in ulal «abal nin atʼaxtalábil an atiklábtsik yaney tʼajat ban Chabál» kom an atiklábtsik tokot in chalpayalak kin tʼajaˈ xowaˈ xi yab alwaˈ.

Na Noé in tʼajaˈ ti kwentaj an Okʼoxláb ani in tʼajaˈ jun i pulek tan atáj (Génesis 6:13, 14, 18, 19, 22; Hebreos 11:7)

Na Noé jaˈichak jun i alwaˈ inik. Na Jehová in utsaˈ abal neˈechak kin wixkʼaˈ an atiklábtsik xi atʼax kʼal jun i pulek pubénib.

In utsaˈ kin tʼajaˈ jun i pulek tan atáj xi kin ejto ka madhadhalách ban jaˈ. Xi bijyat nin tanil na Noé. Tajaˈ in koˈolak kin baliy nin yaníl ani jeye an koˈnéltsik.

Na Noé in óltsi an atiklábtsik abal neˈechak ka tsích jun i pulek pubénib, por yabtsik tʼajaxin ti kwentaj. Juntsik téˈtsikixin ani kʼeˈettsik chakuytsik tʼajat.

Tam ti na Noé in talaˈ kin tʼajaˈ an pulek tan atáj, in baliy an koˈnéltsik.