¿Janéy a chalpayal kʼal an xeˈchintaláb xi taˈtál?

XOWAˈ IN ULAL AN TʼOKAT DHUTSLAB

«Neˈech ka kʼwiˈtsintsik tin jaˈmál nin wal kʼal [an Okʼoxláb] ani yabich neˈech ka waˈchin i chemlá, nibal i ukʼil, nibal i tʼeˈpintaláb, nibal i yajal; pos ejtal xowaˈ xi waˈachwiˈik, watʼéch.» (Apokalipsis 21:3, 4, Nuevo Testamento Huasteco de Veracruz.)

JANTI TU TOLMIYAL KI CHOˈÓBNAˈ

Ejtal an tʼojláb xi ki tʼajaˈ neˈech ka labey ani neˈech tu kʼijidhmédhaˈ (Isaías 65:21-23).

Neˈech ki jilaˈ tu tʼeˈpinal ani yabich neˈech ku yawlách (Isaías 25:8; 33:24).

Neˈech ku kʼwajay kʼijidh abal echʼekʼij, kʼal ejtal xitaˈ i kʼanidhál (Salmo 37:11, 29).

¿I EJTOWAL KI BELAˈ XOWAˈ IN ULAL AN TʼOKAT DHUTSLAB?

Anchanˈ, waˈach cháb i tsubaxtaláb:

• An Okʼoxláb in koˈol an chápláb abal kin tʼajaˈ jechéˈ xowaˈ in ulúmalich. An Tʼokat Dhutslab in ulal abal tokot jajáˈ jaˈich, xi ejtal in ejtowal kin tʼajaˈ, kom nin cháp yab in koˈol in okʼontal (Apokalipsis 15:3). Anchanˈ, tam jajáˈ in ulal abal neˈech kin lejkiy an xeˈchintaláb, i ejtowal ki belaˈ abal tsubax neˈech kin tʼajaˈ. Janti in ulal an Tʼokat Dhutslab, ‹an Okʼoxláb ejtal in ejtowal kin tʼajaˈ› (Mateo 19:26).

• An Okʼoxláb in léˈ kin tʼajaˈ jechéˈ xowaˈ in ulúmalich. Kʼal tin kwentaj an atiklábtsik xi chemnekich, an Tʼokat Dhutslab in ulal abal na Jehová in léˈ tʼajat kin ejdhaˈ an chemélomtsik (Job 14:14, 15).

  Ani jeye in ulal abal na Jesús, in chakámil an Okʼoxláb in jeldhaˈ i yaˈultsik. ¿Ani jantʼó tin tʼajaˈ? Kom anchanˈ tin kulbetnaˈ (Marcos 1:40, 41). Kʼal xowaˈ in tʼajaˈ in xalkʼaˈ xowaˈ in léˈ kin tʼajaˈ nin tátaˈ abal kin tolmiy xitaˈ más in yejentsal (Juan 5:19).

  Kʼal jechéˈ i ejtowal ku kʼwajay lej tsububudh abal na Jehová ani na Jesús in léˈ abal wawáˈ ki koˈoy jun i kʼijidh xeˈchintaláb (Salmo 72:12-14; 145:16; 2 Pedro 3:9).