¿In ejtowal an chemélomtsik ka witsiy ti kʼwajíl?

XOWAˈ IN ULAL AN TʼOKAT DHUTSLAB

‹An Okʼoxláb neˈech kin ejdhaˈ ti ít an chemélomtsik.› (Hechos 24:15, Nuevo Testamento Huasteco de Veracruz.)

JANTI TU TOLMIYAL KI CHOˈÓBNAˈ

Neˈech ki elaˈ i kʼijidhmédhaxtaláb, tam ka chemech jun xitaˈ xi i kʼanidhál (2 Corintios 1:3, 4).

Yabich neˈech ki lej chʼejnaˈ an chemlá (Hebreos 2:15).

Neˈech ki koˈoy jun i alwaˈ aytsixtaláb, abal neˈech ku witsiy ki chuˈuw ni kidhtaltsik xi chemnekich (Juan 5:28, 29).

¿I EJTOWAL KI BELAˈ XOWAˈ IN ULAL AN TʼOKAT DHUTSLAB?

Anchanʼ, waˈach óx i tsubaxtaláb:

• An Okʼoxláb in tʼajaˈ ka waˈchin an ejataláb. An Tʼokat Dhutslab in ulal abal na Jehová tu pidhál an ti xeˈchintaláb, ani tu tʼajál ku dhútsumlách (Hechos 17:24, 25; Salmo 36:9). Max jajáˈ in ejto kin pidhaˈ in xeˈchintal ejtal xowaˈ xi ejat, i ejtowal ki belaˈ abal neˈech juní kin pidhaˈ tin xeˈchintal an atiklábtsik xi chemnekich.

• An Okʼoxláb in witsbantsámalich tin xeˈchintal juntsik i atiklábtsik. An Tʼokat Dhutslab in olnál waxik i atiklábtsik xi witsbantsat tin xeˈchintal, inik ani uxumtsik, tsʼitsik ani pakél, xi witsiytsik ti kʼwajíl techéˈ ti chabál. Juntsik tamkʼi ti chemnek, por jun i atikláb in neˈdhálich chéˈ a kʼitsáj ti chemnek (Juan 11:39-44).

• An Okʼoxláb in léˈich kin witsbantsi tin xeˈchintal an chemélomtsik. An Okʼoxláb Jehová in atʼál an chemlá, jajáˈ in chuˈtal jelti nin atʼawál (1 Corintios 15:26). Jajáˈ in léˈich tʼajat kin wixkʼaˈ jechéˈ in atʼawál, ani neˈech kin tʼajaˈ tam kin witsbantsi tin xeˈchintal an chemélomtsik. Jajáˈ in léˈ abal ka kʼwajaytsik ti ít techéˈ ti chabál jitaˈtsik kʼwajat tin chalapil (Job 14:14, 15).