AJUMTALÁB 16
¿Janéy in tʼajaˈ na Jesús tam ti kʼwajay techéˈ ti Chabál?
Yan i atiklábtsik tam in chalpayal na Jesús tokot in chalpayalkʼi jelti jun i chakam chipíl, o jelti jun i atikláb xi lej chalpadh. Por max ki exóbnaˈ kʼal xowaˈ in tʼajaˈ techéˈ ti Chabál, ¿yab xekʼej tsubax neˈech ki exlaˈ más? Ba jechéˈ i ajumtaláb neˈech ki exóbnaˈ juntsik xanéy xi lej exbadh xin tʼajaˈ na Jesús, ani janti in ejtowal ti tolmiy tatáˈ.
1. ¿Jantʼom tʼojláb xi más exbadh in tʼajaˈ na Jesús?
Abal na Jesús lej exbadhak kin «tʼiltsitsik an ti alwaˈ tʼilab» an atiklábtsik (ka ajay Lukas 4:43). In ólnaˈ an alwaˈ tʼilab kʼal tin kwentaj nin Takʼixtal an Okʼoxláb, xi neˈech kin wixkʼaˈ ejtal an dhukʼeltalábtsik xin koˈol an atiklábtsik.a Tin nakél óx i tamub kʼal chʼejel kʼwajay kin ólnaˈ jechéˈ i alwaˈ tʼilab (Mateo 9:35).
2. ¿Jantʼó tin tʼajaˈ i labidh labandhaxtaláb na Jesús?
An Biblia in ulal abal na Jesús takudh kʼal na Dios «abal kin tʼajaˈ i pakdhaˈ labidhtaláb, i labidh labandhaxtaláb ani i exóltsik» (Hechos 2:22). Kom an Okʼoxláb in pidhaˈ ti chápláb na Jesús, jajáˈ in ejto kin chamkʼaˈ jun i chapik ikʼ, in kʼapundhaˈ yan i atiklábtsik, in jeldhaˈ i yaˈultsik ani hasta in ejdhaˈ juntsik i chemélomtsik (Mateo 8:23-27; 14:15-21; Markos 6:56; Lukas 7:11-17). Kʼal an labidh labandhaxtaláb xin tʼajaˈ na Jesús, in jilaˈ tajax abal abadh kʼal an Okʼoxláb, ani jeye in tejwaˈmédhaˈ abal an Okʼoxláb in koˈol an chápláb abal kin wixkʼaˈ ejtal an yajtsiktaláb xi watʼnál.
3. ¿Janéy tu okʼtsal kʼal xowaˈ in tʼajaˈ na Jesús tin xeˈchintal?
Na Jesús echʼekʼij in tʼajaˈ ti kwentaj na Jehová (ka ajay Juan 8:29). Jajáˈ in tʼojontsi na Jehová hasta ti chemech, ani in tʼajaˈ xowaˈ punkʼuntsidh kʼal jajáˈ, aunque tamkʼuyat kʼal yan xitaˈ abal yab kin tʼajaˈ. Na Jesús in tejwaˈmédhaˈ abal an atiklábtsik i ejtowal ki tʼojontsi an Okʼoxláb aunque i watʼnál i yajtsiktaláb. Anchanáˈ tám, na Jesús in pidhaˈ in aykóliltsik «jun i okʼtsixtaláb abal jaˈich kin wéwnaˈtsik» (1 Pedro 2:21).
ABAL KI EXÓBNAˈ MÁS
Ki chuˈuw janti in ólnálak an alwaˈ tʼilab na Jesús ani janti in tʼajálak an labidh labandhaxtaláb.
4.Na Jesús in ólnaˈ an alwaˈ tʼilab
Na Jesús beley owdhaˈ i bél abal kin óltsi an atiklábtsik an alwaˈ tʼilab Ka ajaytsik Lukas 8:1 ani ki tʼilmáchtsik kʼal tin kwentaj jechéˈ:
¿Na Jesús tokot in tʼiltsi an alwaˈ tʼilab an atiklábtsik xu junkunalak?
¿Janéy in tʼajaˈ na Jesús abal kin óltsi an atiklábtsik an alwaˈ tʼilab?
An Okʼoxláb in uluw abal an Mesías neˈech kin ólnaˈ an alwaˈ tʼilab. Ka ajay Lukas 4:17-19 ani ki tʼilmáchtsik kʼal tin kwentaj jechéˈ:
¿Janti in kidhbay na Jesús jechéˈ i wejeˈ káw?
¿A chalpayal abal an atiklábtsik xoˈ ta kʼitsáj in yejentsal jeye kin achʼaˈ an alwaˈ tʼilab?
5. Na Jesús in ólnaˈ i okʼtsixtalábtsik xi lej alwaˈ
Na Jesús in ólnaˈ an alwaˈ tʼilab tin kwentaj nin Takʼixtal an Okʼoxláb, por aníl jeye in ólnaˈ i okʼtsixtalábtsik xi tu tolmiyal ba ni xeˈchintal. Ki chuˈuw juntsik i tʼilab xin ólnaˈ ban Sermón del Monte. Ka ajaytsik Mateo 6:14, 34 ani 7:12, ani ki tʼilmáchtsik kʼal tin kwentaj jechéˈ:
¿Jowaˈ jaˈich an alwaˈ takʼixtalábtsik xin pidhnaˈ na Jesús ba jechéˈ i tsʼitsik pejats?
¿A chalpayal abal jechéˈ i takʼixtaláb in ejtowal kin tolmiy an atiklábtsik?
6. Na Jesús in tʼajaˈ i labidh labandhaxtalábtsik
Na Jehová in pidhaˈ na Jesús i chápláb abal kin tʼajaˈ i labidh labandhaxtalábtsik. Abal ka chuˈuw xowaˈ in tʼajaˈ ka ajaytsik Markos 5:25-34 o ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
Kʼal xowaˈ i chuˈuw ban video, ¿janéy in belálak an mímláb xu yaˈul?
¿Janéy a kulbetnaˈ más kʼal jechéˈ i labidh labandhaxtaláb?
Ka ajaytsik Juan 5:36 ani ki tʼilmáchtsik kʼal tin kwentaj jechéˈ:
¿Janéy in xalkʼaˈ na Jesús kʼal an labidh labandhaxtalábtsik xin tʼajaˈ?
¿A choˈóbak?
Yan xataˈ xi choˈób kʼal tin kwentaj na Jesús, kʼwajat ban Biblia ba chéˈ i libros xi u bijyáb ti Evangelios. Xi chéˈ an dhutsumtsik kʼal an Evangelios, na Mateo, Markos, Lukas ani na Juan, in tʼilaˈtsik yan xanéy kʼal tin kwentaj na Jesús xi tsubax watʼey. Tám, tam i ajyal xi chéˈ an Evangelios tu tolmiyal ki exlaˈ nin xeˈchintal na Jesús.
MATEO
in dhutsaˈ an jidhtal Evangelio xin ólnál tin kwentaj na Jesús ani an okʼtsixtalábtsik xin okʼtsixnaˈ, jeye in dhutsaˈ xowaˈ na Jesús in uluw kʼal tin kwentaj nin Takʼixtal na Jehová.
MARKOS
in dhutsaˈ an Evangelio xi más chipíl, ani xanti tin dhutsaˈ tu tolmiyal ki chalpay ani ki exbay lej tajax xowaˈ watʼey tin xeˈchintal na Jesús.
LUKAS
in dhutsaˈ abal na Jesús in pidhaˈ tʼajat tin exbádh an oláb, ani in kʼakʼnaˈ alwaˈ an mímlábtsik.
JUAN
in ólnaˈ janti jaˈich na Jesús, kom in dhutsaˈ janti tu tʼilomak kʼal in jaˈúbtsik ani kʼeˈet i atiklábtsik.
XOWAˈ JUNTSIK IN ULAL: «Na Jesús jaˈich an Okʼoxláb».
¿Janéy a chalpayal tatáˈ?
XOWAˈ I EXOBNÁMICH
Na Jesús in ólnaˈ nin Takʼixtal an Okʼoxláb, in tʼajaˈ i labidh labandhaxtalábtsik ani echʼekʼij in tʼajaˈ ti kwentaj na Jehová
Ki chalpay xowaˈ i exobnámal
¿Jowaˈ jaˈich an tʼojláb xi más exbadh xin tʼajaˈ na Jesús tam ti kʼwajay techéˈ ti Chabál?
¿Janéy in xalkʼaˈ na Jesús kʼal an labidh labandhaxtalábtsik xin tʼajaˈ?
¿Jowaˈ jaˈich an takʼixtalábtsik xin okʼtsixnaˈ na Jesús?
KA EXLAˈ JUN XATAˈ MÁS
¿Janéy jaˈich xowaˈ más in ólnaˈ na Jesús?
«¿Jantʼó ti lej exbadh abal na Jesús nin Takʼixtal an Okʼoxláb?» (La Atalaya, 1 de octubre de 2014)
Ka chuˈuw jantʼó ti tsubax i belál abal an labidh labandhaxtalábtsik xin tʼajaˈ na Jesús tsubax watʼey.
Ka ajay janti in jalkʼuy in ejattal jun i inik tam tin exóbnaˈ abal na Jesús yab in kʼanidhaˈ tokot tin baˈ.
«Tokot u léˈak ku tʼajaˈ xowaˈ u léˈ» (La Atalaya, 1 de octubre de 2014)
Ka chuˈuw xowaˈ in watʼnaˈ na Jesús tin xeˈchintal.
a Ban ajumtalábtsik 31 hasta ti 33 u wilkáb más kʼal tin kwentaj janéy jaˈich nin Takʼixtal an Okʼoxláb.