AJUMTALÁB 18
¿Janti i ejtowal ki choˈóbnaˈ jitaˈ jaˈich nin tsubax aykóliltsik na Kristo?
Yan i atiklábtsik in ulal abal u aykol kʼal na Kristo, por xowaˈ in beláltsik ani xowaˈ in tʼajáltsik júnich tʼajat. Tám, ¿janti i ejtowal ki choˈóbnaˈ xi tsubaxtsik u aykol kʼal na Kristo?
1. ¿Janti jaˈich jun i tsubax aykol kʼal na Kristo?
An kristianotsik jaˈich i aykoltsik xu belom kʼal na Jesús (ka ajay Hechos 11:26). ¿Janti in tejwaˈmedhál abal tsubax u aykoltsik? Na Jesús in uluw: «Max tatáˈtsik yab ka jilaˈ ka belaˈ xowaˈ tu utsáltsik, tsubaxich tám tu exóbaliltsik» (Juan 8:31). Jechéˈ in léˈ kin uluw kej nin tsubax aykóliltsik na Jesús koˈol kin tʼajaˈ ti kwentaj nin okʼtsixtal. An tsubax aykoltsik kʼal na Kristo in tʼajáltsik ti kwentaj xowaˈ in ulal an Biblia, anchanˈ xanti na Jesús in tʼajálak (ka ajay Lukas 24:27).
2. ¿Janti in tejwaˈmedhál i kʼanidhomtaláb nin tsubax aykóliltsik na Kristo?
Na Jesús in utsaˈ nin exóbaliltsik: «Ki kʼánídháxintsik jún ani jún jelt xan ti Nanáˈ tu kʼanidháltsik» (Juan 15:12). ¿Janti in tejwaˈmédhaˈ na Jesús abal in kʼanidhál nin exóbaliltsik? In jolkʼantsi ti kʼij, in kʼanatbédhaˈ ani in tolmiytsik, hasta in pidhnaˈ nin ejattal abal jajáˈtsik (1 Juan 3:16). Anchanˈ jelti na Jesús, nin tsubax aykóliltsik yab tokot in ulal abal u kʼánídháxtsik; más alwaˈ in tejwaˈmedhál kʼal xowaˈ in tʼajáltsik.
3. ¿Jantʼom tʼojláb in tʼajál nin tsubax aykóliltsik na Kristo?
Na Jesús in punkʼuntsi jun i tʼojláb nin exóbaliltsik: in abaˈtsik abal kin tʼilaˈ tin kwentaj nin Takʼixtal an Okʼoxláb (Lukas 9:2). Ti wejeˈ an okʼox belomtsik yab tokot in ólnálak an alwaˈ káw xonti in kʼakʼnálaktsik an Okʼoxláb, más alwaˈ u kʼalelak ti bél o bin kʼimáˈ an atiklábtsik (ka ajay Hechos 5:42; 17:17). Xoˈ ta kʼitsáj jeye nin aykóliltsik na Kristo anílkʼi jeye in ólnál an alwaˈ tʼilab xontikʼi xonti waˈach i atiklábtsik. Kom in kʼanidhál an atiklábtsik, jaxtám kʼal i kulbétaláb in jolkʼáltsik i kʼij abal kin óltsi an aytsixtaláb xin ólnál an Biblia (Markos 12:31).
ABAL KI EXÓBNAˈ MÁS
Ki chuˈuw jantʼó ti júnich nin tsubax aykolil na Kristo kʼal an atiklábtsik xi yabtsik in tʼajál ti kwentaj nin okʼtsixtal na Jesús.
4. In tʼajáltsik ti kwentaj xowaˈ in ulal an Biblia
Nin okʼox aykóliltsik na Jesús in tʼajálak ti kwentaj xowaˈ in ulal an Biblia.
Juntsik i atiklábtsik xin ulal abal u aykol kʼal na Kristo, in chalpayaltsik abal yab yejat kin exbay ani kin tʼajaˈ ti kwentaj xowaˈ in ulal an Biblia. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajaˈ juntsik i belomtalábtsik xin ulal u aykol kʼal na Kristo, abal an atiklábtsik yab kin exóbnaˈ xowaˈ na Jesús in okʼtsixnaˈ?
Na Jesús in okʼtsixnaˈ an tsubaxtaláb xi kʼwajat ba nin Káwintal an Okʼoxláb. Ka ajaytsik Juan 18:37 ani ki tʼilmáchtsik kʼal tin kwentaj jechéˈ:
Kʼal xowaˈ in uluw na Jesús, ¿janti i ejtowal ki choˈóbnaˈ jitaˈ jaˈich an belomtsik xi kʼwajat ban «tsubaxtaláb»?
5. In ólnáltsik xowaˈ in ulal an Biblia
Nin okʼox aykóliltsik na Jesús in ólnálak an alwaˈ káw.
Okʼox ti ka kʼale na Jesús tuwaˈ walkʼiˈ, in punkʼuntsi nin aykóliltsik jun i tʼojláb xi bél exom ti tʼajnal. Ka ajaytsik Mateo 28:19, 20 ani Hechos 1:8, ani ki tʼilmáchtsik kʼal tin kwentaj jechéˈ:
¿Hasta jonti ani hasta jowkʼi koˈol ka ólná an alwaˈ káw?
6. In tʼajáltsik xowaˈ in ólnál
¿Jantʼó tin belálak na Tom abal in elámal nin tsubax aykóliltsik na Kristo? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
Kʼal xowaˈ i chuˈuw ban video, ¿jantʼó ti yab in kulbétnaˈ na Tom an belomtaláb xonti kʼwajatak?
¿Jantʼó tin belál na Tom abal in elámal an tsubaxtaláb?
I tʼajál xowaˈ i belál. Ka ajaytsik Mateo 7:21 ani ki tʼilmáchtsik kʼal tin kwentaj jechéˈ:
¿Janéy jaˈich xowaˈ más exbadh abal na Jesús: xowaˈ i ulal i belál, o xowaˈ i tʼajál?
7. U kʼánídháxtsik jún ani jún
Nin okʼox aykóliltsik na Jesús u kʼánídháxtsik.
An belomtsik xi tsubax, ¿in loˈómal in at kidhábtsik? Ka chuˈutsik an VIDEO Ani ki tʼilmáchtsik kʼal tin kwentaj jechéˈ:
¿Kʼal janéy ti tolmiyat an kidháb Lloyd abal kin léˈnaˈ kin pidhnaˈ in ejattal abal kin loˈo an kidháb Johansson?
¿A chalpayal abal tsubax in tejwaˈmédhaˈ abal u aykol kʼal na Kristo?
Ka ajaytsik Juan 13:34, 35 ani ki tʼilmáchtsik kʼal tin kwentaj jechéˈ:
¿Janti koˈol kin kʼakʼnaˈ nin aykóliltsik na Jesús an atiklábtsik xi tál ba píl i bitsow o júnich in wal?
¿Ani janéy neˈech kin tʼajaˈtsik tam ka waˈchin jun i péjextaláb?
XOWAˈ JUNTSIK IN ULAL: «An Okʼoxláb in bachʼwal ejtal an belomtalábtsik».
¿Jantʼom texto neˈech ka éynaˈ abal ka ólnaˈ jitaˈ jaˈich nin tsubax aykóliltsik na Kristo?
XOWAˈ I EXOBNÁMICH
Nin tsubax aykóliltsik na Jesús in tʼajáltsik ti kwentaj xowaˈ an Biblia in okʼtsixnál ani in tolmiyal xi kʼeˈettsik kom in kʼanidhál, ani in ólnáltsik an alwaˈ tʼilab tin kwentaj an Biblia.
Ki chalpay xowaˈ i exobnámal
¿Jonti in káldháltsik xowaˈ in belál nin tsubax aykóliltsik na Kristo?
¿Janéy jaˈich xowaˈ in tejwaˈmedhál nin tsubax aykóliltsik na Kristo?
¿Jowaˈ jaˈich an tʼojláb xin tʼajáltsik?
KA EXLAˈ JUN XATAˈ MÁS
Ka exlaˈ más alwaˈ jun i bukeˈ i atiklábtsik xin chápnantsal kin tʼajaˈ xowaˈ na Jesukristo in okʼtsixnaˈ.
Ka ajay janti jun i mímláb xi kʼwajay ti monja in elaˈ «in jaˈúbtsik xi kʼál tu kʼanidháb».
«In tokʼontsat ejtal an konowixtalábtsik kʼal an Biblia» (La Atalaya, 1 de abril de 2014)
Ka chuˈuw janti nin tsubax aykóliltsik na Jesús in kʼanidhál ani in tolmiyal nin at kidhábtsik.
I tolmiyal ni at kidhábtsik tam u watʼel jun i kʼakʼadhtaláb (chakam pejats) (3:57)
Ka exóbnaˈ xowaˈ in uluw na Jesús abal xanti neˈech ka exlá nin tsubax aykóliltsik. Ani ka chuˈuw abal xowaˈ in tʼajálak an okʼox belomtsik ti wejeˈ, jayéchkʼi in tʼajál nin aykóliltsik na Jesús xoˈ ta kʼitsáj.
«¿Kʼal janti tu exláb nin aykóliltsik na Kristo?» (La Atalaya, 1 de marzo de 2012)