AJUMTALÁB 19
¿Jaˈich an óltsixtsik kʼal a Jehová an belomtsik xi tsubax?
An óltsixtsik kʼal a Jehová i belál abal tsubax u belom kʼal na Kristo. ¿Jantʼókʼi ti belál anchanˈ? Ki exóbnaˈ jonti káldhál xowaˈ i belál ani an bijláb xi koˈol, ani ki exóbnaˈ janti i tejwaˈmedhál i kʼanidhomtaláb.
1. ¿Jonti in káldháltsik xowaˈ in belál an óltsixtsik kʼal a Jehová?
Na Jesús in utsaˈ an Okʼoxláb: «Na káwintal jaˈich an tsubaxtaláb» (Juan 17:17). An óltsixtsik kʼal a Jehová i tʼajál xowaˈ na Jesús in tʼajaˈ: echʼekʼij i káldhál xowaˈ i belál ba nin Káwintal an Okʼoxláb. Ki chuˈuw janéy in tʼajaˈ an óltsixtsik kʼal a Jehová tam ti tujeykʼi. Ban tamub 1870, jun bukeˈ i exóbaltsik kʼal an Biblia tujeytsik kin exóbnaˈ más alwaˈ an Biblia abal kin exbay. In tʼajaˈtsik xowaˈ in ulal an Biblia aunque xi kʼeˈet i belomtalábtsik in okʼtsixnálak kʼeˈet xanéy. Ani tayíl in tʼiltsi xi kʼeˈettsik xowaˈ in exobnámaltsik.a
2. ¿Jantʼó ti bijnál tu óltsixtsik kʼal a Jehová?
Na Jehová in ulal abal an atiklábtsik xi kʼál tu kʼakʼnáb jaˈich i óltsixtsik, kom in ólnál an tsubaxtaláb tin kwentaj jajáˈ (Hebreos 11:4-12:1). Ti wejeˈ, na Jehová in utsaˈ nin bitsówil: «Tatáˈtsik jaˈich i óltsixtsik kʼal nanáˈ» (ka ajay Isaías 43:10). Ani na Jesús u bijyáb an «lujat óltsix» (Apokalipsis 1:5). Jaxtám ti 1931 i takuy an bijláb óltsixtsik kʼal a Jehová ani u kulbél tʼajat ki bijnaˈ anchanáˈ.
3. An óltsixtsik kʼal a Jehová, ¿janti in tejwaˈmedhál i kʼanidhomtaláb anchanˈ jelti na Jesús?
Na Jesús in kʼanidhálak tʼajat nin aykóliltsik ani in chuˈtalak jelti nin yanél (ka ajay Markos 3:35). An óltsixtsik kʼal a Jehová u kʼwajat jeye juniniˈ, ani ejtal u kʼwajat jelti jun i yaneláb. Jaxtám tu bíjíx jún ani jún jelti «kidhábláb» (Filemón 1, 2). Aníl jeye, i tʼajál ti kwentaj jechéˈ i takʼixtaláb: «Ka kʼanidhaˈ na at kidhábtsik» (1 Pedro 2:17). An óltsixtsik kʼal a Jehová i tejwaˈmedhál jeché i kʼanidhomtaláb, tam i tolmiyal an kidháblábtsik tin pubíl an Chabál tam in watʼnál jun i yajtsiktaláb.
ABAL KI EXÓBNAˈ MÁS
Ki exlaˈ xowaˈ in watʼnámal an óltsixtsik kʼal a Jehová ani ki chuˈuw jantʼó ti belál abal wawáˈ tsubax u aykol kʼal na Kristo.
An belomtsik xi tsubax in beláltsik xowaˈ in ulal an Biblia ani in óltsaltsik kʼeˈet i atiklábtsik.
4. Xowaˈ i belál káldhats ban Biblia
Na Jehová in uluw abal xowaˈ in ólnál an Biblia neˈech ka exbayat más alwaˈ. Ka ajaytsik Daniel 12:4 ani ki tʼilmáchtsik kʼal tin kwentaj jechéˈ:
¿Janéy neˈechak ka «yaney» tam an óltsixtsik kʼal a Jehová kin exóbnaˈtsik más alwaˈ an Biblia?
Ka chuˈuw janti in exóbnálak an Biblia na Charles Rusell ani nin juniktsik. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
Kʼal xowaˈ i chuˈuw ban video, ¿janti in exóbnálak an Biblia na Charles Russell ani xi más nin juniktsik?
¿A choˈóbak?
Juntsikíl i jalkʼuyámal juntsik i óltsixtalábtsik. ¿Jantʼókʼi? Jaˈich kom an Okʼoxláb tu tolmiyámal kʼayúm ti kʼayúm ki exbay nin Káwintal, anchanˈ jelti tam u tsudhél kʼayúm ti kʼayúm neˈech ti tajkʼanal ani i ejtowal ki chuˈuw xowaˈ waˈach (ka ajaytsik Proverbios 4:18). Xowaˈ in ulal an Biblia yab u jalkʼunal, por tam i exbayal más alwaˈ i jalkʼuyal an okʼtsixtalábtsik.
5. I ólnál an tsubaxtaláb tin kwentaj na Jehová
¿Jantʼó ti takuy ki bijnaˈ tu óltsixtsik kʼal a Jehová? Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti lej alwaˈ ki bijnaˈ óltsixtsik kʼal a Jehová?
¿Jantʼó tin takwyámal na Jehová an atiklábtsik abal ti óltsixtsik? Kom uludh yan i kʼambixtalábtsik tin kwentaj jajáˈ, jaxtám jechéˈ i atiklábtsik in ólnál an tsubaxtaláb kʼal tin kwentaj na Jehová, an Okʼoxláb xi tsubax. Ki chuˈuw juntsik i kʼambixtaláb xi uludh.
Juntsik i belomtaláb in okʼtsixnál abal an Okʼoxláb in léˈ ki éynaˈ i chʼilabtsik abal ki kʼakʼnaˈ. ¿Pero tsubax jechéˈ? Ka ajaytsik Levítico 26:1 ani ki tʼilmáchtsik kʼal tin kwentaj jechéˈ:
Kʼal xowaˈ in ulal an versículo, ¿jowaˈ jaˈich an tsubaxtaláb? ¿Janéy in chalpayal na Jehová tin kwentaj an chʼilabtsik?
Juntsik i okʼlek belomtsik in okʼtsixnál abal na Jesús jaˈich an Okʼoxláb. ¿Pero tsubax jechéˈ? Ka ajaytsik Juan 20:17 ani ki tʼilmáchtsik kʼal tin kwentaj jechéˈ:
Kʼal xowaˈ in ulal an versículo, ¿jowaˈ jaˈich an tsubaxtaláb? ¿Jaˈich na Jesús an Okʼoxláb?
¿Janéy a achʼál kom na Jehová in punkʼuntsámal an óltsixtsik abal kin ólnaˈ an tsubaxtaláb tin kwentaj jajáˈ ani nin Chakámil?
6. U kʼánídháx jún ani jún
An Biblia in ulal abal nin aykóliltsik na Kristo kʼwajattsik juniniˈ jelti max jaˈich junkʼi i atikláb. Ka ajaytsik 1 Korintios 12:25, 26 ani ki tʼilmáchtsik kʼal tin kwentaj jechéˈ:
¿Janéy in tomnáltsik kin tʼajaˈ an belomtsik tam kʼeˈettsik in at belom in watʼnál i yajtsiktaláb?
Kʼal xowaˈ tatáˈ a chuˈúmal, ¿janti tu kʼánídháxtsik an óltsixtsik kʼal a Jehová?
Tam an óltsixtsik kʼal a Jehová in watʼnál i yajtsiktaláb, xi más nin at kidhábtsik tin pubíl an Chabál jikʼatkʼitsik u tolmix. Abal ka exlaˈtsik xowaˈ in watʼnaˈ juntsik i kidháblábtsik, ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿A chalpayal abal an tolmixtaláb xin pidhnaˈtsik an óltsixtsik kʼal a Jehová in tejwaˈmedhál abal u kánídháx? ¿Jantʼókʼi?
An belomtsik xi tsubax in xalkʼantsaltsik i kʼanidhomtaláb jitaˈ in yejentsal i tolmixtaláb.
XOWAˈ JUNTSIK IN ULAL: «An óltsixtsik kʼal a Jehová jaˈich jun i belomtaláb xi ít ti kalnek».
¿Jowkʼi tin tuju na Jehová kin bijiy «óltsixtsik» an atiklábtsik xi kʼál tu kʼakʼnáb?
XOWAˈ I EXOBNÁMICH
An óltsixtsik kʼal a Jehová jaˈich an belomtsik xi tsubax. Ani u kʼwajat tin pubíl an Chabál ani i kʼakʼnál an Okʼoxláb, jeye i belál xowaˈ in ulal an Biblia ani i ólnál an tsubaxtaláb tin kwentaj na Jehová.
Ki chalpay xowaˈ i exobnámal
¿Jantʼó ti takuy ki bijnaˈ tu óltsixtsik kʼal a Jehová?
¿Janti ti tejwaˈmedhál abal u kánídháx jún ani jún?
¿A chalpayal abal an óltsixtsik kʼal a Jehová jaˈich an belomtsik xi tsubax?
KA EXLAˈ JUN XATAˈ MÁS
Ka exlaˈ más kʼal tin kwentaj wawáˈ.
Ka chuˈuw janti an óltsixtsik kʼal a Jehová in ólnámal an tsubaxtaláb kʼal tin kwentaj jun i óltsixtaláb xi yab tsubax.
Ka chuˈuw an konowixtaláb xi a ejtowal ka kóˈoy tin kwentaj an óltsixtsik kʼal a Jehová.
«Konowixtalábtsik xu tʼajnal kʼal tin kwentaj an óltsixtsik kʼal a Jehová» (Sección de jw.org)
Na Stephen in atʼálak an atiklábtsik, jaxtám tin tʼajaˈ yan i atʼaxtaláb. Ka exlaˈ janéy in chuˈuw kʼal an óltsixtsik kʼal a Jehová abal kin jalkʼuy nin ejattal.
«U tʼajálak tʼaj xowaˈ yab alwaˈ» (La Atalaya, 1 de julio de 2015)
a An revista La Atalaya, tujey ti bukʼwáb ti 1879 ani in ojontsal hasta xoˈ.