AJUMTALÁB 22
¿Janéy a ejtowal ka tʼajaˈ abal ka ólnaˈ an alwaˈ tʼilab?
Tam ti tatáˈ a exóbnaˈ xowaˈ in ulal an Biblia, a chalpay xónaˈ: «¡Ejtal an atiklábtsik koˈol kin choˈóbnaˈ!». Ani tsubax lejtal; ejtal koˈol kin choˈóbnaˈ. Por awich xónaˈ ka achʼaˈ i jikʼél ka tʼiltsi xi kʼeˈettsik xowaˈ kʼwajat a exóbnál. Ki chuˈuw janéy a ejtowal ka tʼajaˈ abal yab ki jikʼey ani anchanˈ ka achʼaˈ i kulbél ka tʼiltsi an alwaˈ tʼilab an atiklábtsik.
1. ¿Janéy a ejtowal ka tʼajaˈ abal ka óltsi na exlowáltsik xowaˈ kʼwajat a exóbnál?
Nin exóbaliltsik na Jesús in ulutsik: «Pos wawáˈ yab neˈech ki ejto ki jilaˈ ki tʼilaˈ xowaˈ i chuˈúmal ani i achʼámal» (Hechos 4:20). Ani anchanˈ tin ulutsik kom in kʼakʼnálak tʼajat xowaˈ in ulal an Biblia ani in léˈak kin tʼiltsi xi kʼeˈettsik. ¿A achʼál teye jayéchkʼi? Tám, ka jolkʼaˈ i kʼij abal ka óltsi na yanél ani na jaˈúbtsik xowaˈ kʼwajat a exóbnál, por ka tʼajaˈ kʼal i kʼakʼnaxtaláb (ka ajaytsik Kolosenses 4:6).
Xowaˈ a ejtowal ka tʼajaˈ abal ka tuju ka ólná an alwaˈ tʼilab
Tam ki tʼilmách kʼal jun a yanél ani abal ka tuju ka óltsi xowaˈ in ólnál an Biblia a ejtowal ka utsaˈ enchéˈ: «Jechéˈ i semana u exóbnaˈ jun xataˈ xi u kulbétnaˈ tʼajat».
Tam jun a jaˈúb u yaˈul o kʼwajat tʼeˈpidh, ka ajtsi jun i texto kʼal an Biblia abal ka kʼijidhmé.
Tam na at tʼojnaltsik ti konoy janéy a tʼajaˈ tin okʼném an semana, a ejtowal ka tʼiltsi xowaˈ a exóbnaˈ ban junkuntaláb o xowaˈ a exóbnaˈ ban Biblia.
Ka óltsi na jaˈúbtsik janti in ejtowal ka ochich ban sitio ti internet jw.org.
Ka kaniy kʼeˈet i atiklábtsik abal ka kʼwajay tam ki okʼtsin kʼal an Biblia o ka óltsi janti in ejtowal kin tʼajaˈ abal kin konoy jun i exobintaláb kʼal an Biblia ti jw.org.
2. ¿Jantʼó ti lej alwaˈ ki kale ta óltsix junax kʼal an junkuntaláb?
Nin aykóliltsik na Jesús yab tokot in óltsi an alwaˈ tʼilab in jaˈúbtsik. Na Jesús in abaˈ nin aykóliltsik «chabtsik ti chabtsik ka okxin ban bitsowtsik ani ban kwentsaltsik» abal kin ólnaˈtsik an alwaˈ tʼilab (Lukas 10:1). Jechéˈ in tʼajaˈ abal yan i atiklábtsik kin ejto kin exlaˈ an alwaˈ tʼilab. Ani jeye, nin aykóliltsik na Jesús kulbétsik tʼajat ka kʼale ti óltsixtsik junax (Lukas 10:17). ¿Janti ta chuˈtal teye max ka tʼajaˈ an chápláb abal ka ejto ki kʼale ta óltsix kʼal an kidháblábtsik?
ABAL KI EXÓBNAˈ MÁS
Ki exóbnaˈ janéy a ejtowal ka tʼajaˈ abal yab ki lej jikʼey ani ki kʼwajay kulbél tam ka ólnaˈ an alwaˈ tʼilab.
3. Na Jehová neˈech ti tolmiy
Juntsik i atikláb xin léˈ ka kʼale ti óltsix u jikʼél, kom yab in choˈób xanéy kin chalpay an atiklábtsik o max neˈech ka ustsikiyat.
Ani tatáˈ, ¿i jikʼél abal ka óltsi an atiklábtsik xowaˈ kʼwajat a exóbnál? ¿Jantʼókʼi?
Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Janéy in tʼajaˈ an kwitóltsik abal yab ka jikʼey?
Ka ajaytsik Isaías 41:10 ani ki tʼilmáchtsik kʼal tin kwentaj jechéˈ:
¿Jantʼó ti koˈol ki olách max a achʼál i jikʼél ka ólnaˈ an alwaˈ tʼilab?
¿A choˈóbak?
Yan i atiklábtsik xi xoˈ jaˈich i óltsixtsik kʼal a Jehová in chalpaytsik abal ni jaykʼi neˈech kin ejto kin ólnaˈ an alwaˈ tʼilab. Ki tʼilaˈ xowaˈ watʼey kʼal na Sergey, jajáˈ in achˈálak lej tʼeˈpidh ani in achʼálak abal yab xataˈ in jalbíl ani tʼojláb in achʼálak ka tʼilmách kʼal kʼeˈet i atiklábtsik. Por jun a kʼitsáj in tuju kin exóbnaˈ an Biblia. Jajáˈ in uluw: «Aunque u achʼálak in jikʼél, u tuju ku tʼiltsi an atiklábtsik xowaˈ kʼwajatak u exóbnál. Ani jachanˈ tin tolmiy tʼajat kin kʼwajay más kulbél ani ku jilaˈ tu chalápil xowaˈ kʼwajatak u exóbnál».
4. Ka kóˈoy i kʼakʼnaxtaláb
Okʼox ti ka óltsi an alwaˈ tʼilab jun i atikláb yab tokot koˈol ka chalpay janéy neˈech ka utsaˈ, ani jeye koˈol ka chalpay janti neˈech ka utsaˈ. Ka ajaytsik 2 Timoteo 2:24 ani 1 Pedro 3:15, ani ki tʼilmáchtsik kʼal tin kwentaj jechéˈ:
¿Janti a ejtowal ka tʼajaˈ xowaˈ in ulal an versículos tam ki tʼilmách kʼal kʼeˈet i atiklábtsik tin kwentaj an Biblia?
Awich xónaˈ juntsik a yanél o juntsik a jaˈúbtsik yab kin kulbétnaˈ xowaˈ kʼwajat a okʼtsal. ¿Janéy koˈol ka tʼajaˈ? ¿Ani janéy yab koˈol ka tʼajaˈ?
¿Jantʼó ti lej alwaˈ ki tʼajtsi ti konowixtalábtsik kʼal i kʼakʼnaxtaláb ani yab tokotkʼi ki utsaˈ xowaˈ koˈol kin belaˈ?
5. Ki ólnaˈ an alwaˈ tʼilab tu tʼajál ku kʼwajay kulbél
Na Jehová in pidhaˈ ti punkʼuntsixtaláb na Jesús abal kin ólnaˈ an alwaˈ tʼilab. ¿Janti in chuˈtalak na Jesús jachanˈ i tʼojláb? Ka ajaytsik Juan 4:34 ani ki tʼilmáchtsik kʼal tin kwentaj jechéˈ:
Ki kʼapu i kʼapnél xi alwaˈ tu tolmiyal ku kʼwajay likat ani ku kʼwajay kulbél. ¿Jantʼó tin uluw na Jesús abal ki ólnaˈ an alwaˈ tʼilab, jaˈich jelti an kʼapnél?
Ani tatáˈ, ¿jantʼom alwaˈtalábtsik a chalpayal neˈech ka bachʼuw max ka ólnaˈ an alwaˈ tʼilab?
Juntsik xanéy xi a ejtowal ka tʼajaˈ
Ban junkuntaláb ti semana, ka chuˈuw janti a ejtowal ka tʼajaˈ abal ka tuju ka ólnaˈ an alwaˈ tʼilab.
Ki tʼilmách kʼal xi ti pidhál an exobintaláb kʼal an Biblia abal ti utsaˈ janéy koˈol ka tʼajaˈ abal ka ejto ki watʼey ka pidhnaˈ i tejwaˈmédhomtaláb. Jechéˈ neˈech ti tolmiy ki kʼwajay tʼojojodh abal ka ejto ka óltsi xi kʼeˈet xowaˈ kʼwajat a exóbnál ban Biblia.
Ka éynaˈ an pejats «Xowaˈ juntsik in ulal» ani «Xowaˈ juntsik in konial» xi kʼwajat ba jechéˈ i libro abal ka chuˈuw janti neˈech ki tokʼon tam ki tʼajtsin i konowixtalábtsik.
XOWAˈ JUNTSIK IN KONIAL: «¿Janta uwats teye? ¿Janéy a tʼajámal?».
¿Janti a ejtowal ka tʼajaˈ abal ka óltsi an atikláb xowaˈ a exobnámal ban Biblia?
XOWAˈ I EXOBNÁMICH
Ki ólnaˈ an alwaˈ tʼilab tu tʼajál ku kʼwajay kulbél ani yab tʼojláb abal ki tuju ki tʼajaˈ.
Ki chalpay xowaˈ i exobnámal
¿Jantʼó ti koˈol ka óltsi an alwaˈ tʼilab xi kʼeˈettsik?
¿Janti neˈech ka ejto ka tʼajaˈ tatáˈ kʼal i kʼakʼnaxtaláb?
¿Janéy a ejtowal ka tʼajaˈ abal yab ki lej jikʼey?
KA EXLAˈ JUN XATAˈ MÁS
Ka exóbnaˈ chéˈ i tolmixtaláb abal xanti ka éynaˈ an tarjeta de contacto jw.org abal ka óltsi an alwaˈ tʼilab an atiklábtsik.
Janti a ejtowal ka éynaˈ an tarjeta de contacto jw.org (1:43)
Ka exóbnaˈ chéˈ xanéy xi neˈech ti tolmiy abal ka ólnaˈ an alwaˈ tʼilab.
«¿I kʼwajat tʼojojodh abal ka tʼajaˈ i aykoltsik?» (La Atalaya, septiembre de 2020)
Ki chuˈuw jun i alwaˈ tʼilab xin ólnál an Biblia xi neˈech tu tolmiy ki kóˈoy i chápláb abal ki ólnaˈ an alwaˈ tʼilab aunque yabél u lej pakdhaˈ.
Ka ajay janti a ejtowal ka óltsi an alwaˈ tʼilab na yanél xi yabél in exlál na Jehová.