AJUMTALÁB 47
¿I kʼwajatich tʼojojodh abal ki pujan?
Jalbintsích abal a exobnámal an Biblia, xoˈ a choˈóbich yan xanéy. Ani awich xónaˈ a tʼajámal juntsik i jalkʼuxtalábtsik abal ka tʼajaˈ xowaˈ a exobnámich. Por awich xónaˈ waˈach jun xanéy xin tʼajál abal yab ka pidhaˈ na ejattal na Jehová ani ki pujan. Ba jechéˈ i ajumtaláb neˈech ki chuˈuw juntsik xanéy xi juntsik in tʼajámal abal kin ejto ka pujan ani xowaˈ tatáˈ a ejtowal ka tʼajaˈ abal ka ejto ki pujan.
1. ¿Janéy yejat ka choˈóbnaˈ kʼal an Biblia okʼox ti ki pujan?
Abal ki pujan tatáˈ koˈol ka kóˈoy jun i exlómtaláb xi lujat kʼal an tsubaxtaláb (1 Timoteo 2:4). Jechéˈ yab in léˈ kin uluw abal koˈol ka choˈóbnaˈ ejtal an tokʼtsixtalábtsik kʼal an Biblia okʼox ti ki pujan. Kom hasta an belomtsik xin neˈdhálich yan i tamub pujadh in yejentsal kin ojontsi kin exóbnaˈ an Biblia (Kolosenses 1:9, 10). Por waˈach jun xanéy xowaˈ koˈol ka exbay lej alwaˈ: an okʼtsixtalábtsik xi más exbadh. Ani an okʼnomtsik ban junkuntaláb neˈech ti tolmiy ka chuˈuw max a koˈolich jechéˈ i exlómtaláb.
2. ¿Janéy koˈol ka tʼajaˈ okʼox ti ki pujan?
An Biblia in ulal: «Ka jilaˈich ta walablomtsik ani ka belaˈichtsik na Dios» (ka ajay Hechos 3:19). ¿Ani janti a ejtowal ka tʼajaˈ jechéˈ? Ka jilaˈ ka tʼajaˈ an walastaláb xi a tʼajál wiˈik ani ka kontsi ti pakwlantsixtaláb na Jehová. Ka kóˈoy tʼokat na xeˈchintal ani anchanˈ ki kʼwajay xanti in kulbetnál an Okʼoxláb. Ani jeye, ki kʼale ban junkuntalábtsik ani ka tuju ta ólnom aunque yabél i pujadh.
3. ¿Jantʼó ti yab koˈol ka jilaˈ kej an jikʼeb kin tʼajaˈ abal yab ki pujan?
Juntsik in chalpayal abal yab neˈech kin ejto kin tʼajaˈ xowaˈ na Jehová in léˈ. Aunque jaˈich tsubax kej juntsikíl awich ka tʼajaˈ jun i walastaláb, anchanˈ xanti in watʼnaˈ juntsik i atiklábtsik xin ólnál an Biblia. Por an Okʼoxláb yab in kontsal nin tʼojnáliltsik ka kʼwajay lej lujat, kom in choˈób abal u walablom (ka ajay Salmo 103:13, 14). Jajáˈ neˈech ka kʼwajay lej kulbél max ka tʼajaˈ an chápláb abal ki kʼwajay lujat. Ani jajáˈ neˈech ti tolmiy ka tʼajaˈ jechéˈ. Kom jajáˈ tu utsál abal ni jun xataˈ «neˈech kin ejto kin tʼajaˈ ke yab ku kʼwajay kʼán kʼal na Dios» (ka ajay Romanos 8:38, 39).
ABAL KI EXÓBNAˈ MÁS
Ki chuˈuw cháb xanéy xi neˈech ti tolmiy abal ki pujan, xi jaˈich: ka exlaˈ na Jehová ani ka bachʼuw nin tolmixtal.
4. Ka exlaˈ más alwaˈ na Jehová
¿Janéy koˈol ka exlaˈ kʼal tin kwentaj na Jehová okʼox ti ki pujan? Koˈol ka exlaˈ lej alwaˈ abal ka kʼanidhaˈ ani abal ka tʼajaˈ ti kwentaj. Ka chuˈutsik an VIDEO xonti in ulal janti in tʼajámal jechéˈ an exóbaltsik kʼal an Biblia xi tin pubél an Chabál. Tayíl ki tʼilmáchtsik kʼal tin kwentaj jechéˈ:
Xanti a chuˈuw ban video, ¿janéy in tolmiy juntsik i exóbaltsik abal ka pujan?
Ka ajaytsik Romanos 12:2 ani ki tʼilmáchtsik kʼal tin kwentaj jechéˈ:
¿Waˈach jun xanéy xi yab a exbayal alwaˈ kʼal tin kwentaj an Biblia? ¿A belál abal an óltsixtsik kʼal a Jehová in ólnál an tsubaxtaláb?
Max yab a exbayal juntsik xanéy, ¿janéy a ejtowal ka tʼajaˈ?
5. Ka jekʼontsi xowaˈkich i kʼibataláb xi ka tamétnaˈ
Ejtal i tametnál i kʼibatalábtsik tam ki pidhaˈ ni ejattal na Jehová ani ku pujan. Abal ka chuˈuw xowaˈ in watʼnaˈ jun i uxum. Ka chuˈutsik an VIDEO. Tayíl ki tʼilmáchtsik kʼal tin kwentaj jechéˈ:
¿Jantʼom kʼibatalábtsik in kóˈoy kin watʼantsi na Narangerel abal kin tʼójontsi na Jehová?
¿Janti in tolmiy nin kʼanidhomtalábil abal na Jehová kin jekʼontsi an kʼibatalábtsik?
Ka ajaytsik Proverbios 29:25 ani 2 Timoteo 1:7, ani ki tʼilmáchtsik kʼal tin kwentaj jechéˈ:
¿Jonti i elál an iniktaláb abal ki jekʼontsi an kʼibatalábtsik?
6. Ka belaˈ tʼajat abal na Jehová neˈech ti tolmiy
Na Jehová neˈech ti tolmiy ka tʼajaˈ xowaˈ jajáˈ in kulbetnál. Ka chuˈutsik an VIDEO ani ki tʼilmáchtsik kʼal tin kwentaj jechéˈ:
¿Jantʼó ti yab in léˈak ti pujnal an exóbal xi ban video?
¿Janéy in tolmiy abal kin belaˈ abal neˈech ka tolmiyat tʼajat kʼal na Jehová?
Ka ajaytsik Isaías 41:10, 13 ani ki tʼilmáchtsik kʼal tin kwentaj jechéˈ:
¿Jantʼó ta ejtowal ka belaˈ abal neˈech ka ejto ka tʼajaˈ xowaˈ na Jehová in kulbetnál tam ki pujan?
7. Ka kʼakʼnaˈ abal na Jehová ti kʼanidhál
Tam más ka chalpay abal na Jehová ti kʼanidhál, más neˈech ka kʼanidhaˈ ani más neˈech ka léˈnaˈ ka tʼójontsi abal echʼekʼij. Ka ajaytsik Salmo 40:5 ani ki tʼilmáchtsik kʼal tin kwentaj jechéˈ:
¿Jowaˈ chʼejwalixtaláb xi ti pidhámal na Jehová a kʼakʼnál tʼajat?
An tʼiltsix Jeremías in kʼanidhálak tʼajat na Jehová ani nin Káwintal, in kʼakʼnálak tʼajat abal kʼwajatak in tʼójontsal na Jehová. Jajáˈ in uluw: «Na káwintal wenkʼon ti kʼijidhtaláb ani kulbetaláb abal nu itsích, kom nanáˈ u neˈdhál na bij, oh, Jehová» (Jeremías 15:16). Xoˈ ka tokʼoy jechéˈ i konoxtalábtsik:
¿Jantʼó ti kʼakʼnál tʼajat abal u óltsix kʼal a Jehová?
¿A léˈ ki pujan abal ki wenkʼon ta óltsix kʼal a Jehová?
¿Waˈach jun xanéy xin tʼajál abal yab ki pujan?
¿Janéy a ejtowal ka tʼajaˈ abal ka ejto ki pujan?
XOWAˈ JUNTSIK IN ULAL: «U chʼejnál yab ku ejto ku tʼajaˈ xowaˈ in kulbetnál an Okʼoxláb tayíl tam kin pujan».
¿Anchanˈ a achʼál?
XOWAˈ I EXOBNÁMICH
Kʼal nin tolmixtal na Jehová, neˈech ka ejto ka átaˈ xowaˈkich i kʼibataláb xin tʼajál abal yab ki pujan.
Ki chalpay xowaˈ i exobnámal
¿Janéy yejat ka choˈóbnaˈ kʼal an Biblia okʼox ti ki pujan?
¿Janéy koˈol ka tʼajaˈ okʼox ti ki pujan?
¿Jantʼó ti yab koˈol ka jilaˈ kej an jikʼeb kin tʼajaˈ abal yab ki pujan?
KA EXLAˈ JUN XATA MÁS
Ka chuˈuw jantʼó ti a léˈ ki pujan.
«¿I kʼwajatich tʼojojodh abal ki pujan?» (La Atalaya, marzo de 2020)
Ka chuˈuw juntsik xanéy xi neˈech ti tolmiy ka átaˈ an kʼibataláb abal ka ejto ki pujan.
«¿Waˈach jun xantʼó xi yab tin jilál kin pujan?» (La Atalaya, marzo de 2019)
Ka chuˈuw janti jun i inik in ejto kin jekʼontsi an kʼibatalábtsik abal ka pujan.
Más okʼox, jun i inik xin bij ta Ataa in chalpayalak max koˈol ka pujan. Ka chuˈuw janéy in tʼajaˈ abal ka pujan.