AJUMTALÁB 38
Ki kʼakʼnaˈ abal u kʼwajat ejat
Ba ni xeˈchintal i watʼnál yan xataˈ lej alabél. Ani aunque ki watʼnaˈ i dhukʼeltalábtsik, por bélkʼi i ejtowal ki kʼijidhnaˈ an ejattaláb. ¿Janti i ejtowal ki xalkʼantsi na Jehová abal i kʼakʼnál an chʼejwalixtaláb kʼal an ejattaláb? ¿Ani jantʼó ti koˈol ki tʼajaˈ?
1. ¿Jantʼó ti koˈol ki kʼakʼnaˈ an ejattaláb?
Koˈol ki kʼakʼnaˈ an ejattaláb kom xi tu pidhámal jaˈich na Jehová. (Salmo 36:9). «Pos kom Jajáˈ tu pidhál an ti xeˈchintaláb, Jajáˈ tu tʼajál ku dhútsumlách ani Jajáˈ tu pidhál ejtal xowaˈ i yéntsal» (Hechos 17:25, 28). Anchanˈ tám, na Jehová tu pidhál xowaˈ i yejentsal abal ku kʼwajay ejat. Ani in tʼajál ki kʼijidhnaˈ an ejattaláb (ka ajay Hechos 14:17).
2. ¿Janti i ejtowal ki xalkʼantsi na Jehová abal i kʼakʼnál an chʼejwalixtaláb kʼal an ejattaláb?
Tam ti na nánaˈ jilkʼon kóˈodh, na Jehová ti chuˈuw. Kʼal in tolmixtal an Okʼoxláb, na David in uluw ba jun i oláb: «Na wal tin chuˈuw tam ti tujey nu ejattal ba nin tsukul nu nánaˈ» (Salmo 139:16). Na ejattal jaˈich lej exbadh abal na Jehová (ka ajay Mateo 10:29-31). Na Jehová in yajnál tʼajat tam ka chemdhá jun i atikláb o max tatáˈ ki tʼajtsin jun xataˈ (Éxodo 20:13).a Jeye neˈech kin yajnaˈ tʼajat max yab ki beletnaˈ ni ejattal o max ki tʼajaˈ kej xi kʼeˈettsik kin watʼnaˈ i yajtsiktaláb. Tam ki beletnaˈ ni ejattal ani ki beletnantsi tin ejattal xi kʼeˈettsik, i xalkʼál abal i kʼakʼnál an ejattaláb xu chʼejwalidh.
ABAL KI EXÓBNAˈ MÁS
Ki chuˈuw juntsik xanéy xanti i ejtowal ki xalkʼaˈ abal i kʼakʼnál an ejattaláb.
3. Ka beletnaˈ na ejattal
An belomtsik xin utsámal na Jehová abal neˈech kin tʼójontsi, echʼekʼij in beletnál nin ejattal. Kom koˈoltsik kin pidhaˈtsik tin báˈ an Okʼoxláb jelti jun i pikbantsixtaláb. Ka ajaytsik Romanos 12:1, 2 ani ki tʼilmáchtsik kʼal tin kwentaj jechéˈ:
¿Jantʼó ti yejat ka beletnaˈ na ejattal?
¿Janti a ejtowal ka tʼajaˈ?
4. Ka beletnaˈ na ejattal ani nin ejattal xi kʼeˈettsik
An Biblia tu okʼtsal abal yab ki tʼajaˈ kej ni jun xitaˈ kin watʼnaˈ i yajtsiktaláb. Ka chuˈutsik an VIDEO abal ka chuˈutsik janéy ka tʼajaˈ abal yab ka watʼey jun i yajtsiktaláb.
Ka ajaytsik Proverbios 22:3 ani ki tʼilmáchtsik janti in ejtowal ka tólmixin jun, abal kin beletnaˈ an ejattaláb...
... tin kʼimáˈ.
... ba nin tʼojlábil.
... tam u ubátʼ.
... tam i beldhál an carro o tam u neˈechkʼi.
5. Yab ka petʼnaˈ an chakam xi yabél waˈchinék
Kʼal i labidh káwintaláb, na David in uluw abal na Jehová in tʼajál tʼajat ti kwentaj nin ejattal an chakam xi yabél u waˈchinal. Ka ajaytsik Salmo 139:13-17 ani ki tʼilmáchtsik kʼal tin kwentaj jechéˈ:
Abal na Jehová, ¿joykʼiˈ tu tujél nin ejattal jun i atikláb: tam ka waˈchin o tam yabél u waˈchinal?
An takʼixtalábtsik xi na Jehová in pidhaˈ an belomtsik xi ti Israel in beletnantsi tin ejattal an mímláb xi kóˈodh ani an chakam xi yabél u waˈchinal. Ka ajaytsik Éxodo 21:22, 23 ani ki tʼilmáchtsik kʼal tin kwentaj jechéˈ:
¿Janti in achʼálak na Jehová, tam jun xitaˈ kin tʼajaˈ kej jun i mímláb kin kʼibdhaˈ an chakam xi yabél waˈach?
Ani tám, ¿janéy in achʼál na Jehová tam jun i atikláb kin léˈnaˈ kin petʼnaˈ an chakam?b
Ani tatáˈ, ¿janéy a chalpayal kʼal xowaˈ an Okʼoxláb in chalpayal?
Hasta jun i mímláb xin kʼakʼnál an ejattaláb in ejtowal kin chalpay abal jaˈich más alwaˈ kin petʼnaˈ an chakam. Ka ajaytsik Isaías 41:10 ani ki tʼilmáchtsik kʼal tin kwentaj jechéˈ:
Tam jun i mímláb ka nixokná kin petʼnaˈ nin chakámil, ¿jitaˈ koˈol kin kontsi ti tolmixtaláb? ¿Jantʼó?
XOWAˈ JUNTSIK IN ULAL: «Cada jun an mímláb in ejtowal kin takuy max neˈech kin petʼnaˈ nin chakámil o yabaˈ. Kom jaˈich nin ejattal».
¿Janéy in tʼajál ka chalpay, abal jaˈich lej exbadh nin ejattal an nánaˈláb ani jeye an chakam xi yabél u waˈchinal?
XOWAˈ I EXOBNÁMICH
An ejattaláb jaˈich in chʼejwalixtal na Jehová. Ani an Biblia tu okʼtsal ki kʼakʼnaˈ, ki beletnaˈ ani ki kʼanidhaˈ ni ejattal ani nin ejattal xi kʼeˈettsik.
Ki chalpay xowaˈ i exobnámal
¿Janti i choˈób abal na Jehová in kʼakʼnál nin ejattal an atikláb?
¿Janéy in achʼál na Jehová tam jun i atikláb kin chemdhaˈ tin báˈ o kin chemdhaˈ kʼeˈet i atikláb?
¿Janéy jaˈich xowaˈ más a kulbetnál kʼal an ejattaláb xi chʼejwalidh?
KA EXLAˈ JUN XATAˈ MÁS
¿Janti i ejtowal ki kʼakʼnaˈ na Jehová kom tu pidhámal ni ejattal?
An labidh chʼejwalixtaláb kʼal an ejattaláb (ajatláb 141) (2:41)
¿Ka exlaˈ max an Okʼoxláb in pakwlantsal jun i mímláb, max in petʼnámal nin chakámil ti wejeˈ?
«¿Janéy in chalpayal na Jehová tam jún kin petʼnaˈ nin chakámil?» (Artículo de jw.org)
Ki exóbnaˈ janti in chuˈtal na Jehová an ejattaláb, tam ki takuy janti ku kʼijidhbé.
«¿I ejtowal ku kʼijidhbé ba ubátʼnich xi kʼakʼadh?» (¡Despertad!, 8 de octubre de 2000)
¿Ani max jun i atikláb in chalpayámal kin chemdhaˈ tin báˈ? Ka chuˈuw an takʼixtalábtsik xin pidhnál an Biblia.
«¿Janti in ejtowal tin tolmiy an Biblia max u léˈ ku chemdhaˈ tu báˈ?» (Artículo de jw.org)
a Na Jehová in tʼajál ti kwentaj jitaˈtsik kʼwajattsik tʼeˈpidh (Salmo 34:18). Jajáˈ in exbayal xitaˈtsik kʼwajattsik lej tʼeˈpidh ani in léˈ kin chemdhaˈ tin báˈ ani in léˈ kin tolmiy. Ka chuˈuw janti in ejtowal ti tolmiy nin takʼixtal an Okʼoxláb tam ka ajay an dhutsadh úw xin bij «¿Janti in ejtowal tin tolmiy an Biblia max u léˈ ku chemdhaˈ tu báˈ?», xi kʼwajat ban pejats «Ka exlaˈ jun xataˈ más» ba jechéˈ i ajumtaláb.
b Xin petʼnámal nin chakámil ti wejeˈ yab koˈol ka kʼwajay echʼekʼij tʼeˈpidh; kom na Jehová in ejtowal kin pakwlantsi. Neˈech ka elaˈ más i óltsixtaláb ban pejats «¿Janéy in chalpayal na Jehová tam jún kin petʼnaˈ nin chakámil?», xi kʼwajat ban pejats «Ka exlaˈ jun xataˈ más» ba jechéˈ i ajumtaláb.