AJUMTALÁB 15
¿Jitaˈ jaˈich na Jesús?
Na Jesús jaˈich jun i atikláb xi lej exladh tin pubíl an Chabál, yan i atiklábtsik in exlantsal janti in bij, por yantsik jeye in chalpayal yan xanéy kʼal tin kwentaj jitaˈ lej tsubax jaˈich jajáˈ. Por ¿janéy in ólnál an Biblia kʼal tin kwentaj na Jesús?
1. ¿Jitaˈ jaˈich na Jesús?
Na Jesús jaˈich jun i espíritu xi lej chapik xi u kʼwajíl tuwaˈ walkʼiˈ. Na Jehová in tʼajaˈ okʼox na Jesús ani tayíl in tʼajaˈ ejtal xowaˈ waˈach. Jaxtám an Biblia in ulal abal «na Kristo jaˈich na más ultaláb kʼal ejtal xowaˈ» waˈach (Kolosenses 1:15). Jeye u bijyáb tin «junkax chakámil» an Okʼoxláb, kom tokot jajáˈ tʼajadh kwetém kʼal na Jehová (Juan 3:16). Na Jesús in tolmiy na Jehová abal kin tʼajaˈ ejtal xowaˈ waˈach ban Chabál (ka ajay Kolosenses 1:16). Hasta xoˈ, bél in ojontsal ti tʼojnaltsik junax. Na Jesús jeye u bijyáb «tin Káwintal» na Dios, kom jajáˈ in ólnál i óltsixtalábtsik xin pidhnál nin Tátaˈ (Juan 1:14).
2. ¿Jantʼó ti tsích na Jesús techéˈ ti Chabál?
In koˈolich xónaˈ 2,000 i tamub, na Jehová in tʼajaˈ jun i labidh labandhaxtaláb: in éynaˈ in tʼokat cháp abal kin watʼbaˈ nin ejattal na Jesús xi kʼwajatak tuwaˈ walkʼiˈ ba nin tsukul jun i tsidhan xin bij ta María. Anchanáˈ tám, na Jesús waˈchin jelti jun i atikláb (ka ajay Lukas 1:34, 35). Jajáˈ tsích abal kin tʼajaˈ ti Kristo o ti Mesías xi bijidh neˈech ka tsích, ani jeye tsích abal kin loˈo an atiklábtsik.a Ejtal an wejeˈ káw xi uludhak ban Biblia abal neˈech ka watʼey kidhey kʼal na Jesús. Ani jechéˈ in tʼajaˈ abal an atiklábtsik kin ejto kin exlaˈ «na Kristo, nin Chakámil na Dios xi ejat» (Mateo 16:16).
3. ¿Jonti kʼwajat na Jesús xoˈ?
Na Jesús chemech, ani tayíl witsbantsat tin ejattal jelti jun i espíritu abal ka kʼwajay tuwaˈ walkʼiˈ. Ani tuwaˈ walkʼiˈ na Dios in «kʼwajbaˈ na Jesús más ultaláb ké ejtal xowaˈ waˈach» (Filipenses 2:9). Xoˈ na Jesús jaˈich jun i ángel xin koˈol yan i chápláb, por tokot na Jehová jaˈich xin koˈol más i chápláb kej na Jesús.
ABAL KI EXÓBNAˈ MÁS
Ki exóbnaˈ más kʼal tin kwentaj na Jesús abal ki exlaˈ jitaˈ lej tsubax jaˈich jajáˈ, ani jantʼó ti lej exbadh ki exlaˈ.
4.Na Jesús yab jaˈich an Okʼoxláb
An Biblia in ulal abal na Jesús in koˈol tʼajat i chápláb tuwaˈ walkʼiˈ, por bélkʼi in tʼajál ti kwentaj na Jehová, xi jaˈich nin Tátaˈ. ¿Jantʼó ti in ulal anchanˈ? Ka chuˈutsik an VIDEO abal ki exbay jantʼó tin ulal an Biblia abal na Jesús yab jayéchkʼi kej na Dios.
Ban textos xi neˈech ki chuˈuw neˈech tu tolmiy ki exbay jantʼó ti na Jesús yab jayéchkʼi kej na Jehová. Ka ajaytsik jún ti jún an texto ani ki tʼilmáchtsik kʼal tin kwentaj jechéˈ:
Ka ajaytsik Lukas 1:30-32.
Kʼal xowaˈ in uluw an tʼokat abatwále, ¿jantʼó ti na Jesús yab jayéchkʼi kej na Jehová, xi «púlek tʼajat»?
Ka ajaytsik Mateo 3:16, 17.
¿Janéy in uluw an káw xi achʼatmé tuwaˈ walkʼiˈ tam ti pujan na Jesús?
¿Jitaˈ a chalpayal abal jaˈichak in káwintal?
Ka ajaytsik Juan 14:28.
¿Jitaˈ jaˈich xi más púlek ani in koˈol más i awiltaláb: jun i tátaˈláb o jun i chakámláb?
¿Jantʼó ti na Jesús in bijiy na Jehová tin «Tátaˈ»?
Ka ajaytsik Juan 12:49.
¿In chalpayalak na Jesús abal jajáˈ ani na Jehová jayéchkʼitsik? ¿Janéy a chalpayal tatáˈ?
5. Na Jesús jaˈich an Mesías
Ban Biblia waˈach yan i wejeˈ káw xi u tʼilom kʼal tin kwentaj an Mesías, jechéˈ i wejeˈ káw neˈechak kin tolmiy an atiklábtsik kin exlaˈ jitaˈ jaˈich an Mesías, xin takwyámal an Okʼoxláb abal kin loˈo an atiklábtsik. Ka chuˈutsik an VIDEO, xonti in ólnál kʼal tin kwentaj janti kidhey juntsik i wejeˈ káw kʼal na Jesús tam ti kʼwajay techéˈ ti Chabál.
Ka ajaytsik jechéˈ i wejeˈ káw ban Biblia ani ki tʼilmáchtsik kʼal tin kwentaj jechéˈ:
Ka ajaytsik Mateo 2:4-6 abal ka exóbnaˈtsik jonti neˈech ka waˈchin an Mesías.b
¿Waˈchin na Jesús tajaˈ xonti in ulalak an Biblia? (Mateo 2:1).
Ka ajaytsik Salmo 34:20 ani Zacarías 12:10 abal ki chuˈuw xowaˈ in ulal an Biblia kʼal xowaˈ neˈech kin watʼnaˈ na Jesús tam ka chemech.
¿Tsubax watʼey anchanáˈ jelti in ulal an wejeˈ káw? (Juan 19:33-37).
¿A chalpayal abal na Jesús in tʼajaˈ xataˈ abal ka tʼajan jechéˈ i wejeˈ káw kʼal jajáˈ?
Ani tatáˈ, ¿janéy ti okʼtsal jechéˈ kʼal tin kwentaj na Jesús?
6. Neˈech ki bachʼuw i alwaˈtaláb max ki exlaˈ na Jesús
An Biblia in ulal abal jaˈich lej exbadh ki exlaˈ na Jesús ani xowaˈ an Okʼoxláb in punkʼuntsámal kin tʼajaˈ. Ka ajaytsik Juan 14:6 ani 17:3, ani ki tʼilmáchtsik kʼal tin kwentaj jechéˈ:
¿Jantʼó ti lej yejat ki exlaˈ na Jesús?
Jesus opened the way to become God’s friend. He taught the truth about Jehovah, and through him, we can gain everlasting life
XOWAˈ JUNTSIK IN ULAL: «An óltsixtsik kʼal a Jehová yab in beláltsik na Jesukristo».
¿Janéy neˈech ka tokʼoy?
XOWAˈ I EXOBNÁMICH
Na Jesús jaˈich jun i espíritu xin koˈol tʼajat i chápláb, jaˈich in Chakámil an Okʼoxláb ani jaˈich an Mesías.
Ki chalpay xowaˈ i exobnámal
¿Jantʼó tin ulal an Biblia abal na Jesús jaˈich «na más ultaláb kʼal ejtal xowaˈ» waˈach?
¿Janéy in tʼajál wiˈik na Jesús okʼox ti ka tsích ban Chabál?
¿Janti i choˈób abal na Jesús jaˈich an Mesías?
KA EXLAˈ JUN XATAˈ MÁS
Ka chuˈuw más i óltsixtaláb xin tejwaˈmedhál abal na Jesús jaˈich an Mesías.
Ka chuˈuw jantʼó tin ulal an Biblia abal an Okʼoxláb jaˈich in tátaˈ na Jesús.
«¿Jantʼó tu bijyáb na Jesús in Chakámil an Okʼoxláb?» (Artículo de jw.org)
Ka exóbnaˈ jantʼó ti an trinidad yab jaˈich jun i óltsixtaláb xi kʼwajat ban Biblia.
«Na Jesús, ¿jaˈich an Okʼoxláb?» (La Atalaya, 1 de abril de 2009)
Ka ajay janti in jalkʼuy in ejattal jun i mímláb tam tin exlaˈ xowaˈ in ulal an Biblia kʼal tin kwentaj na Jesús.
«Jun i judía in ulal jantʼó tin jalkʼuy xowaˈ in belálak» (¡Despertad!, mayo de 2013)
a An ajumtalábtsik 26 ani 27 in wilkál jantʼó ti an atiklábtsik in yejentsal an loˈeltaláb ani janti tu loˈwal na Jesús.
b Ka chuˈuw an óltsixtaláb 2 xin wilkál jun i wejeˈ káw xin ólnál jowkʼiˈ ti neˈech ka xalkʼan an Mesías ban Chabál.