Adam An Eve Neva Lissen To God

One day wen Eve wuz by herself one snake had talk to her. It wen tell: ‘God wen tell, you guys no can eat from all da trees, you tink dass fo real?’ Eve tell: ‘Nah, he neva say dat. God tell no can eat from ony one tree, bumbye we mahke.’ Da snake tell: ‘No way! You not goin mahke if you eat from dat tree, you goin come like God.’ Wuz dat true? No, dass one bulai. But Eve had believe um. Da moa Eve wen look at da fruit, da moa she had like eat um. She wen eat da fruit an give some to Adam. He had kno dat dey would mahke if dey neva do wat God tell. But still yet, he wen eat da fruit.

Layta on dat day, Jehovah wen talk to Adam an Eve. He wen ask dem how come dey neva lissen to him. Eve had blame da snake, an den Adam wen blame Eve. Cuz Adam an Eve neva do wat God tell, Jehovah had kick dem out of da garden. He wen put angels an one fiyah sword at da front, fo make shua dey no could eva come back inside.

Jehovah wen tell dat da one who had lie to Eve wuz goin get punish too. Da snake no wuz da one really talking to Eve. Jehovah neva made snakes dat could talk. Wuz one pilau angel who wen make da snake talk. He did dis fo trick Eve. Da angel’s name iz Satan da Devil. In da future, Jehovah goin get rid of Satan so dat he no can keep tricking peopo into doin bad kine stuff.