STUDY 10

Change Up Yoa Voice

Matthew 10:27

MAIN TING: Change up yoa voice fo match wat you talking about an fo reach da heart.

Change up how loud or soft you talk. Talk moa loud fo make importan points stan out an fo move yoa lissenas. Same ting wen you read scripchas wea peopo stay getting judged. Talk moa soft fo make peopo like hea wat you goin say nex, wen you talking about someting skery, or someting dat make peopo worry.

No talk loud so much dat peopo feel like you scolding dem. No be ova da top wen you talk an make um all about you.
Change up how high or low you make yoa voice. If dass how you talk in yoa language, talk moa high wen you pumped up or wen you talking bout someting big or real far away. Make yoa voice low wen you talking bout someting sad or someting dat make peopo worry.
Change up how fas or slow you talk. Talk moa fas wen you telling someting exciting. Talk moa slow wen you telling someting importan.

Fo no skea yoa lissenas, no change up how fas or slow you talk all of a sudden. No talk so fas dat no can undastan wat you saying.