TRYING FO TALK STORY DA FIRS TIME
LESSON 5
Talk Nice Kine
Bible trut: “Weneva you guys talk, no talk any kine—talk wit aloha.”—Col 4:6.
Wat Paul Wen Do
1. Watch um da VIDEO, o read um Jesus Guys 17:22, 23. Den tink about da questions:
How Paul wen feel about da bulai religious kine tings he wen see in Athens?—Check out Jesus Guys 17:16.
Instead of pointing finga at da guys from Athens, how Paul wen talk nice an use wat dey wen believe fo share da good kine tings from God?
Wat We Learn From Paul?
2. Peopo going like lissen to us if we watch wat we say, how we say um, an wen we say um.
Copy Paul
3. Tink about da words you choose. Fo exampo, wen you talk to someone who not one Christian, maybe you gotta change up da way you bring up da Bible, o da way you talk about Jesus.
4. No be too fas fo correck somebody. Let dem tell you how dey tink an feel. If dey tell you someting dat no match up wit da Bible, hold back an no argue. (Jam 1:19) Wen you lissen to dem, you going learn wat dey believe an how come dey believe dat.—Smart Guys 20:5.
5. Agree wit an make da person feel good wen can. Da person might tink wat dey learn from dea religion stay right. Try talk about someting da two of you agree on an den litto by litto, help dem undastand wat da Bible teach.