How God’s Kea Can Be Good Fo You
Az unreal dat God wen make oua body so dat can heal. Wen one healty body get cut or scrape, it “start fo get all kine tings in da body working fo help heal itself.” (Johns Hopkins Medicine) Right away da body do someting fo stop da bleeding, it make da blood vessels moa big, fix da wound, an make moa strong wea da wound stay.
TRY TINK: If God wen make oua bodies so dat can heal wen get cut or scrape, you tink we can trus him wen he promise fo help heal da deep hurt feelings we get inside? One song writa wen tell, “Wen dey stay real sore inside, he make um come good one mo time. Jalike he put one bandage on top da place dat stay hurt.” (Songs Fo God 147:3) If you get feelings dass hard fo deal wit cuz of someting dat wen happen in da pas o stay happening now, how you can be shua dat Jehovah goin help you heal now an in da future?
WAT DA BIBLE TEACH US ABOUT GOD’S LOVE
God promise dis, “No sked, cuz you guys da one I stay wit. No come bum out, cuz I yoa God. I make you guys come strong inside. Mo den dat, I help you guys.” (Isaiah 41:10) Somebody dat kno Jehovah kea about dem, can stay calm an be strong wen dey go tru hard times. Da aposal Paul wen talk about dis calm feeling from God, he tell, “God goin make you guys come so notting bodda you . . . He give me da powa fo stay strong fo hando any kine stuff.”—Fo Da Philippi Peopo 4:4-7, 9, 13, NWT.
Da Scripchas help make oua fait moa strong in wat Jehovah promise fo oua future. Like Jesus Show 21:4, 5, NWT tell us wat he goin do an why we can trus he goin do um:
“He going wipe away all da tears” from peopo’s eyes. Jehovah goin hemo all da tings dat make us suffa an worry, even tings dat seem manini to oddas.
Jehovah, “Da One dat sit on top da throne” in heaven, goin use his powa fo stop suffaring an give us da help we need.
Wateva Jehovah promise iz “true an you can trus um.” Garanz Jehovah goin do wateva he tell he goin do cuz his name an rep iz on da line.
““He going wipe away all da tears from dea eyes, an nobody going mahke no moa, stay sad inside, o cry, o suffa no moa. All dose tings dat wen happen befoa going be pau.” An da One dat sit on top da throne tell, “Try look! I stay make eryting all new.” Den he tell, “Write um down da words, cuz az true an you can trus um.””—Jesus Show 21:4, 5, NWT.
Eryting we see aroun us an da Bible help us get fo kno moa about oua God Jehovah. Da tings God wen make help us fo see he like be oua fren. But da Bible invite us fo be his fren wen it tell, “Come close to God, an he goin come close to you.” (From James 4:8) In Jesus Guys 17:27 it tell, “He no stay far away from all us guys.”
Da moa you get fo kno God, da moa you goin see “he get one big heart fo you guys.” (1 From Peter 5:7) Wass some good tings dat can happen if you come fo trus Jehovah?
Try look wat wen happen to Toru, from Japan. Even tho he wuz raise by his Christian maddah, still yet he wen get mix up wit da yakuza, da Japanese Mafia. He tell, “I wen tink dat God hate me, an wen guys I wen kno had die, speshly da ones I wen love, I wen tink God had do dat fo punish me.” Toru wen tell cuz of da dangerous kine life he wuz living an da way he wen tink, he wen come “one person dat neva kea about anyting or anyone.” He wen tell wat he really wanted fo do, “I wanted fo kill somebody moa famous den me den die young fo make one name fo myself.”
But wen Toru an his wife, Hannah wen study da Bible, Toru wen make big changes in his life an in da tings he wanted fo do. Hannah wen tell, “I could see how my husban wen change.” Toru tell, “Dea really iz one God who kea about ery one of us. He no like nobody die, an he like let us go if we sorry fo real kine. We can tell God anyting cuz he like lissen an he really undastan how we feel. Pretty soon, Jehovah goin hemo all problems an suffaring. But even right now he help us in all kine ways cuz he kea about us an love us.”—Songs Fo God 136:23.
Like we had see wit Toru, wen we kno dat God real soon goin hemo all suffaring an wipe away all tears, dat give us hope fo da future an can help us fo live one betta life now. Even if get suffaring all aroun us, we can have one good life cuz God love us an like take kea us.